الدىمەن ايماق باسشىسى ايتەك سۋ تورابىندا بولدى. وسىدان 16 جىل بۇرىن «سىرداريا وزەنىنىڭ ارناسىن رەتتەۋ جانە ارال تەڭىزىنىڭ سولتۇستىك بولىگىن ساقتاۋ» جوباسى اياسىندا سالىنىپ, قولدانىسقا بەرىلگەن قۇرىلعى وزەن اعىسىن رەتتەپ, سىرداريا جانە جالاعاش اۋداندارىنداعى ەگىندىك القاپتاردى سۋمەن قامتاماسىز ەتەدى. بىلتىر سەكۋندىنا 750 تەكشە مەتر سۋ وتكىزەتىن قۇرىلعىنىڭ بەتون دۋالدارى زاقىمدالىپ, تەحنوگەندىك سيپاتتاعى توتەنشە جاعداي جاريالانعان ەدى. وسىعان بايلانىستى وبلىستىق بيۋدجەتتەن 38 ملن تەڭگەدەن استام قارجى ءبولىنىپ, دۋالدار 13 مىڭ توننا تاسپەن بەكىتىلدى. بىراق بۇل ۋاقىتشا شارا ەدى. ماماندار سول تۇستا قوس اۋداننىڭ قاجەتىنە جاراپ تۇرعان سۋ توسپاسى اپاتقا ۇشىراسا, مىڭداعان گەكتار قاڭسىپ قالىپ, 31 مىڭ ادام تۇراتىن 7 ەلدى مەكەندى سۋ باسۋى مۇمكىن ەكەندىگىن باسا ايتقان. وسى جىلى وبلىس باسشىسى گۇلشارا ابدىقالىقوۆا ماسەلەنى ۇكىمەت الدىندا كوتەرىپ, سۋ تورابىن تولىق قالپىنا كەلتىرۋگە رەسپۋبليكالىق بيۋدجەتتەن 700 ملن تەڭگە ءبولىندى.
– ەندىگى ماقسات وسى قاراجاتتى دۇرىس يگەرىپ, سۋ تورابىن قالىپقا كەلتىرۋ جۇمىستارىن ساپالى ىستەۋ. بۇل اۋدان باسشىسىنىڭ تۇراقتى نازارىندا بولۋى ءتيىس, – دەدى گۇلشارا ابدىقالىقوۆا.
وسى اۋدانداعى اقجارما اۋىلىندا «اۋىل – ەل بەسىگى» باعدارلاماسى اياسىندا ايتارلىقتاي جۇمىس جاسالىپ جاتىر. مەملەكەتتىك باعدارلاما شەڭبەرىندە اۋىلداعى جالپى ۇزىندىعى 13,6 شاقىرىم بولاتىن 9 كوشەنى ورتاشا جوندەۋگە 614 ملن تەڭگە قارالىپتى. مۇنىمەن قوسا, اۋىلداعى 4 كوشەنى جارىقتاندىرۋعا, 3 كوشەگە تەمىر بەتوندى لوتوك ورناتۋعا قارجى بولىنگەن. ايماق باسشىسى اۋدان اكىمى مەن مەردىگەر كومپانيا جەتەكشىسىنە جوندەۋ جۇمىستارىن تەزدەتىپ اياقتاۋدى جانە ساپالى ورىنداۋدى تاپسىردى.
بۇل اۋىلدا ەكى ءىرى شارۋاشىلىق بار. ەكى قۇرىلىم دا ەلدى مەكەندەگى الەۋمەتتىك ماسەلەلەردىڭ وڭىنان شەشىلۋىنە, اۋىلدى گۇلدەندىرۋگە ۇلەس قوسىپ كەلەدى. مىسالى, بىلتىرعى جاستار جىلىنا وراي «اقجارما 2» فەرمەرلىك قوجالىعى جاستارعا جالاقى تولەپ, ساياباق سالۋعا جۇمىلدىرعان. قازىر اۋىل ورتاسىندا جايقالىپ تۇرعان جاستار ساياباعى وسى ەڭبەكتىڭ ناتيجەسى.
