شەجىرەلى ءبىلىم ورداسى

ءبىلىم • 22 قىركۇيەك، 2020

شەجىرەلى ءبىلىم ورداسى

45 رەت كورسەتىلدى

سىر وڭىرىندەگى تاريحى تەرەڭ ءبىلىم وردالارىنىڭ ءبىرى – ي.ابدىكارىموۆ اتىنداعى قىزىلوردا اگرارلىق تەحنيكالىق جوعارى كوللەدجى. قۇرىلعانىنا 90 جىل تولىپ وتىرعان وقۋ ورنى سان مىڭداعان تۇلەك تاربيەلەپ، ءار سالانى بىلىكتى ماماندارمەن تولىقتىردى.

مۇرات جەتپىسباەۆ

سۋرەتتى تۇسىرگەن نۇربولات نۇرجاۋباي

وسى جىلى كوللەدج كۇردەلى جوندەۋدەن ءوتىپ، وقۋ ورنىنا ەسىمى بەرىلگەن مەملەكەت جانە قوعام قايراتكەرى، سوتسياليستىك ەڭبەك ەرى، سوعىس ارداگەرى ي.ابدىكارىموۆتىڭ عيمارات الدىنداعى ەسكەرتكىش ءبيۋستى قايتا جاڭعىرتىلدى. وسىعان وراي ۇيىمداستىرىلعان سالتاناتتى ءىس-شاراعا وبلىس اكىمىنىڭ ورىنباسارى ناۋرىزباي بايقاداموۆ قاتىستى. ال تاريحى 1930 جىلدان باستاۋ الاتىن وقۋ ورنى ءار داۋىردە ءتۇرلى اتاۋعا يە بولىپ، دايىندالاتىن ماماندىق اياسىن دا كەڭەيتىپ وتىرىپتى. وسى جىلدار ارالىعىندا 12 مىڭنان اسا تۇلەگى ۇشىرعان ىرگەلى وقۋ ورنىندا ماتەريالدىق-تەحنيكالىق بازا جاڭارىپ، بىلىكتى پەداگوگتەر جۇيەسى قالىپتاستى. قازاقستان رەسپۋبليكاسى مينيسترلەر كابينەتىنىڭ 1997 جىلعى 8 مامىرداعى №814 قاۋلىسىمەن وڭىردەگى اۋىل شارۋاشىلىعى، پوليتەحنيكالىق جانە تەمىر جول كوللەدجدەرىن بىرىكتىرۋ ارقىلى قىزىلوردا اگرارلىق تەحنيكالىق كوللەدجى بولىپ قۇرىلدى. ال 2003 جىلى كوللەدجگە وسى وقۋ ورنىنىڭ تانىمال تۇلەكتەرىنىڭ ءبىرى، قوعام قايراتكەرى ي.ابدىكارىموۆتىڭ ەسىمى بەرىلدى.

جاڭاقورعان اۋدانىندا تۋعان يساتاي ابدىكارىموۆ 18 جاسىندا سوعىس ساربازى اتانادى. مايداننان ورالعاننان كەيىن سوعىستان تۇرالاعان ەل تۇرمىسىن تۇزەۋ ءۇشىن ەڭبەك ەتتى. اۋدان، وبلىستىق پارتيا كوميتەتىن باسقاردى. جەتپىسىنشى جىلدار سوڭىنا قاراي قازاق كسر جوعارى كەڭەسى پرەزيديۋمىنىڭ توراعاسى بولىپ تاعايىندالادى.

قازىر تاريحى تەرەڭ وقۋ ورداسىندا ەكى مىڭعا تارتا ستۋدەنت 30 ماماندىق بويىنشا ءبىلىم الۋدا.

– ءبىلىم وشاعى 2015-2019 جىلدارعا ارنالعان يندۋستريالدى-يننوۆاتسيالىق دامۋ مەملەكەتتىك باعدارلاماسىنىڭ سۇرانىسىنا ساي ءبىلىم جانە عىلىم مينيسترلىگى مەن «كاسىپقور» حولدينگى اق انىقتاعان ەلىمىزدەگى بىلىكتى مامان دايارلايتىن ۇزدىك ون كوللەدجدىڭ قاتارىنا ەندى. وڭىرگە قاجەتتى ماماندىقتار دايارلاۋدا كوللەدجدىڭ ورنى ەرەكشە ەكەندىگىن اتاپ وتكەن ءجون. مىسالى، 2013 جىلى ى.جاقاەۆ اتىنداعى قازاق كۇرىش عىلىمي زەرتتەۋ ينستيتۋتىمەن جاسالعان كەلىسىمشارت نەگىزىندە، ايماقتا العاش رەت كوللەدجدە «اگرونوميا» ماماندىعىن ءدۋالدى وقىتۋ جۇيەسى ەنگىزىلدى. ەلباسى نۇرسۇلتان ءابىش ۇلى نازارباەۆتىڭ باستاماسىمەن جاستار جىلىندا قولعا الىنعان «جاس مامان» جوباسىن وڭىرىمىزدە جۇزەگە اسىراتىن 9 كوللەدجدىڭ قاتارىنا ەنگىزىلگەن بۇل وقۋ ورنىنىڭ ماتەريالدىق-تەحنيكالىق بازاسىن زاماناۋي قۇرال-جابدىقتارمەن قامتاماسىز ەتۋ ءۇشىن قاجەتتى قاراجات رەسپۋبليكالىق بيۋدجەتتەن ءبولىندى. جاستاردىڭ كاسىپتىك ءبىلىم الۋىنا جاسالعان وسى مۇمكىندىكتى وقۋ ورنىنىڭ باسشىلىعى يگىلىكتى ىسكە اينالدىرا بىلگەنى قۋانتادى. عاسىرعا جۋىق تاريحى بار وقۋ ورداسىنا بۇدان دا بيىك بەلەس تىلەيمىز. مەرەيتوي قارساڭىندا قايتا جابدىقتالعان وقۋ ورنىنىڭ بۇگىنگى كەلبەتىنە ساي دەمەۋشىلەر كومەگىمەن گرانيت تاسپەن قاپتالىپ، قولادان قۇيىلعان ي.ابدىكارىموۆ ەسكەرتكىشى دە جاڭارتىلىپ وتىر، – دەدى وبلىس اكىمىنىڭ ورىنباسارى.

جيىن بارىسىندا عالىم، پروفەسسور قازىباي قۇدايبەرگەنوۆ قانداي بيىك قىزمەتتە جۇرسە دە اقيقاتتان اتتاماي وتكەن ازامات يساتاي ابدىكارىموۆ تۋرالى ەستەلىك ايتسا، قىزى ءشامشيا يساتايقىزى ۇجىم باسشىلىعىنا العىسىن جەتكىزدى. مۇنان كەيىن جينالعان كوپشىلىك «جاس مامان» جوباسى بويىنشا جابدىقتالعان زەرتحانالارمەن تانىسىپ، «شەجىرەلى ءبىلىم ورداسى» اتتى سالتاناتتى كەشكە قاتىستى.

قىزىلوردا