ايماقتار • 24 قىركۇيەك، 2020

تارازدا ەلباسى تاپسىرماسىمەن مونۋمەنت بوي كوتەردى

54 رەت كورسەتىلدى

سوڭعى جىلدارى تاراز قالاسىندا بىرقاتار ساياباق سالىنىپ، ءتۇرلى ەسكەرتكىشتەر بوي كوتەرۋدە. مۇنىڭ ءبارى ەكى مىڭ جىلدان استام تاريحى بار كونە شاھار ساۋلەتىن ارتتىرۋعا ۇلەس قوسۋدا. ەلباسى نۇرسۇلتان نازارباەۆتىڭ تاپسىرماسىمەن تارازدا "قازاق حالقىنا مىڭ العىس" مونۋمەنتى اشىلدى، دەپ حابارلايدى Egemen.kz.

نىساننىڭ بيىكتىگى 30 مەتر بولادى. مونۋمەنت قۇرىلىسىن "تەمىر-بايلىق" جاۋاپكەرشىلىگى شەكتەۋلى  سەرىكتەستىگى جۇرگىزگەن. وعان 158 ميلليون تەڭگە جۇمسالعان. مونۋمەنتتە قازاق جەرىندە تۇراتىن ءتۇرلى ۇلت پەن ۇلىستىڭ ەلگە دەگەن العىسى مەن ريزاشىلىعىنىڭ سيمۆوليكالىق كورىنىسى بەينەلەنگەن. اتالعان نىساننىڭ اشىلۋ سالتاناتىنا جامبىل وبلىسىنىڭ اكىمى بەردىبەك ساپارباەۆ قاتىستى.

"تاۋەلسىزدىكتىڭ العاشقى جىلدارىنان باستاپ ەلىمىزدىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ سارابدال ساياساتىنىڭ ناتيجەسىندە كوپۇلتتى ەلىمىزدە حالىقتار دوستىعى، بىرلىك، تاتۋلىق پەن تۇراقتىلىق سالتانات قۇرۋدا. ارينە 29 جىل تاريح ءۇشىن قاس-قاعىم ءسات. دەگەنمەن، ەلىمىز وسى ۋاقىت ارالىعىندا تولايىم تابىستارعا، ۇلكەن جەتىستىكتەرگە جەتتى. ەلىمىزدىڭ ەڭ ماڭىزدى جەتىستىكتەرىنىڭ ءبىرى – كوپۇلتتى قوعامدا بەيبىتشىلىك پەن كەلىسىمدى ساقتاۋ بولىپ تابىلادى. ءبىزدىڭ باستى بايلىعىمىز – ەلدەگى تىنىشتىق پەن تۇراقتىلىق. ەلىمىز ەگەمەندىك العالى بەيبىت ءومىر ءسۇرۋدىڭ ونەگەسىن كورسەتىپ كەلەدى. تاتۋلىق پەن بەيبىتشىلىكتى، قوعامدىق تۇراقتىلىقتى نىعايتۋ ماقساتىندا قىرۋار جۇمىستار اتقارىلۋدا. اشىلىپ وتىرعان "قازاق ەلىنە مىڭ العىس" مونۋمەنتى دە وسى ءسوزىمىزدىڭ ايعاعى. وسىدان ەكى جىل بۇرىن نۇرسۇلتان ءابىش ۇلى ەلىمىزدەگى بارلىق وبلىس ورتالىقتارىندا "قازاق ەلىنە مىڭ العىس" مونۋمەنتىن سالۋ تۋرالى تاپسىرما بەرگەن بولاتىن. مونۋمەنت – بارلىق ۇلت وكىلدەرىنىڭ قازاق حالقىنا دەگەن ريزاشىلىعىنىڭ بەلگىسى"، دەدى ول.

ۆ

سالتاناتتى جيىندا "دنەپرو" ۋكراين ەتنومادەني بىرلەستىگىنىڭ توراعاسى فەدور كليمەنكو، م.ح.دۋلاتي اتىنداعى تاراز وڭىرلىك ۋنيۆەرسيتەتى "قازاقستان حالقى اسسامبلەياسى" كافەدراسىنىڭ مەڭگەرۋشىسى پاريدا مامەدوۆا ءسوز سويلەپ، قازاق حالقىنا دەگەن العىسىن ءبىلدىردى.

سونداي-اق تاراز قالاسىندا "اربات-1" دەمالىس ورنى دا ەل يگىلىگىنە بەرىلدى. اربات قۇرىلىسىن جۇرگىزگەن "تەمىر-بايلىق" سەرىكتەستىگىنىڭ بريگاديرى ەركىن سەدەلحاننىڭ ايتۋىنشا، جۇمىس ءۇش ايعا سوزىلىپ، 200-گە جۋىق قالا تۇرعىنى جۇمىسپەن قامتىلعان. دەمالىس ورنىندا قۇرعاق جانە ۇزىندىعى 20 مەترگە دەيىن جەتەتىن ءتۇرلى-ءتۇستى سۋبۇرقاقتار ورنالاسقان. ودان بولەك، مۇندا قالا تۇرعىندارىنىڭ تىنىعىپ، بوس ۋاقىتىن ءتيىمدى وتكىزۋىنە، الاڭسىز دەمالۋىنا بارلىق جاعداي جاسالعان. بەردىبەك ساپارباەۆ اتالعان دەمالىس ورنىن ارالاپ كورىپ، قۇرىلىس جۇمىسىنا وڭ باعاسىن بەردى.

سوڭعى جاڭالىقتار

ۇقساس جاڭالىقتار