قوجالىق «قاراپايىم زاتتار ەكونوميكاسى» باعدارلاماسى بويىنشا «اگرارلىق نەسيە كورپوراتسياسى» اكتسيونەرلىك قوعامىنان 56 ملن تەڭگەدەن استام نەسيە الىپتى. وعان چەحيادان ارنايى كۇرىش تازالاعىش قۇرىلعى اكەلىپ, ىسكە قوستى. قازىر قىرماندا بۇرىنعىداي الا شاڭعا كومىلىپ, جانتالاسىپ جاتقان جۇرت جوق. شارۋانىڭ بەينەتىن جەڭىلدەتكەن قۇرىلعى ءوز تيىمدىلىگىن كورسەتىپ تۇر. اپپارات ساعاتىنا 50 توننا كۇرىش تازارتادى. شارۋاشىلىقتى ءارتاراپتاندىرۋ ارقىلى 2023 جىلعا دەيىن كۇرىش اقتايتىن زاۋىت, پاستەرلەنگەن ءسۇت زاۋىتى, جىلىجاي جانە كوكونىس قويماسىن سالۋ جۇمىستارى جوسپارلانىپتى. ايماق باسشىسىن اتقارىپ جاتقان جۇمىستارمەن تانىستىرعان شارۋاشىلىق جەتەكشىسى مارات بيسەنوۆ بيىل 2000 گەكتارعا كۇرىش ەگىپ, قازىر ونىڭ تەڭ جارتىسى جينالعانىن ايتىپ ءوتتى. ءونىم گەكتارىنا 60 تسەنتنەردەن اينالۋدا. فەرمەرلىك قوجالىق 2017 جىلدان بەرى ءارتاراپتاندىرۋ باعىتىندا 350 گەكتارعا الما اعاشىن ەككەن. وسى جىلى باقتان العاشقى ءونىم الىندى.
ساپار اياسىندا وبلىس باسشىسى «شاعان جەر» جاۋاپكەرشىلىگى شەكتەۋلى سەرىكتەستىگىندەگى №1 وندىرىستىك بريگاداسىنىڭ ەگىس القابىندا بولدى. سەرىكتەستىكتە 350 ادام جۇمىسپەن قامتىلعان.
ال ناعي ءىلياسوۆ اۋىلىنداعى «ماعجان ي ك» سەرىكتەستىگىنىڭ قىرمانىندا ساعاتىنا 5 توننا كۇرىش تازالانىپ, ەكى اۋىسىمدا 40 ادام جۇمىس ىستەيدى. بيىل 5 مىڭ گەكتاردان استام القاپقا كۇرىش سەپكەن ديقاندار قازىر جارتىسىنا جۋىعىنا وراق سالعان. اۋىلدىڭ الەۋمەتتىك ماسەلەسىن شەشۋگە سەرگەك قارايتىن ازاماتتار شارۋاشىلىقتاعى جۇمىسشىلاردىڭ جاعدايىنا دا قارايلاسىپ تۇرادى.
– قازىرگى باستى ماسەلەلەر ەگىن جيناۋ ناۋقانى مەن قىسقى مەزگىلگە دايىندىق بولىپ تۇر. بۇل جۇمىستار ۇدايى باقىلاۋدا تۇرادى. جالپى, اۋداندا كۇرىش 30 پايىز جينالعان. ناۋقان ۋاقتىلى بىتەدى دەپ جوسپارلانۋدا. ال اۋداندىق اۋرۋحانانىڭ جىلۋ جۇيەسىندە بىرقاتار ماسەلە بولعانى راس. بۇگىندە ونى جوندەۋ جۇمىستارى جۇرگىزىلۋدە. قازاندىقتى اۋىستىرىپ, جىلۋ قۇبىرلارىن جاڭارتۋ 10 قازانعا دەيىن اياقتالۋى ءتيىس, – دەدى وبلىس اكىمى ساپار سوڭىندا باق وكىلدەرىنە بەرگەن سۇحباتىندا.
قىزىلوردا
