"بيىلعى جىلى ەلىمىزدە ەگىن جيناۋ جۇمىستارى ۋاقتىلى باستالدى. بۇل رەتتە ەگىن جيناۋ ناۋقانىنىڭ قارقىنى وتكەن جىلعا قاراعاندا جوعارى. ماسەلەن, بۇگىنگى كۇنى رەسپۋبليكا بويىنشا بارلىعى 14,8 ملن گەكتاردان استام ءداندى جانە ءداندى-بۇرشاقتى داقىلدار نەمەسە ولاردىڭ جالپى جينالاتىن الاڭىنىڭ 93,4%-دا ەگىن جينالدى. ال بىلتىرعى جىلى وسىنداي ۋاقىتتا 10,3 ملن گەكتار نەمەسە 67,6% جينالعان بولاتىن. گەكتارىنا 12,3 تسەنتنەر ورتاشا تۇسىمدىلىكپەن 18,2 ملن توننا استىق باستىرىلدى (2019 جىلى – 11,4 ملن توننا بولعان)", دەيدى ساپارحان وماروۆ.
ونىڭ ايتۋىنشا, ءداندى جانە ءداندى-بۇرشاقتى داقىلدار ءوندىرىسىنىڭ بولجامدى كولەمى ەلدىڭ ىشكى قاجەتتىلىكتەرىن تولىقتاي قامتاماسىز ەتۋگە مۇمكىندىك بەرەدى.
"كەلەسى قادام – ەگىننىڭ ساندىق جانە ساپالىق ساقتالۋىن قامتاماسىز ەتۋ. جالپى العاندا, ەلدەگى قولدا بار ساقتاۋ قۋاتتىلىعى, وتكەن جىلدارداعى اۋىسپالى قالدىقتاردى ەسەپكە العاندا, بولجامدى ءونىم ءتۇسىمىن ساقتاۋ ءۇشىن جەتكىلىكتى. رەسپۋبليكادا استىق ساقتاۋدىڭ جالپى سىيىمدىلىعى 28,8 ملن توننانى قۇرايدى, ونىڭ 12,1 ملن تونناسى – استىق قابىلداۋ كاسىپورىندارىندا, 16,7 ملن تونناسى – اۋىل شارۋاشىلىعى وندىرۋشىلەرىندە. اكىمدىكتەر ەلەۆاتورلاردىڭ 2020 جىلعى ءتۇسىمدى ۋاقتىلى قابىلداۋىنا ۇنەمى مونيتورينگ جۇرگىزۋى, سونداي-اق استىقتىڭ ۇزدىكسىز ورىن اۋىستىرۋىن تۇراقتى باقىلاۋدا ۇستاۋى قاجەت", دەيدى مينيستر.
