قوعام • 24 قىركۇيەك، 2020

سەناتور اتىراۋ وبلىسىنداعى جول قۇرىلىسىن اياقتاۋ مەرزىمىن كورسەتۋدى تالاپ ەتتى

349 رەت كورسەتىلدى

اتىراۋ وبلىسىنداعى جولداردىڭ جاي-كۇيى تولعاندىرعان سەناتور عۇمار دۇيسەمباەۆ ۇكىمەت باسشىسى اسقار ءماميننىڭ اتىنا دەپۋتاتتىق ساۋال جولدادى، دەپ حابارلايدى Egemen.kz.

بۇل وڭىردە اتىراۋ-ورال جانە مۇقىر-قۇلسارى اۆتوجولدارىن قايتا جاڭارتۋ جوسپارلانعان بولاتىن. مەملەكەت باسشىسىنىڭ تاپسىرماسى بويىنشا «نۇرلى جول» مەملەكەتتىك باعدارلاماسى اياسىندا 2025 جىلعا دەيىن 24 مىڭ شاقىرىم رەسپۋبليكالىق جول جاڭارتىلادى.

دەپۋتاتتىڭ ايتۋىنشا، رەسپۋبليكالىق ماڭىزى بار اۆتوجولداردىڭ وبلىستاعى جاقسى جانە قاناعاتتانارلىق جاعدايداعى ۇلەسى نەبارى 66%-دى قۇرايدى، ال رەسپۋبليكا بويىنشا ورتاشا كورسەتكىش – 88% بولىپ وتىر. ايتا كەتۋ كەرەك، سوڭعى جىلدارى ءوڭىردىڭ جول-كولىك وقيعالارىنىڭ ستاتيستيكاسى ءماز ەمەس. ەگەر 2016-2017 جىلدارى 65 جول-كولىك وقيعاسى ورىن السا، 2018-2019 جىلدارى بۇل كورسەتكىش 111 بولدى، وندا 209 ادام جاراقات الىپ، 59 ادام قايتىس بولدى.

سونداي-اق ساۋالدا اتىراۋ-ورال اۆتوجولىنداعى ءوتۋ قارقىنى تاۋلىگىنە 7 مىڭ ءاۆتوموبيلدى قۇرايتىنى اتاپ وتىلگەن، بۇل جولدىڭ قازىرگى تالاپ كورسەتكىشتەرىنە سايكەس كەلمەيدى.

«2021-2023 جىلدارعا ارنالعان رەسپۋبليكالىق بيۋدجەت جوباسىندا وسى ماقساتتارعا 4،4 ملرد. تەڭگە مولشەرىندە قاراجات كوزدەلگەن، 1 كم اۆتوجولدى قايتا جاڭارتۋدىڭ بولجامدى قۇنى 400-600 ملن. تەڭگەنى قۇرايدى، ال قۇرىلىستىڭ نورماتيۆتىك ۇزاقتىعى 3 جىل. كورسەتىلگەن قاراجات پەن بەلگىلەنگەن مەرزىمدە ۇزىندىعى 487 كم جولدى قايتا جاڭعىرتۋ جۇمىستارىنىڭ تابىستى بولعانىنا كۇمان تۋادى"، - دەپ اتاپ ءوتتى ع.دۇيسەمباەۆ. سەناتور ءوز كەزەگىندە قارجىلاندىرۋ كوزدەرىن جانە وسى جولدى قايتا جاڭارتۋدى اياقتاۋ مەرزىمدەرىن كورسەتۋدى تالاپ ەتتى.

عۇمار دۇيسەمباەۆ سونىمەن قاتار قاتتى جابىنى مۇلدە جوق مۇقىر-قۇلسارى جولىنىڭ ناشار جاعدايى الاڭداتادى. سەناتور بۇل اۆتوجول اقتاۋ تەڭىز پورتى مەن قازاقستاننىڭ قالعان بولىگى اراسىنداعى اقتوبە وبلىسى ارقىلى وتەتىن ەڭ قىسقا كولىك قاتىناسى ەكەنىن اتاپ ءوتتى. اۆتوجولدى قايتا جاڭارتۋ جولدى 150 شاقىرىمعا قىسقارتۋعا جانە اتىراۋ-اقتاۋ جولىنداعى كولىك سانىن ازايتۋعا مۇمكىندىك بەرەدى.

«مەملەكەتتىك باعدارلامادا قارجىلاندىرۋ كوزى كورسەتىلمەگەن. ۇكىمەت جوعارىدا اتالعان جوبالاردى قارجىلاندىرۋ كوزدەرىن انىقتاۋ جانە ولاردى ۋاقتىلى اياقتاۋ جونىندە قاجەتتى شارالار قابىلداۋى قاجەت»، - دەدى دەپۋتات.

سوڭعى جاڭالىقتار

ۇقساس جاڭالىقتار