قىركۇيەك ايىنىڭ باسىندا ەلوردا اۋماعىنداعى اۋىلدىق جەرلەردە قايعىلى وقيعا ورىن الدى. ابايسىزدىقتا نەمقۇرايلىلىق سالدارىنان ەكى بالانى تراكتور باسىپ كەتتى. وكىنىشكە وراي, ءبىر بالا وقيعا ورنىندا قازا بولدى. ەكىنشى بالا ەلوردالىق بالالار اۋرۋحاناسىنا جەدەل جەتكىزىلدى. اۋرۋحاناعا تۇسكەن بويدا بالانىڭ جاعدايى وتە اۋىر بولعانىن دارىگەرلەر دە دالەلدەپ وتىر. جەدەل حيرۋرگيالىق كومەك بولىمشەنىڭ دەڭگەيىندە ناۋقاستى حيرۋرگتار, نەيروحيرۋر, تراۆماتولوگ جانە رەانيماتولوگتار قاراپ شىقتى. بالا 10 كۇن جانساقتاۋ بولىمىندە ۋاقىت كەشتى.
اۋرۋحانانىڭ تراۆماتولوگ دارىگەرى مۇحتار احمۇرزاەۆتىڭ ايتۋىنشا, قىز بالا جاراقاتتىق شوك جاعدايىندا ءتۇستى.
"بالا وتە اۋىر جاعدايدا, 3 دارەجەلى جاراقاتتىق شوك جاعدايىندا ءتۇستى. مامانداردىڭ ۋاقىتىلى جەدەل كومەك كورسەتكەنى اسا ماڭىزدى بولدى. بالا اپپاراتقا قوسىلىپ, شوكقا قارسى تەراپيا جۇرگىزىلدى. شۇعىل تۇردە وتا جاساۋ كەرەك ەكەنى بەلگىلى بولدى", دەدى دارىگەر.
5 جاسار قىزدىڭ باسىنان وتكەن وقيعا ونىڭ وتباسى ءۇشىن قاتتى سوققى بولعانى ءسوزسىز. بالاسىن ولىمنەن قۇتقارعانى ءۇشىن دارىگەرلەرگە شەكسىز العىس بىلدىرەتىن وتباسى كىشكەنتاي ناۋقاستىڭ جانىندا.
"قازىر قىزىمنىڭ جاعدايى جاقسى. كوڭىل-كۇيى دە جاقسى. اكەسىمەن ۆيدەو بايلانىس ارقىلى تەلەفونمەن سويلەسىپ تۇرادى. بارلىق وتباسى بولىپ دارىگەرلەرگە مىڭ العىس ايتامىز. ءبىرىنشى قۇدايدىڭ قالاۋىمەن, ەكىنشى دارىگەرلەردىڭ ارقاسىندا قىزىمىز قازىر امان-ەسەن قاسىمىزدا", دەيدى قىزدىڭ اناسى.
"قىزدىڭ امان-ەسەن شىعۋى ۇلكەن قۋانىش. جامباس پەن ءزار شىعارۋ جولدارى قاتتى زاقىمدانعان. قازىر بالانىڭ جاعدايى تۇراقتى. بارلىق پروتسەدۋرالاردى اياقتاعاننان كەيىن بالا ۇيگە شىعارىلادى", دەدى حيرۋرگيالىق ءبولىمىنىڭ باسشىسى رينات بايگيرەەۆ.
