دەكرەتتىك دەمالىستان كەيىن الماتى قالاسىنىڭ تۇرعىنى ماقپال نۇراق ۇيدە تىگىن تىگۋ ارقىلى تابىس تاپتى. بىردە الەۋمەتتىك جەلىدەن «ەڭبەك» مەملەكەتتىك باعدارلاماسى اياسىندا جۇزەگە اسىرىلىپ جاتقان «جاس كاسىپكەر» جوباسىنىڭ باستالعانى تۋرالى اقپاراتتى كورىپ, سوعان قاتىسۋعا بەل بۋادى.
– ءوز شەبەرحانامدى اشۋدى بۇرىننان ارماندادىم. بيزنەس-جوسپارىم دايىن تۇردى, قانداي جابدىقتار, قانداي ماتەريالدار كەرەك ەكەنىن جاقسى بىلەتىنمىن. ءتىپتى قاجەتتى اۋماقتى ەسەپتەپ شىعاردىم. جۇمىسپەن قامتۋ ورتالىعىنا بارىپ ەدىم, ولار ماعان وقۋعا, سەرتيفيكات الۋعا مۇمكىندىك بەردى. كەشكى توپتا وقىپ ءجۇرىپ, جۇمىس ىستەۋگە دە ۇلگەردىم, – دەيدى ول.
گرانت العان سوڭ ماقپال كيىم تىگۋمەن تولىق اينالىسۋعا مۇمكىندىك بەرەتىن جابدىق ساتىپ الدى.
– جوباعا قاتىسۋ ارقىلى تاۋار اينالىمى ەكى ەسەگە ءوستى, قازىر ماعان كەلىپ تۇسەتىن تاپسىرىس كوپ. جاقىندا تاعى دا دەكرەتتىك دەمالىسقا شىعامىن. سوندىقتان تىگىن كۋرستارىن وتكىزىپ, وسىلايشا ءوزىم سياقتى ساپاعا جۇمىس ىستەۋگە تىرىساتىن كومەكشى تاپقىم كەلەدى. ءارى قاراي, بۇيىرسا, ءىسىمدى كەڭەيتپەك نيەتتەمىن, – دەيدى ماقپال نۇراق.
الماتىلىق پەريزات تاتەننىڭ دە تابىس وقيعاسى وسىعان ۇقساس. بۇل كەيىپكەرىمىز دە تىگىن ىسىمەن اينالىسىپ, قازاقستاندىق ديزاينەرلەردە جۇمىس ىستەگەن جانە اقىرىندا ءوز كاسىبىن اشۋعا شەشىم قابىلداعان.
– «جاس كاسىپكەر»جوباسىنا قاتىسۋعا بىرگە وقىعان توپتاسىم كەڭەس بەردى. ايتپاقشى, ول دا جوباعا قاتىسۋشى, العاشقى اعىمدا وقىعان. سونىمەن, گرانتتى العاننان كەيىن, ءوزىم ءۇشىن جۇمىس ىستەپ جاتىرمىن, – دەيدى پەريزات.
ەسكە سالايىق, وسى جىلدىڭ 8 ايىندا, الماتى قالاسىندا «ەڭبەك» باعدارلاماسىنا 32 مىڭنان استام ادام قاتىستى. ونىڭ 1306-cى ءوزىنىڭ بيزنەس يدەيالارىن جۇزەگە اسىرۋ ءۇشىن 200 اەك كولەمىندە مەملەكەتتىك گرانت الدى, ال 43-ىنە شاعىن نەسيەلەر ءبولىندى.
جالپى, ەلىمىز بويىنشا بيىل «ەڭبەك» باعدارلاماسىنا 430 مىڭ ادام قاتىسىپ, ولارعا ءتۇرلى قولداۋ شارالارى كورسەتىلدى. 279,8 مىڭ ادام جۇمىسپەن قامتىلسا, ونىڭ ىشىندە 146,7 مىڭ ادام تۇراقتى جۇمىسقا كىردى. 159,8 مىڭنان استام ادام سۋبسيديالاناتىن جۇمىس ورىندارىمەن قامتىلدى. بيزنەس-يدەيالاردى دامىتۋعا جەڭىلدىكپەن 6 984 ميكروكرەديت جانە 20,4 مىڭ گرانت بەرىلدى. 28,4 مىڭ ازامات قىسقا مەرزىمدى كاسىپكەرلىك نەگىزدەرىن وقىدى.
