ساۋال سالىنعان رەسپوندەنتتەر اراسىنان قازاقستانداعى باستامالاردىڭ تەك قاعاز جۇزىندە عانا جۇزەگە اسىرىلاتىنى تۋرالى پىكىردى ءجيى ەستۋگە بولادى. مۇنى بۇگىن, 5 قاراشا كۇنى ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا «دەموكراتيا ينستيتۋتى» عىلىمي-زەرتتەۋ قاۋىمداستىعىنىڭ جوبالار بويىنشا ديرەكتورى يۋليا كۋچينسكايا مالىمدەدى.
ساراپتاماشىنىڭ سوزىنە قاراعاندا, ينستيتۋت جۇرگىزگەن الەۋمەتتىك ساۋالناما ازاماتتاردىڭ ساناسىندا ۇكىمەتتىڭ قاۋقارسىزدىعى تۋرالى پىكىردىڭ بەرىك ۇيالاپ قالعانىن, ولاردىڭ تاراپىنان قازاقستانداعى ىستەردىڭ ءبارى تەك قاعاز جۇزىندە جۇزەگە اسىرىلاتىنى جايلى تۇجىرىمداردىڭ ءجيى ايتىلاتىنىن كورسەتىپ بەرگەن.
«بيىلعى جىلعى 26-31 قازان ارالىعىندا ءبىزدىڭ ينستيتۋت قازاقستان تۇرعىندارىمەن تەلەفون ارقىلى ساۋالناما جۇرگىزدى. رەسپوندەتتەرگە قويىلعان ءبىرىنشى سۇراق «سوڭعى جارتى جىلدا مەملەكەتتىك ورگاندار وكىلدەرى ءسىزدىڭ جانە ءسىز تۇرىپ جاتقان ەلدى مەكەننىڭ ماسەلەلەرىن بىلۋگە قىزىعۋشىلىق تانىتتى ما؟» بولدى. ال سۇرالعانداردىڭ 18 پايىزى عانا وسىنى راستاپ جاۋاپ قايتاردى», - اسسوتسياتسيا ديرەكتورى.
«مەملەكەت قابىلداپ, جۇزەگە اسىرىلىپ جاتقان باعدارلامالار كوپ جاعدايدا قوعامنىڭ مۇددەسىنە جاۋاپ بەرە بەرمەيدى جانە تۇرعىندار سۇرانىسىن قاناعاتتاندىرمايدى. وسىلايشا ءاربىر ءۇشىنشى رەسپوندەنت ءوزىن بارىنشا مازالاندىراتىن پروبلەمالاردىڭ قاتارىندا جەمقورلىق پەن مەملەكەتتىك ورگانداردىڭ ناشار جۇمىسىن اتاپ كورسەتكەن. سۇرالعانداردىڭ 41 پايىزى دەنساۋلىق ساقتاۋ پروبلەماسىن, 24 پايىزى جولدار قۇرىلىسىنىڭ جايىن, ۇشتەن ءبىر بولىگى ءبىلىم الۋ مەن كۇنكورىس ءۇشىن تابىس تابۋ جاعدايىنىڭ جوقتىعىن, بەستەن ءبىر بولىگى تۇرعىن ۇيگە قول جەتكىزۋدىڭ قيىندىعىن العا تارتقان. ەگەر تۇتاستاي الار بولساق, سۇرالعانداردىڭ 85 پايىزى مەملەكەت باسشىسىنىڭ ۇكىمەتتىڭ اتىنا ايتقان سىن-ەسكەرتپەلەرىمەن تولىق كەلىسەتىندەرىن جەتكىزگەن. تۇرعىندا ولاردى شىندىققا ءوزىن ءوزى اقتايتىن, شىندىققا نەگىزدەلگەن جانە بارىنشا ءادىل دەپ ەسەپتەيدى. كوبىنە-كوپ بۇگىنگى تاڭدا قازاقستاندا بارلىعى تەك قاعاز جۇزىندە جۇزەگە اسىرىلىپ جاتقانىن ەستۋگە بولاتىن ەدى», - دەگەندى قوستى يۋ. كۋچينسكايا.
بۇدان باسقا, «ۇكىمەت الەۋمەتتىك ساۋالنامالاردى بەلسەندى پايدالانۋشى بولىپ تابىلادى, الايدا, بار ماسەلە مىنادا, ول مۇندايدا ونىڭ وزدەرىن قاناعاتتاندىراتىن وڭ ناتيجەلەرىنە كوبىرەك جۇگىنەدى. ال كەلەڭسىز ساتتەردى نازاردان شىعارىپ جىبەرەدى», دەپ اتاپ ءوتتى ول.
ايتا كەتۋىمىز كەرەك, ساۋالدامادا 14 ايماقتىڭ, استانا مەن الماتىنىڭ قالا جانە اۋىل تۇرعىندارى قامتىلدى.
ساكەن مايلىباي.
