پىكىر • 24 قىركۇيەك، 2020

دانا نۇرجىگىت بالالارعا قارسى قاستاندىق ءۇشىن جازانى قاتاڭداتۋدى سۇرادى

188 رەت كورسەتىلدى

سەناتور دانا نۇرجىگىت سەناتتىڭ جالپى وتىرىسىندا قر باس پروكۋرورىنا دەپۋتاتتىق ساۋال جولدادى، دەپ حابارلايدى Egemen.kz

"حالىقارالىق تاجىريبيەنى سارالاپ، قىلمىستىق زاڭناما قولدانىسىن تالداپ، بالالارعا قارسى جىنىستىق سيپاتتا جاسالعان قىلمىستىڭ بارلىق تۇرىلەرىنە قاتىستى جازانى قايتا قاراپ، قاتاڭداتۋ بويىنشا ۇسىنىستار ازىرلەۋدى سۇرايمىز"، دەدى سەناتور ءوز ساۋالىندا.

سونداي-اق دەپۋتات مەملەكەت باسشىسىنىڭ وسى ماسەلە بويىنشا بەرگەن تاپسىرماسىنىڭ ورىندالۋ بارىسى تۋرالى اقپارات بەرۋدى سۇراپ، بۇل سالاداعى حالىقارالىق كونۆەنتسيالارعا قوسىلۋ جانە يمپلەمەنتاتسيالاۋ بويىنشا زاڭنامالىق ۇسىنىستار ەنگىزۋ قاجەتتىگىن اتاپ ءوتتى.

دەپۋتات كەلتىرگەن ستاتيستيكا بويىنشا، قازاقستاندا سوڭعى 4 جىلدا وسىنداي قىلمىستار ءۇشىن 1868 ادام كىنالى دەپ تانىلعان. ولاردىڭ 539-ى عانا 10 جىلعا دەيىنگى مەرزىمگە باس بوستاندىعىنان ايىرىلعان. بيىلدىڭ وزىندە عانا كامەلەتكە تولماعان بالالارعا قارسى جاسالعان قىلمىس 8 پايىزعا وسكەن.

"مۇنى توقتاتۋ ءۇشىن قاتاڭ جازا قىلمىستى جاساعان ادامعا عانا ەمەس، سول قىلمىسقا جول بەرگەن، فاكتىلەردى جاسىرعان، قىلمىسكەردىڭ جالتارۋىنا مۇمكىندىك بەرگەن ازاماتتارعا دا قولدانىلۋى كەرەك دەپ ويلايمىز"، دەيدى سەنات دەپۋتاتى.

سونىمەن بىرگە د.نۇرجىگىت قازاقستان حالىقارالىق دەڭگەيدە بالالاردى قورعايتىن ەكى ماڭىزدى قۇجاتقا ءالى قول قويماعانىنا نازار اۋداردى. ولار: ء"بىرىنشى، بالالار قۇقىقتارى تۋرالى كونۆەنتسيانىڭ ءۇشىنشى فاكۋلتاتيۆتىك حاتتاماسى. ەكىنشى، ەۋروپا وداعىنىڭ بالالاردى سەكسۋالدى ەكسپلۋاتاتسيادان جانە سەكسۋالدى زورلىق زومبىلىقتان قورعاۋ كونۆەنتسياسى. بۇل كونۆەنتسياعا قوسىلعان مەملەكەتتەر بالانى جەزوكشەلىككە تارتۋ، ماجبۇرلەۋ نەمەسە سەكس-تاۋار رەتىندە كورىپ، پايدالانۋ، بالالار پورنوگرافياسىن ءوندىرۋ، ۇسىنۋ، تاراتۋ، ساتىپ الۋ، ساقتاۋ ءۇشىن قىلمىستىق جازا قاراستىرۋعا مىندەتتى"، دەلىنگەن سەنات دەپۋتاتىنىڭ ساۋالىندا.

سوڭعى جاڭالىقتار

ۇقساس جاڭالىقتار