ءداندى داقىلدارعا الدىمەن وراق سالعان اۋداننىڭ ءبىرى اقسۋ ەدى. قازىر ديقاندار 29,8 مىڭ گەكتارداعى كۇزگى جۇمىستاردى تولىق اياقتاپ, ءداندى داقىلداردى 100 پايىزعا ورىپ الدى. ياعني اقسۋلىق ديقانداردىڭ قامباسىنا 63,5 مىڭ توننا تازا ءونىم تۇسكەن. ال ءار گەكتاردىڭ ورتاشا ونىمدىلىگى 21,3 تسەنتنەردەن اينالىپتى.
اۋداندا ءداندى داقىلدارمەن قاتار مايلى داقىلداردىڭ جيىن-تەرىنى دە قىزۋ ءجۇرىپ جاتىر. بيىل ديقاندار 15,6 مىڭ گەكتارعا وسى داقىلدىڭ ءدانىن سەپكەن بولاتىن. قازىر ەگىستىكتەگى جۇمىس 70 پايىزعا جەتكەن ەكەن. 1,6 مىڭ توننا ءونىم الىنىپ, ورتاشا ونىمدىلىك 9,6 تسەنتنەردەن اينالۋدا.
جالپى, اۋدانداعى كۇزگى جيىن-تەرىن جۇمىسىنا جەڭىلدەتىلگەن باعامەن بولىنگەن 120 توننا جانارماي جەتكىزىلگەن-ءدى. بۇعان قوسىمشا شارۋالار 350 توننا ديزەل وتىنىن ءوز قارجىسىنا ساتىپ العان. ناتيجەسىندە استىق جيناۋ ناۋقانى توقتاۋسىز ءوتىپ جاتىر. قازىر ديقاندار ءداندى داقىلداردان بولەك باقشا ونىمدەرىن جيناۋدى دا تولىقتاي اياقتاپتى. بيىل اۋدان بويىنشا ەگىلگەن كارتوپ, كوكونىس جانە باسقا دا باقشا داقىلدارىنىڭ اۋماعى 2,2 مىڭ گەكتارعا جەتكەن بولاتىن. قازىر وسى جەردەن 45,7 مىڭ توننا ءونىم الىندى. ال اۋداندا جينالعان استىقتى ساقتاۋعا ارنالعان ءبىر قويما بار. وعان 2 مىڭ توننا ءدان سيادى ەكەن. مۇنان بولەك, الداعى جىلدىڭ تۇقىم قورى دا جاساقتالعان. كەلەشەك قامى ءۇشىن 5,1 توننا قور جينالدى, بۇل اۋدان بويىنشا قاجەتىلىكتى 95 پايىزعا وتەيدى.
ايتپاقشى, اقسۋ اۋدانى تۇرعىندارىنىڭ ارقا سۇيەر باعىتىنىڭ ءبىرى مال شارۋاشىلىعى ەكەنىن ۇمىتپاۋىمىز كەرەك. سول سەبەپتەن دە شارۋالار قىسقا مال ازىعىن قامداۋعا ەرەكشە كوڭىل بولەدى. ەسەپ بويىنشا قازىر اۋداندا 158 مىڭ توننا پىشەن دايىندالىپ, 10,2 مىڭ توننا سۇرلەم جينالعان. سونىمەن قاتار 42,1 مىڭ توننا سابان باستىرىلىپ, 26,7 مىڭ توننا ارپا ورىلىپتى. ياعني اۋدانداعى مال باسىنا قاجەتتى ازىق قورى تولىقتاندى.
الماتى وبلىسى
