ادەتتە, مەديتسينا قىزمەتىنىڭ ساپاسى تۋرالى ايتقاندا ءبىز ورتالىق قالالارداعى جاعدايدى عانا ساراپقا سالىپ ءجۇرمىز. ال دەنساۋلىق ساقتاۋ قىزمەتىنىڭ نەگىزگى وزەگى الىس اۋىلداردا تۇراتىن ناۋقاستاردى ساۋىقتىرۋ مەن ەمدەۋگە باعىتتالعانىن ەسكەرۋگە ءتيىسپىز. ويتكەنى ايماقتاعى جۇرتتىڭ اۋقىمدى بولىگى باس اۋىرىپ, بالتىر سىزداعاندا وبلىس ورتالىعىنداعى امبەباپ اۋرۋحانالاردى جاعالامايتىنى انىق. ياعني ەلدى مەكەندەردەگى ەمدەۋ مەكەمەلەرىنىڭ ماڭىزى باستى ورىنعا شىعادى. دەمەك العاشقى مەديتسينا كومەگىن كورسەتەتىن شاعىن ەمحانا مەن امبۋلاتوريالارعا دەگەن سۇرانىس ەل ىشىندە وتە جوعارى كۇيىندە قالىپ وتىر. ماسەلەن, الماتى وبلىسىندا 235 دارىگەرلىك امبۋلاتوريا, 104 فەلدشەرلىك-اكۋشەرلىك پۋنكتى جانە 220 مەديتسينا بەكەتى بار ەكەن. تۇرعىندارىنىڭ 80 پايىزعا جۋىعى اۋىلدى مەكەندەيتىن ايماق ءۇشىن بۇل كورسەتكىش ماسەلەنى تولىق شەشە الماي وتىر. ناقتىسى, وبلىستاعى 2 ملن جاننىڭ باسىنا شاققاندا العاشقى مەديتسينا كومەگىن كورسەتەتىن ورىنداردىڭ تاپشىلىعىن جويۋ اتقارۋشى بيلىكتىڭ ماڭىزدى جۇمىسىنىڭ ءبىرى بولىپ تۇرعانى انىق. ال بۇل باعىتتا بىرقاتار ءىس قولعا الىنعان ەكەن.
– بيىل 12 دەنساۋلىق ساقتاۋ نىسانى, ونىڭ ىشىندە 9 دارىگەرلىك امبۋلاتوريانى سالۋعا جەرگىلىكتى بيۋدجەتتەن 3 ملرد 494 ملن تەڭگە قارجى بولىنگەن. مۇنداعى 10 نىساننىڭ قۇرىلىسى جىل سوڭىنا دەيىن اياقتالۋى ءتيىس, ال ەكەۋى كەلەسى جىلعا اۋىسادى. جالپى, بيىل ەلدى مەكەندەردەگى 8 دارىگەرلىك امبۋلاتوريا پايدالانۋعا بەرىلەدى, – دەيدى وبلىستىق دەنساۋلىق ساقتاۋ باسقارماسىنىڭ باسشىسى ومىرزاق نيازبەكوۆ.
سونداي-اق «جۇمىسپەن قامتۋدىڭ جول كارتاسى» اياسىندا رەسپۋبليكالىق بيۋدجەتتەن 4 مەديتسينالىق امبۋلاتوريا مەن 1 مەديتسينا ورتالىعىنىڭ قۇرىلىسىنا 1 ملرد 621,2 ملن تەڭگە قارجى بولىنگەن. بۇل نىسانداردىڭ ءبارى بيىل پايدالانۋعا بەرىلەدى دەگەن جوسپار بار. بۇعان قوسا تاعى 4 جانە 2 دارىگەرلىك امبۋلاتوريانى, 4 فەلدشەرلىك-اكۋشەرلىك پۋنكتتى كۇردەلى جوندەۋدەن وتكىزۋ ءۇشىن جوبالىق-سمەتالىق قۇجاتتار دايىندالعان. جالپى, جىل سوڭىنا دەيىن وبلىس بويىنشا 13 دارىگەرلىك امبۋلاتوريا مەن 1 مەديتسينا بەكەتى ىسكە قوسىلماق.
وسى تىزىمدە كورسەتىلگەن امبۋلاتوريانىڭ ءبىرى جاقىندا كوكسۋ اۋدانىندا اشىلعان بولاتىن. كوكسۋ تەمىر جول بەكەتىندە اشىلعان دارىگەرلىك امبۋلاتوريا زاماناۋي تالاپقا تولىقتاي ساي ەكەن. نىساندا بالالار مەن جۇكتى ايەلدەر, كۇندىزگى ەم قابىلدايتىن ءبولىم جانە زەرتحانالىق ورتالىق جۇمىس ىستەيدى. قاجەتتى مەديتسينالىق قۇرالدارمەن جابدىقتالىپ, جيھازدارمەن تولىقتىرىلعان جاڭا مەكەمە «وڭىرلەردى دامىتۋ» باعدارلاماسى اياسىندا ىسكە قوسىلىپتى. قۇرىلىسقا وبلىستىق بيۋدجەتتەن 341 ملن تەڭگە بولىنگەن. كوكسۋلىقتار بۇعان دەيىن تار بولمەلى, توزىعى جەتكەن امبۋلاتورياعا بارىپ جۇرگەن ەدى. ەندى اۋىل دارىگەرلەرى كۇنىنە 30 ادامعا دەيىن قابىلداپ, مەديتسينالىق كومەك كورسەتە الادى.
