قازاقستاندا توتەنشە جاعداي ەنگىزىلگەن كۇننەن باستاپ الماتى مەن نۇر-سۇلتان قالالارىندا تاۋلىك سايىن دارىگەرلەردى, بلوكبەكەتتە تۇرعان جاۋىنگەرلەردى ءبىر مەزگىل ىستىق تاماقپەن قامتاماسىز ەتۋدى قالىپتى جاعدايعا اينالدىردى. قىسقاسى, بيزنەسىن توقتاتىپ, بارلىق مۇمكىندىكتى پاندەميا وشاعىندا قالىپ قويعان ازاماتتارعا ءبىر مەزگىل ىستىق تاماق جەتكىزىپ بەرۋگە جۇمىلدىرعان. كەيىنىرەك, ولارعا الماتىداعى كاسىپكەرلەردىڭ ءبىرى قوسىلىپ, تاماققا قوسا, كوفە, سالات تۇرلەرى, ىستىق شاي, ءتاتتى كۇلشەلەرمەن تولىقتىرىپتى.
– كارانتين جاريالانعاننان كۇننەن باستاپ دارىگەرلەردى جانە قۇقىق قورعاۋ ورگاندارىنىڭ قىزمەتكەرلەرىن ءبىر مەزگىل ىستىق تاماقپەن قامتاماسىز ەتۋگە شەشىم قابىلدادىق. پاندەميانىڭ العاشقى كۇندەرى ولاردىڭ قانداي جاعدايدا جۇمىس ىستەگەنى بارىمىزگە بەلگىلى. الەۋمەتتىك جەلىلەر ارقىلى كومەككە مۇقتاج ازاماتتاردىڭ قاتارىنىڭ ءوسىپ كەلە جاتقانى بايقالدى. ولاردىڭ ءبارىن قامتاماسىز ەتۋگە مۇمكىندىگىمىزدىڭ جەتپەيتىنى بەلگىلى. سوندىقتان ۋاقىت وتكىزبەي دەمەۋشى ىزدەۋگە شەشىم قابىلدادىق, – دەيدى ە.يبراگيم.
وسى كەزدە بۇل جۇمىس توبىن قولداۋشىلار كوپ بولدى. كاسىپكەر ايبەك بارىسوۆ العاشقىلاردىڭ ءبىرى بولىپ كومەك قولىن سوزىپ, قارجى ۇسىندى.
– ال ءبىز قولىمىزدان كەلەتىن تىرلىكتى – ىستىق تاعامدى دەر كەزىندە دايىنداپ, قاجەتتى نۇكتەلەرگە جەتكىزىپ بەرۋدى جالعاستىرا بەردىك, – دەيدى ول. ءساۋىر ايىندا كوۆيد فوبياسى قوعامدىق ساناعا ۇرەي بولىپ تاڭبالانىپ قالدى. بويىنان دەرت بەلگىسى بايقالعان ازاماتتاردىڭ ءۇيى قورشاۋعا الىنعانى, وسى دەرتتەن قايتىس بولعان مارقۇمداردى بولەك جەرلەگەنى ەل اراسىندا دەرتتى جۇقتىرىپ الام با دەگەن ۇرەيدىڭ بوياۋىن قالىڭداتىپ جىبەردى. وسى كەزدە اۋرۋحانالار مەن بلوك-بەكەتتەرگە دايىن تاماقتى جەتكىزۋدىڭ ءوزى پروبلەماعا اينالدى.
– كۋرەرلەرگە تاماقتى جەتكىزىپ بەرگەنى ءۇشىن تولەنەتىن جالاقى ەكى, ءۇش ەسەگە دەيىن ءوسىپ كەتتى. ال دەمەۋشىلەردىڭ بەرگەن قارجىسىندا بۇل ەسكەرىلمەگەن. سول سەبەپتى بۇل مىندەتتى ۇلىم ەكەۋمىز اتقاردىق. دەرتتىڭ بەتالىسى ءورشىپ تۇرعان كەزدە ءورتتىڭ وشاعىندا جۇردىك. قازىر ءبىزدى ادامداردىڭ ىقىلاسى ساقتاپ جۇرگەن سياقتى, – دەيدى ە.يبراگيم.
ارادا بىرەر اي وتكەندە دەمەۋشىلەردىڭ بەرگەن قارجىسىنىڭ ءتۇبى كورىنىپ قالدى. ال پاندەميانىڭ بەتى قايتار ءتۇرى جوق. ا.بارىسوۆتىڭ دەمەۋشىلىگىمەن بولىنگەن قارجى تۇگەسىلدى. ءوز مۇمكىندىگىمەن كوپ دەگەندە كۇن سايىن 40 ادامعا تاماق جەتكىزىپ بەرەر.
