اباي • 23 قىركۇيەك، 2020

ۆيلنيۋس قالاسىندا ابايدىڭ وقۋ زالى اشىلدى

75 رەت كورسەتىلدى

ليتۆا استاناسى، ۆيلنيۋس قالاسىندا "اباي جيناعى" وقۋ زالىنىڭ سالتاناتتى اشىلۋى ءوتتى. بۇل تۋرالى ليتۆاداعى قازاقستان ەلشىلىگى حابارلادى، دەپ جازادى Egemen.kz.

ۆيلنيۋس وكرۋگىنىڭ، ادام ميتسكەۆيچ اتىنداعى، قوعامدىق كىتاپحاناسىنىڭ عيماراتىندا قازاقتىڭ ۇلى اعارتۋشىسى ابايدىڭ 175 جىلدىعىنا وراي وقۋ زالى اشىلدى.

جاڭا قاۋىپسىزدىك ەرەجەلەرىنە سايكەس، شەكتەۋلى قۇرامدا وتكىزىلگەن ءىس-شاراعا، سەيم دەپۋتاتتارى (پارلامەنت)، مەملەكەتتىك ورگانداردىڭ، اكادەميالىق، قوعامدىق جانە ىسكەر توپتاردىڭ وكىلدەرى، سونداي-اق ليتۆا بۇقارالىق اقپارات قۇرالدارى قاتىستى.

قر ليتۆا رەسپۋبليكاسىنداعى ەلشىسى ۆ.تەميرباەۆ، ءوزىنىڭ قۇتتىقتاۋ سوزىندە، ەۋروپانىڭ ايگىلى اقىنى، ادام ميتسكەۆيچتىڭ قۇرمەتىنە اتالعان كىتاپحانادا، اباي اتىنداعى وقۋ زالىنىڭ اشىلۋىنىڭ سيمۆوليزمدى اتاپ ءوتتى. اباي ايگىلى ۆيلنيۋس تۇرعىنىڭ شىعارمالارىن انا تىلىنە اۋدارعان العاشقى شىعىس اقىنى بولدى.

وسى تۇرعىدا، قازاقستاندىق ديپلومات، ەۋروپالىق مادەنيەتكە باۋلۋ، رەفورماتور ابايدىڭ ۇمتىلىستارىنىڭ ءبىرى بولعانىن جانە ول، قازاق حالقىن شيللەر، گەتە، پۋشكين جانە بايروننىڭ ەڭبەكتەرىمەن العاشقىلاردىڭ ءبىرى بولىپ تانىستىرعانىن جەتكىزدى.

ءىس-شارا اياسىندا، ليتۆاداعى ەڭ ۇزدىك وپەرا انشىلەرىنىڭ ءبىرى رايموندا يانۋتەنايتە جانە بەلگىلى كونتسەرتمەيستەر نيولە باراناۋسكايتە، ابايدىڭ "كوزىمنىڭ قاراسى"، "جەلسىز تۇندە جارىق اي" جانە "ايتتىم سالەم، قالامقاس" سياقتى تانىمال اندەرىن ورىندادى.

راسىمگە قاتىسۋشىلار، بۇل زالدى تەك ليتۆادا عانا ەمەس، بۇكىل بالتىق وڭىرىندەگى قازاق مادەنيەتىنىڭ "تارتىلىس ورتالىعى" دەپ اتادى. ويتكەنى، ابايدىڭ وقۋ زالىن اشۋعا دايىندىق بارىسىندا، ۆيلنيۋس كىتاپحاناسى مەن قازاقستانداعى ەڭ كونە كىتاپحانا – اباي اتىنداعى شىعىس قازاقستان وبلىستىق امبەباپ كىتاپحاناسى اراسىنداعى ىنتىماقتاستىق تۋرالى كەلىسىم جاسالدى.

سونىمەن قاتار، وقۋ زالىندا وسى جىلدىڭ سوڭىنا دەيىن ەلشىلىك، "جارا" (Žara) باسپاسىمەن بىرلەسىپ، ليتۆا تىلىندە جارىق كورگەن، مۇحتار اۋەزوۆتىڭ "اباي جولى" رومان-ەپوپەياسىن جانە ءانۋار ءالىمجانوۆتىڭ "ۇستازدىڭ ورالۋى" رومانىنىڭ تۇساۋكەسەرىن وتكىزبەك.

ايتا كەتسەك، ادام ميتسكەۆيچ اتىنداعى، ۆيلنيۋس وكرۋگىنىڭ قوعامدىق كىتاپحاناسى، ليتۆا استاناسىنىڭ ءدال ورتالىعىندا، بۇرىنعى زەنكوۆيچ-تيشكەۆيچ اۋلەتىنىڭ سارايىندا ورنالاسقان، ونىڭ تاريحى XV-XVI عاسىرلاردان باستاۋ الادى.

سوڭعى جاڭالىقتار

ۇقساس جاڭالىقتار