رۋحانيات • 21 قىركۇيەك، 2020

قاپشاعايدا قادىر مىرزا ءالىنىڭ قۇرمەتىنە ەسكەرتكىش ورناتىلدى

56 رەت كورسەتىلدى

قادىر مىرزا ءالىنىڭ تۋعانىنا 85 جىل: اقىننىڭ قۇرمەتىنە قاپشاعاي قالاسىندا بيۋست ورناتىلدى، دەپ حابارلايدى Egemen.kz Almaty.tv تەلەارناسىنا سىلتەمە جاساپ.

قازاقتىڭ ءبىرتۋار اقىنى، حالىق جازۋشىسى قادىر مىرزا ءالىنىڭ تۋعانىنا بيىل 85 جىل. وسىعان وراي اقىننىڭ قۇرمەتىنە قاپشاعاي قالاسىندا بيۋست ورناتىلىپ، "قازاقتىڭ قادىرى" كىتاپتىڭ تۇساۋكەسەرى ءوتتى.

 اقىن ءمۇسىنى قولادان قۇيىلعان. ەسكەرتكىشتىڭ قاپشاعايدا اشىلۋى تەگىن ەمەس، ويتكەنى ءدال وسى جەر اقىن قادىر مىرزا ءالىنىڭ تۋىپ، وسكەن جەرى اق جايىقتى ەسكە سالادى. ءبيۋستىڭ اشىلۋىنا اقىننىڭ جاقىندارى، ءىزباسارلارى مەن زيالى قاۋىم وكىلدەرى قاتىستى. شارانى قادىر مىرزا ءالى اتىنداعى قوعامدىق قورى ۇيىمداستىرعان.

"دەمالۋعا كەلگەن ادامدار تەك قانا سۋعا شومىلىپ كەتۋ ءۇشىن ەمەس، قازاقتىڭ مادەنيەتىمەن سۋسىنداۋعا، ادەبيەتىمەن جاقىنىراق تانىسۋعا وسى دەمالىس ورنى ۇلكەن جاعداي جاساپ تۇر عوي دەپ ويلايمىز. بۇگىنگى ءىس-شارا سونىڭ العاشقى باستاماسى دەپ ەسەپتەيمىن"، دەدى قازاقستان جازۋشىلار وداعى باسقارما توراعاسىنىڭ ورىنباسارى، قادىر مىرزا ءالى اتىنداعى قوعامدىق قور كەڭەسىنىڭ توراعاسى مەرەكە قۇلكەنوۆ.

اقىن كوزى تىرىسىندە ءوزىنىڭ 70 جىلدىق مەرەيتويىندا "ماعان تۇك تە كەرەگى جوق، سەنسەڭىز" اتتى ولەڭىن وقىپ بەرەدى. سول ءساتى فوتوسۋرەتكە ءساتتى ءتۇسىپ قالعان ەكەن. ءمۇسىنشى اقىن بەينەسىن سول سۋرەتكە قاراپ جاساسا كەرەك.

ء"بيۋستتى جاساۋدا مەن ءۇشىن اقىننىڭ ءور مىنەزىن، كوزقاراسىن، حالىقتىڭ ادامى بولعانىن دۇرىس جەتكىزە ءبىلۋ كەرەك بولدى. ونىڭ ەڭسەلى بەينەسىن، ولەڭ وقىپ تۇرعان ءساتىن الىپ شىعۋعا كوپ كوڭىل ءبولدىم. ءمۇسىن حالىق كوڭىلىنەن شىعادى دەگەن ۇمىتتەمىن"، دەدى ءمۇسىن اۆتورى تيمۋر ەرمۇحامەتوۆ.

"جالپى اعالارىڭ سكۋلپتۋراعا ءوزى كەلىپ تۇرعان ادام. ەشقانداي قيىندىقسىز جاساۋعا بولادى. بىلايشا ايتقاندا "تيپاج". ماعان ۇنادى. اۋەلدە دايىن بولماي تۇرعاندا ەسكيزىن ماعان كورسەتكەن. ەڭ دايىن بولعانداعىسى وسى، وزدەرىڭىز كورىپ تۇرسىزدار. وتە كەرەمەت، كەلىستى، ادەمى شىققان"، دەدى قادىر مىرزا ءالىنىڭ جارى سالتانات مىرزاليەۆا.

بۇدان بولەك اقىننىڭ شىعارماشىلىعى تۋرالى شاعىن كىتاپ كورمە اشىلىپ، دەمالىس ايماعىنا شىرشالار ەگىلدى. قادىر مىرزا ءالي 50-دەن استام پوەزيالىق جيناقتاردىڭ، ادەبي-سىني جانە بالالار كىتاپتارىنىڭ اۆتورى. قازاق وقىرماندارىن الەم حالىقتارىنىڭ جۇمباقتارىمەن تانىستىرعان اۋدارماشى. ونىڭ ولشەۋسىز ەڭبەگى كەلەشەك ەنشىسىنە ماڭگى مۇرا بولىپ قالارى انىق.

سوڭعى جاڭالىقتار

تسيرك - الەم نازارىندا

قازاقستان • كەشە

ۇقساس جاڭالىقتار