– قازىر ەشكىم اش ەمەس. بىراق قازاقتا «كوڭىل كوڭىلدەن سۋ ىشەدى» دەگەن ءسوز بار. تىرلىگىمىز توقتاپ قالماۋ ءۇشىن كراۋفاندينگ مۇمكىندىگىنە جۇگىندىك. سەبەبى ون ادامعا ارنالعان تاماقتى دارىگەرلەر 40 ادامعا تەڭ ەتىپ ءبولىپ بەرىپ جاتقانىن كورگەن كەزدە كوزىمنەن جاس ىرشىپ كەتتى. الەۋمەتتىك جەلى ارقىلى ءبىزدىڭ توبىمىزعا قوسىلۋعا ۇندەدىم. از عانا ۋاقىت ىشىندە 4 ملن تەڭگە جينالدى. كومەك قولىن سوزعاندار دا كوپ بولدى. قىسقاسى, ءبىز پاندەميا كەزىندە 4 مىڭ تاماقتى ءتيىستى ورىندارعا جەتكىزدىك, – دەيدى ە.يبراگيم. اقەدىل ازامات پاندەميانىڭ قازاقستاندىقتاردىڭ بىرلىگى مەن پەيىلىنە سىزات تۇسىرە الماعانىنا كۋا بولعانىن جەتكىزدى. ءتىپتى زەينەتكەرلەر حابارلاسىپ, كۇن كورىسىنەن ارتىلعان تيىن-تەبەنىن دە ۇسىنعان ساتتەر بولعان.
– اۋىلدا اپالارىمىز «التىن, كۇمىس تاس ەكەن, ارپا, بيداي اس ەكەن» دەگەن قاناتتى ءسوزدى قيىنشىلىق زامان قالىپتاستىرعانىن ايتاتىن. بۇرىن جاستىقپەن ونىڭ ماعىناسىنا تەرەڭ ءمان بەرىپ كورمەپپىن. كۇنى ۇزاق بلوك-بەكەتتە تۇرعان جاۋىنگەرلەر, اۋرۋحانادا كۇندىز-ءتۇنى كەزەكشىلىكتە بولعان دارىگەرلەر اش دەپ ەشكىم ايتا المايدى. بىراق قيىن ساتتە دوستىق پەيىلمەن ۇسىنعان تۇز-ءدامىمىزدى ولار ەشقاشان ۇمىتپايتىنىنا سەنەمىن, – دەيدى ە.يبراگيم.
ول بۇگىنگە دەيىن بيزنەس سالاسىندا ءتۇرلى سالادا باق سىناپ كورگەنىن دە ايتىپ ءوتتى. ال پاندەميا ادامداردى تاماقتاندىرۋ ەڭ ساۋاپتى ءىس ەكەنىن تالاي ادامدارعا ۇعىندىرا تۇسكەندەي.
– وزبەكستاندا دايىن تاعامدار يندۋسترياسى الەمدىك دەڭگەيگە كوتەرىلگەن. تاشكەنتتە تۇراتىن دوستارىم كەشەگى پاندەميا كەزىندە اۋرۋحانالاردى, بلوك-بەكەتتەردى ءبىر مەزگىل ىستىق تاماقپەن قامتاماسىز ەتۋدى ءوز جاۋاپكەرشىلىكتەرىنە العانىن ايتادى. كورشى ەلدە بۇل سالا دامىعان عوي. ءبىر ءدامحانا 20 ادامعا ىستىق تاماق بەرسە دە ماسەلە شەشىلەر ەدى. بىزدە بۇل ماسەلە شەشىلمەگەنىن, وسى سالاعا ۇلتجاندى ازاماتتار كوپتەپ كەلگەندە عانا شەشىمىن تاباتىنىن پاندەميادا بايقادىق. فورس-ماجورلىق سيپاتتا باستالعان ۆولەنتەرلىك ارەكەتىمىز كاسىپكەرلەر تاراپىنان قولداۋ تاپتى. پاندەميادان كەيىن وسى سالاعا شىنداپ بەت بۇرۋعا شەشىم قابىلدادىم. سەبەبى الماتىداعى بيزنەستىڭ وسى تۇرىندە وزگە ەلدەن كەلىپ, جۇمىسىن جانداندىرىپ, ءتىپتى قازاقستاندىقتارعا جۇمىس تاۋىپ بەرىپ وتىرعان شەتەلدىكتەر جەتەدى. تاعامنىڭ ءتۇر-ءتۇرىن دايىنداۋدى قازاق تا بىلەدى, ەندى وسى سالاداعى باستاعان ءىسىمدى العا جىلجىتۋعا تالپىنىپ كورەمىن, – دەيدى ول.
الماتى
