قاراعاندى وبلىسىندا پرەزيدەنت سىنىنان كەيىن بىرقاتار لاۋازىمدى تۇلعالار سوگىس الدى. ولاردىڭ قاتارىندا وبلىس اكىمىنىڭ ورىنباسارلارى, قالا جانە اۋدان اكىمدەرى بار. بۇل تۋرالى وبلىس اكىمىنىڭ ءباسپاسوز قىزمەتى حابارلادى.
«2013 جىلدىڭ 11 قازانىندا ۇكىمەتتىڭ كەڭەيتىلگەن وتىرىسىندا مەملەكەت باسشىسىنىڭ جاساعان سىن-ەسكەرتپەلەرىنە ساراپتاما جاساعاننان كەيىن مەملەكەتتىك ورگانداردىڭ جۇمىسىنا قاتىستى سايكەس شەشىمدەر شىعارىلىپ, بىرقاتار لاۋازىمدى تۇلعالار جازالاندى», - دەدى وبلىس اكىمى باۋىرجان ابدىشەۆ سەلەكتورلىق جيىندا.
وبلىس اكىمى «قازاۆياسپەكتر» زاۋىتىنىڭ ءونىم ءوندىرۋدى ۇيىمداستىرۋداعى قاناعاتتانعىسىز جۇمىسى ءۇشىن ءوزىنىڭ ءبىرىنشى ورىنباسارى عابيت مۇحامبەتوۆ پەن ورىنباسارى ءانۋار احمەتجانوۆقا سوگىس جاريالايتىنىن ايتتى. ايماق باسشىسى سول سياقتى اتالعان جوبانىڭ ساتسىزدىككە ۇشىراۋىنا بايلانىستى قاراعاندى قالاسىنىڭ اكىمى مەيرام سماعۇلوۆقا وكتيابر اۋدانىنىڭ اكىمى ەرجان تەمىرحانوۆتى تارتىپتىك جاۋاپكەرشىلىككە تارتۋدى تاپسىردى. ول وسىعان دەيىن وبلىستىق كاسىپكەرلىك جانە ونەركاسىپ باسقارماسىنىڭ باسشىسى بولىپ ىستەگەن ەدى. سونىمەن بىرگە, جوبانى جۇزەگە اسىرۋ كەزىندە قالالىق كاسىپكەرلىك ءبولىمىن باسقارعان قالا اكىمىنىڭ ورىنباسارى ەرىكبەك اتاعانوۆتى تارتىپتىك جاۋاپكەرشىلىككە تارتۋ جۇكتەلدى. «ە.تەمىرحانوۆقا قىزمەتىنە تولىق ساي كەلمەيتىنى ەسكەرتىلىپ, ە.اتاعانوۆقا قاتاڭ سوگىس جاريالاۋ كەرەك», - دەپ ناقتىلادى وبلىس اكىمى.
ايماق باسشىسى, سونىمەن بىرگە, بەس جىلدان بەرى وبلىستىڭ يندۋستريالدى-يننوۆاتسيالىق دامۋ ماسەلەلەرىنە جەتەكشىلىك ەتىپ كەلگەن قاراعاندى وبلىسى ونەركاسىپ جانە يندۋستريالدى-يننوۆاتسيالىق دامۋ باسقارماسىنىڭ ورىنباسارى عالىمجان جۇماسۇلتانوۆتى قىزمەتىنەن بوساتۋ تۋرالى شەشىم شىعاردى.
ب.ابدىشەۆ, سونىمەن بىرگە, «بيزنەستىڭ جول كارتاسى - 2020» باعدارلاماسىنىڭ اياسىندا پايىزدىق نەسيە مولشەرلەمەسىن سۋبسيديالاۋ بويىنشا قاناعاتتانارلىقسىز جۇمىس پەن سايكەس جوبانىڭ جوقتىعى ءۇشىن قاراجال قالاسىنىڭ اكىمى قايرات شورمانباەۆ پەن ۇلىتاۋ اۋدانىنىڭ اكىمى حاميت وماروۆقا سوگىس جاريالادى. سونىمەن بىرگە, قارقارالى اۋدانىنىڭ اكىمى وبلىس اكىمىنىڭ تاپسىرمالارىن ورىنداماعانى ءۇشىن سوگىس الدى.
تاعى بىرقاتار شەنەۋنىكتەر تۇرعىن ۇيلەر مەن الەۋمەتتىك-مادەني نىسانداردا جىلۋ ەسەپتەگىش قۇرالداردى ورناتۋ جۇمىستارىنىڭ ناشار ۇيىمداستىرىلۋىنا بايلانىستى جازالاندى. وبلىس اكىمىنىڭ ورىنباسارى ساپارعالي ىدىرىسوۆقا, شاحتينسك اكىمى الەكساندر اگليۋنينگە, اباي اۋدانىنىڭ اكىمى التاي ەلجاسوۆقا سوگىس جاريالاندى. پريوزەرسك قالاسىنىڭ اكىمى قايرات قامزين دە قاتاڭ سوگىس ارقالادى. بالقاش اكىمى نۇرلان اۋباكىروۆ, ساتباەۆ اكىمى ءانۋار وماروۆ پەن تەمىرتاۋ اكىمى نۇركەن سۇلتانوۆقا ەسكەرتۋ جاسالدى.
سونىمەن بىرگە, وبلىس اكىمى وبلىستىق ەنەرگەتيكا جانە تۇرعىن ءۇي كوممۋنالدىق شارۋاشىلىعى باسقارماسىنىڭ جەتەكشىسىنە وسى باسقارمانىڭ ورىنباسارى تاتيانا ورلوۆانى تۇرعىن ۇيلەر مەن الەۋمەتتىك-مادەني نىسانداردا جىلۋ ەسەپتەۋ بويىنشا قۇرالداردى ورناتۋ جۇمىستارىن ۇيىمداستىرۋ بويىنشا قاداعالاۋ جۇرگىزىلمەۋىنە بايلانىستى تارتىپتىك جاۋاپكەرشىلىككە تارتۋدى تاپسىردى.
قاراعاندى قالاسىنىڭ اكىمىنە «تەپلوترانزيت» جشس باس ديرەكتورى اندرەي لياپۋنوۆقا ەسەپتەۋ قۇرالدارىن ورناتۋدا جىبەرگەن قاتەلىكتەرى ءۇشىن قاتاڭ ەسكەرتۋ جاساۋدى تاپسىردى.
«جوعارىدا اتالعان قالا جانە اۋدان اكىمدەرى ءتيىستى ورىنباسارلار مەن باسقا لاۋازىمدى تۇلعالاردى تارتىپتىك جاۋاپكەرشىلىككە تارتىپ, ولارعا تارتىپتىك جازا تاعايىنداسىن. بۇيرىق جوبالارى بۇگىنگى كۇننىڭ سوڭىنا دەيىن ەنگىزىلۋى ءتيىس», - دەپ قوستى ب.ابدىشەۆ.
ساكەن مايلىباي.
