جول كارتاسى ارقىلى الداعى جىلدارى ريددەر مەتاللۋرگيالىق كەشەنىندە ءوندىرىس ورىندارىنان اۋاعا شىققان قالدىققا مونيتورينگ جۇرگىزۋدىڭ اۆتوماتتاندىرىلعان جۇيەسىن ەنگىزۋ, جەكە سەكتوردى ورتالىق جىلۋمەن جابدىقتاۋ جۇيەسىنە قوسۋ, وبلىستاعى قالالاردا لاستاۋشى زاتتارعا ساراپتاما جاسايتىن زاماناۋي زەرتحانالار سالۋ, سول سەكىلدى اعاش وتىرعىزۋ كولەمىن ارتتىرۋعا باعىتتالعان 30-عا جۋىق ءىس-شارا جوسپارلانعان.
«جەرگىلىكتى حالىق قورشاعان ورتانىڭ جاعدايىنا بايلانىستى اتقارىلىپ جاتقان جۇمىستار تۋرالى ءبىلۋى ءتيىس. سوندىقتان جول كارتاسىن بىرلەسىپ دايىنداۋعا شاقىرامىن, ءبىز بارلىق ۇسىنىستاردى تىڭداپ, ەسكەرۋگە دايىنبىز. جول كارتاسى مازمۇندى, ناتيجەلى بولۋى كەرەك. وڭىردەگى پروبلەمالار ونداعان جىلدار بويى جينالىپ قالعانى ءمالىم. سوندىقتان ولار بىردەن شەشىلە قويمايدى. دەگەنمەن وندىرىستىك وڭىردەگى قورشاعان ورتانىڭ جاعدايىن جاقسارتۋ ءۇشىن بار كۇشىمىزدى سالۋىمىز قاجەت», دەدى م.مىرزاعاليەۆ.
جول كارتاسى ۇسىنىستار قابىلدانعاننان كەيىن قوعام وكىلدەرىنە قايتا تانىستىرىلادى.
ونلاين جيىندا قوعام بەلسەندىلەرى مەن عالىمدار اتموسفەرالىق اۋانىڭ لاستانۋى, وعان قاتىستى قابىلدانىپ جاتقان شارالارعا قاتىستى ساۋالدارىن جولداۋعا مۇمكىندىك الدى. ايماق تۇرعىندارى ەكولوگيالىق مونيتورينگ بەكەتتەرىنىڭ سانىن كوبەيتۋدى سۇرادى. ۆەدومستۆو باسشىسى ەكولوگيالىق كودەكستە ناقتى قادامدار كورسەتىلگەنىمەن وڭىردەگى قورشاعان ورتانىڭ احۋالىن رەتتەۋگە بايلانىستى شۇعىل ارەكەتتەر قاجەت ەكەنىن ايتتى.
«ەۋروپا «وزىق قولجەتىمدى تەحنولوگيالار» (وقت) ارقىلى ەكولوگيالىق احۋالدى جاقسارتۋعا 15 جىل جۇمساعانىن بىلەمىز. ءبىز ەكولوگيالىق كودەكستە بۇل مەرزىمدى دە ەسكەردىك. بىراق جىلدار بويى كۇتىپ, قاراپ وتىرا المايمىز. بارىنشا تەزىرەك ارەكەت ەتۋىمىز كەرەك. حالىق جانە جەرگىلىكتى اتقارۋشى ورگان وكىلدەرىمەن باس قوسىپ وتىرعانىمىز دا سول», دەدى مينيستر.
م.مىرزاعاليەۆتىڭ ايتۋىنشا, بىلتىر ءوندىرىس ورىندارى تابيعاتتى لاستاعانى ءۇشىن 90 ملرد تەڭگەدەي تولەگەن. ونىڭ 40 ملرد سوماسى ەلدەگى ەكولوگيالىق جاعدايدى جاقسارتۋ شارالارىنا باعىتتالدى.