– كوكسۋ تەمىر جول بەكەتى اۋدان ورتالىعىنان 30 شاقىرىم قاشىقتا ورنالاسقان. سوندىقتان عيمارات پەن مەديتسينالىق قۇرال-جابدىقتىڭ مۇمكىندىگى جوق بولعاندىقتان العاشقى دارىگەرلىك كومەك كورسەتۋ ماسەلەسى تۋىنداپ كەلگەن ەدى. ناۋقاستى تاسىمالداۋ كەزىندە قينالىپ, ءارى تاۋەكەلگە تولى ساتتەر دە بولىپ تۇردى. ال جاڭا امبۋلاتوريانىڭ اشىلۋىمەن بۇل قيىندىقتى ەڭسەرەمىز دەپ ويلايمىن. ويتكەنى جاڭا نىساندا جەدەل كومەك كورسەتۋگە, ناۋقاستاردى قابىلداۋعا, ەم جۇرگىزۋگە تولىق جاعداي جاسالعان. قۇرىلعىلار دا جاڭادان قويىلدى. مەكەمەدە جالپى 12 ادام جۇمىس ىستەيدى. ونىڭ ىشىندە 1 دارىگەر جانە 8 ورتا بۋىن قىزمەتكەرى بار. جۇمىسقا جاس مامانداردى قابىلداۋعا دا مۇمكىندىك تۋدى, – دەيدى كوكسۋ بەكەتى دارىگەرلىك امبۋلاتورياسى ديرەكتورىنىڭ ورىنباسارى ميرا قاناەۆا.
ال ايماقتا بىلتىر 4 دارىگەرلىك امبۋلاتوريا پايدالانۋعا بەرىلگەن ەدى. سونىڭ ءبىرى ۇيعىر اۋدانىنداعى قالجات اۋىلىنان اشىلعان مەديتسينالىق نىسان ەدى. ءبىر مەزەتتە 25 ادامعا قىزمەت كورسەتەتىن دارىگەرلىك امبۋلاتوريا قۇرىلىسىنا وبلىستىق بيۋدجەتتەن 170 ملن 207 مىڭ تەڭگە بولىنگەن. قازىر شالعاي اۋىلداعى اۋىرىپ, سىرقاعان تۇرعىندار ءۇشىن بۇل مەكەمە وراسان كومەك كورسەتىپ وتىر.
– قالجات اۋىلىندا 2424 ادام تۇرادى. بۇعان دەيىن ەسكى عيماراتتا جۇمىس ىستەپ كەلدىك. جاڭا امبۋلاتوريا قىزمەت ساپاسىن جاقسارتتى. قازىر مۇندا 12 مامان, ونىڭ ىشىندە 1 دارىگەر, 8 مەديتسينالىق قىزمەتكەر بار. جابدىقتالۋى جاقسى. دارىگەرگە دەيىنگى قابىلداۋ, تەراپەۆت, بالالار دارىگەرىنىڭ جۇمىس ىستەۋىنە قولايلى جاعداي جاسالعان. ەگۋ, ەمشارا بولمەسى مەن حيرۋرگيا كابينەتى دە ناۋقاستاردى قاراۋعا, العاشقى مەديتسينالىق جاردەم كورسەتۋگە ىڭعايلى ەتىپ جاسالعان, – دەيدى اۋىلداعى امبۋلاتوريانىڭ اعا دارىگەرى ساۋتاحۋن ماسۋتوۆ.
ايتپاقشى, دەنساۋلىق ساقتاۋ سالاسىن تسيفرلاندىرۋ بويىنشا شالعاي ەلدى مەكەندەردەگى مەديتسينا مەكەمەلەرىن عالامتورمەن قامتۋ 84 پايىزدىڭ شاماسىنا جەتىپ قالىپتى. ال وبلىستىق, قالالىق جانە اۋداندىق دەڭگەيدەگى اۋرۋحانالاردىڭ ينتەرنەتكە قوسىلۋى 100 پايىزدىق مەجەدەن كورىنگەن. جالپى, مەديتسينالىق قۇجاتتامانى قاعازسىز جۇرگىزۋگە 53 مەديتسينالىق مەكەمە قوسىلىپ, ەلەكتروندى فورماتقا 224 نىسان كوشىرىلگەن ەكەن. ونىڭ ىشىندە تۇرعىنداردىڭ 98,1 پايىزىندا ەلەكتروندى دەنساۋلىق پاسپورتى بار. ياعني 1 997 750 ادامنىڭ ناۋقاس تاريحىن تسيفرلى جۇيە ارقىلى زەردەلەۋگە مۇمكىندىك بار.
الماتى وبلىسى
