جولدار ۇزاق: ارامىز مىڭ شاقىرىم.
سامولەت ۇشسا باياۋ...
پوەزدار جۇرسە اقىرىن...
تەڭىز كەشىپ, تاۋ اسىپ جەتسەڭشى ەندى!
دەمەسەڭ:
شاعىلسا ايىم, سىنسا كۇنىم.
سەنسىز جۇرگەن جولداردىڭ ءبارى بەكەر,
ءبىزدى جولىقتىرار ما ءتاڭىر-اكەم؟
قاراشامىز بيىلعى شىلدە بولدى,
كەرى كەتەر دۇنيە, كەرى كەتەر...
كوشەلەر دە بوس قالدى كولىكتەرسىز,
ايىرىلدى باياعى كورىكتەن كۇز.
بۇل جاقتا جەر – قۇپ-قۇرعاق.
بۇل جاقتا اۋا – قاپىرىق.
شالشىق سۋعا اياعىن مالىپ وتىر
ەرىككەن قىز.
كوز جانارىڭ تالدى ما اي كۇزەتىپ؟
ايعىز بەتىن اقتادىم قايعى جەتىپ.
سەنىمەنەن تانىسقان قاي كۇز ەدى؟
سەنى مەنەن ايىرعان قاي كۇز ەدى؟
ەكەۋمىزدى سىنايتىن سىقىلدى كۇز,
جالعىزدىققا جابىرقاۋ جۇتىلدىم ءجۇز.
باتىس جاققا كەتىپ ەڭ...
جول قارايلاپ,
ءبىز الماتى ەكەۋمىز كۇتىپ ءجۇرمىز...
قاشان كەلەسىڭ؟
اسەل كارىباي
جازىعى قانشا؟..
وكىنىشتەردەن قاشقىم كەلەدى,
وشىرە كورمە, كەۋدەمدەگى وتتى – سۋىق جەل!
مۇمكىن ول سوڭعى جارىعىم...
مەن بولىپ ەسىپ كورگەندە جوقسىڭ ءالى كۇن.
ۇمىتشى مەنىڭ اقىماقتىعىم,
السىزدىگىم مەن وكپەمدى,
اعىزىپ جاسىن اقىن اقتىعىن
اق قاعازدارعا توككەندەي.
جازىعى قانشا,
سۇلۋلىعىمدى جاتتاماس سەنىڭ جانارىڭ.
سامالمەن بىرگە سىر ۇعىنۋدى
ساعىنباي ما الدە قالاۋىڭ!؟
وشىرە كورمە, وتىنەم ونى,
ەڭ جارىق جەرىم – جۇرەگىم!
اق قاعازداردىڭ بەتىنەن ونىڭ,
ساۋلەسىن كورىپ جۇرەيىن.
قارايتا كورمە,
جىلاي المايتىن,
ەشكىمنەن جارىق سۇراي المايتىن,
سورلىمىن.
تىلەكتى جاسقا اينالدىراتىن,
جۇرەكتى تاسقا اينالدىراتىن,
وكىنىشتەردەن قاشقىم كەلەدى,
ءدال بۇگىن!
نۇرساۋلە تولقىن
قىزعالداق قۇربىما
عاجايىپ ەكەنسىز گوللاندقا بەرگىسىز!
ءسىز كىمسىز؟!
...اسپان با؟ جوق, الدە جەرمىسىز؟!
..مەنىڭ دە عۇمىرىم – قىزعالداق!
تەك ونى...
قاي كەزدە ۇزەرى بەلگىسىز...
سۇلۋلىق بولسا عوي ماڭگى جاس!
ماڭگى ولمەس! قازاسىز!
ءسىز نەتكەن سۇلۋسىز! تازاسىز!
...عۇمىرلىق سۇلۋلىق تەك قانا ولەڭدە!
بالكىم, ءسىز دە ولەڭ جازاسىز؟!
مۇمكىن ءسىز ۇلى اقىن شىعارسىز؟!
پەندەلىكتەن بيىك تۇراتىن شىعارسىز؟!
بايقاتپاي وسىناۋ بار عالامدى
مەيىرىمدى ەرىنىڭىزبەن ءسۇيىپ تۇراتىن شىعارسىز؟!
ءسىز كىمسىز؟
جارالىپ اكەسىز, شەشەسىز,
نەلىكتەن كەلتە ءومىر كەشەسىز؟!
پلانەتا دەلىنگەن مەيرامxاناعا قوش كەلدىڭىز!
نە ىشەسىز؟!
..شاتتىق پا؟! جوق, الدە, مۇڭ, بالكىم؟
داياشى بار ما ەكەن؟!
تىڭدار كىم؟!
ەستىلىك ءىشىڭىز ەسەپسىز,
ومىردە وزىنشە جىندى اركىم...
ۋا, قۇربىم!
گوللاندتان ماڭگى جوعالاسىز دا,
اتا-جۇرتىڭىزعا ورالاسىز با؟!
جالقىننان جالقىن كۇن كەشتىم مەن دە,
جان قۇربىم بولا الاسىز با؟!
قارلىعاش قاباي
