ايماقتار • 24 قىركۇيەك، 2020

تارازدا دومبىراعا ەسكەرتكىش اشىلدى

41 رەت كورسەتىلدى

وسىدان بەس جىل بۇرىن اۋليەاتا جەرىندە قازاق حاندىعىنىڭ 550 جىلدىعى دۇركىرەپ وتكەن بولاتىن. ۇلى مەرەكە قارساڭىندا ماڭعىستاۋ وبلىسىنىڭ اكىمدىگى تويعا تارتۋ رەتىندە جامبىل داڭعىلىنىڭ بويىندا ورنالاسقان سول كەزدەگى "تاراز" قوناقۇيىنىڭ الدىنان ساياباق سالىپ بەرگەن ەدى. سودان بەرى ۇلتتىق ناقىشپەن كومكەرىلگەن كوركەم ساياباق شاھاردىڭ ساۋلەتىن ارتتىرىپ قانا قويماي، كوپشىلىكتىڭ دە سەرۋەندەيتىن ورنىنا اينالدى. كەيىننەن اتالعان قوناقۇيدى تاراز يننوۆاتسيالىق-گۋمانيتارلىق ۋنيۆەرسيتەتى ءوز قاراجاتىنا ساتىپ الىپ، "ستۋدەنتتەر ءۇيىن" اشتى. جالپى، تۇرعىنداردىڭ عانا ەمەس، جاستاردىڭ دا ورتالىعىنا اينالعان ساياباقتان ەندى الىپ "دومبىرا" ەسكەرتكىشى بوي كوتەرىپ وتىر، دەپ حابارلايدى Egemen.kz.

ەسكەرتكىشتىڭ بيىكتىگى 7،5 مەتردى قۇرايدى. اتالعان نىسان كاسىپكەرلەردىڭ دەمەۋشىلىگىمەن سالىنعان.

"دومبىرا" ەسكەرتكىشىنىڭ اشىلۋ سالتاناتىنا جامبىل وبلىسىنىڭ اكىمى بەردىبەك ساپارباەۆ قاتىستى. سونداي-اق جيىندا ايماقتىڭ مادەنيەت قايراتكەرلەرى مەن ونەرپازدارى، جالپى كوپشىلىك بولدى. ءوز سوزىندە اكىم حالقىمىز ءۇشىن دومبىرانىڭ ورنى بولەك ەكەنىن، ونىڭ كۇمبىرلى كۇيى، اۋەزدى ءانى ادامنىڭ جان تەبىرەنىسىن جەتكىزەتىنىن ايتىپ ءوتتى. سونىمەن قاتار ول ەكى جىل بۇرىن ەلباسى نۇرسۇلتان نازارباەۆتىڭ شەشىمىمەن شىلدەنىڭ ءبىرىنشى جەكسەنبىسى "ۇلتتىق دومبىرا كۇنى" بولىپ جاريالانعانىن، بۇل مەرەكەلىك كۇننىڭ ۇلتتىڭ رۋحانياتىنا وشپەس ءىز قالدىراتىنىن جەتكىزدى.

"تاراز يننوۆاتسيالىق-گۋمانيتارلىق ۋنيۆەرسيتەتىنىڭ وقىتۋشىلارى مەن ستۋدەنتتەرىنىڭ قولداۋىمەن جاتاقحانا الدىنداعى ساياباقتان "دومبىرا"  ەسكەرتكىشى اشىلىپ وتىر. ۋنيۆەرسيتەتتە وقىپ جۇرگەن جاستار دومبىرانىڭ توگىلگەن كۇيى مەن جىرى ارقىلى وزدەرىنە كۇش-جىگەر مەن ساپالى ءبىلىم الا الادى. حالقىمىزدا مىقتى كۇيشىلەردىڭ بولعانى بارشامىزعا تاريحتان بەلگىلى. بۇگىندە سونداي تالانتتاردىڭ ونەرىن جالعاستىرىپ كەلە جاتقان ەلىمىزگە تانىمال كۇيشى ءابدىمومىن جەلدىباەۆتىڭ ءبىر كۇيىنىڭ ءوزى الەمگە تارالىپ، دۇنيەجۇزى قازاق دەگەن ۇلت پەن قازاقستان دەگەن مەملەكەتتىڭ بار ەكەنىن ءبىلدى. سونىمەن قاتار بۇگىنگى جاستارىمىز دا دومبىرا ونەرىن جالعاستىرىپ، ناسيحاتتاۋ ۇستىندە. وسى ورايدا، اقىن قادىر مىرزا ءالى اعامىز "ناعىز قازاق قازاق ەمەس، ناعىز قازاق – دومبىرا!" دەگەن. بۇل ءسوز تەككە ايتىلماسا كەرەك. سەبەبى جەر بەتىندە دومبىرا سەكىلدى اسپابى بار ۇلتتار نەكەن-ساياق. سوندىقتان ءبىز، بۇگىنگى ۇرپاق بابالارىمىزدىڭ الدىندا باسىمىزدى ءيۋىمىز قاجەت"، دەدى بەردىبەك ساپارباەۆ.

سونداي-اق ەسكەرتكىشتىڭ اشىلۋىنا ۇلەس قوسقان اتالعان وقۋ ورداسىنىڭ باسشىلىعىنا العىس ايتىپ، الداعى ۋاقىتتا "دومبىرا" ەسكەرتكىشىنىڭ جانىندا ۇلت رۋحانياتىن ۇلىقتايتىن ماعىنالى شارالاردىڭ كوپتەپ ۇيىمداستىرىلاتىنىنا سەنەتىنىن جەتكىزدى.

 

جامبىل وبلىسى

سوڭعى جاڭالىقتار

ۇقساس جاڭالىقتار