شاحماتتان الەمنىڭ ەكس-چەمپيونى گارري كاسپاروۆ ازاماتتىق الۋ وتىنىشىمەن لاتۆيا سەيمىنە, ياعني پارلامەنتىنە ءوتىنىش جاسادى. بۇل تۋرالى «روسبالت» اگەنتتىگى حابارلادى.
اقپارات قۇرالىنىڭ مالىمدەۋىنشە, كاسپاروۆ سونىمەن قاتار رەسەي ازاماتتىعىن دا ساقتاپ قالعىسى كەلەتىنىن ايتتى. مۇنى ول لاتۆيا سەيمىنىڭ ەرەكشە ەڭبەك سىڭىرگەن كىسىلەرگە مۇنداي ارتىقشىلىق بەرۋگە قۇقىعى بار ەكەنىنە ارقا سۇيەي وتىرىپ وتىنگەن سياقتى.
بيىلعى جىلعى ماۋسىم ايىندا گارري كاسپاروۆ جەنەۆادا رەسەي بيلىگى تاراپىنان بولاتىن قۋعىننان قورقىپ, ەلگە ورالۋدان باس تارتىپ وتىرعاندىعىن مالىمدەگەن ەدى.
«ساياسي بەلسەندىلەردىڭ قىزمەتتەرىنە تەكسەرۋدىڭ جالعاسۋى ماعان دا تيەتىندىگى تۇسىنىكتى. مەنىڭ ماسكەۋگە ورالعاننان كەيىن قايتا كەرى شىعا الاتىندىعىما سەنىمىم از. سوندىقتان دا ءبىراز ۋاقىت رەسەيگە ورالۋدان باس تارتا تۇرامىن», - دەگەن-ءدى ول.
ساكەن مايلىباي.
