تاۋارلى ءسۇت فەرماسىن قولعا العان شارۋاشىلىق جەتەكشىسى باقىتجان ماسەلوۆ وسىدان ەكى جىل بۇرىن رەسەيدىڭ بارناۋلىنان ەلۋ شاقتى ءسۇتتى سيىر الىپ كەلگەن-تۇعىن. اۋدان باسشىلىعىنىڭ كوزدەگەنى دە ساۋىن سيىردىڭ باسىن كوبەيتىپ, ءسۇت ونىمدەرىن وزدەرىندە شىعارۋ ەدى. ايتپەسە ەت باعىتىندا مال ءوسىرىپ وتىرعان شارۋالار جەتەرلىك.
– قوجالىقتى العاش اكەمىز اشقان. ءۇيدىڭ كەنجەسى بولعاندىقتان, كەيىن ءوزىم ارالاسىپ كەتتىم. 2018 جىلدىڭ كۇزىندە رەسەيدەن بۋاز قۇناجىندار ساتىپ الىپ, اۋىلعا جەتكىزدىم. سودان بەرى ەكى رەت تولدەدى. پايداسىن كورىپ وتىرمىز. بىلتىر ساۋىنعا ارنالعان اۆتوماتتى اپپارات تا ساتىپ الدىق, – دەيدى قوجالىق يەسى باقىتجان ماسەلوۆ.
اپپارات 60 باسقا ارنالعانىمەن, قازىرگى كۇندە 15 سيىر عانا ساۋىپ وتىر. الىپ كەلگەن سيىردىڭ ءبارىن قاز-قاتار ءتىزىپ قويىپ ساۋىپ الۋعا ابدەن بولار ەدى. الايدا ءسۇت وتكىزەتىن ورىن جوق. شاعىن عانا شارۋاسىن دوڭگەلەتىپ وتىرعان قوجالىق ءۇشىن ءسۇتتى وسكەمەنگە اپارىپ وتكىزۋ ءتيىمسىز. سول ءۇشىن دە باقىتجاننىڭ جۇبايى اراي ساۋىپ العان ءسۇتتى تارتىپ, كىلەگەيى مەن مايىن اۋدان ورتالىعىنا جونەلتەدى.
ال قالعان 150 باس ءىرى قارا قاراعاش جايلاۋىندا. ونىڭ ىشىندەگى سيممەنتال اسىل تۇقىمدىسىنىڭ سانى وسى كۇندە سەكسەنگە جەتكەن. تابىنداعى بۇقالار دا اسىل تۇقىمدى. بۇلاردى جاز جايلاۋعا ايدايتىن تاعى ءبىر سەبەبى – اۋىل ماڭىندا جايىلىمدىق جەر از. سارىكولدىڭ ماڭايى ەگىستىك القاپتارى. قوجالىققا تيەسىلى 70 گەكتار جەردىڭ وتىزى عانا شابىندىق. ونىڭ ءوزى الىستاۋ كۇرشىم اۋىلى جاقتا. ال ماڭايداعى جەرلەر اۋىلدىق تۇرعىندارعا تيەسىلى.
– جەر كەڭ بولسا, اۋىل ءۇشىن عانا ەمەس, اۋدانعا مول پايدا اكەلەر مە ەدىك؟! تۇرعىنداردى دا جۇمىسپەن قامتۋعا بولار ەدى. ازىرشە ءتورت ادامعا تۇراقتى جۇمىس بەرىپ وتىرمىز, – دەيدى قوجالىق يەسى.
ولاردىڭ ەكەۋى باقتاشى. باقتاشىلار وسى ايدىڭ سوڭىنا قاراي سارىكولگە تۇسەدى. قىستاقتا قىستايعى جەمشوپتەرى ازىرلەنىپ جاتىر. بولاشاقتا ءجۇز شاقتى سيىردى ساۋىپ, ءسۇتىن كادەگە جاراتىپ وتىرۋ قوجالىق جەتەكشىسىنىڭ ارمانى.
شىعىس قازاقستان وبلىسى,
كۇرشىم اۋدانى
