ايماقتار • 21 قىركۇيەك، 2020

الماتى حقو-لارىنان جۇرت قۋانىپ قايتادى

34 رەت كورسەتىلدى

ادامداردىڭ كوپشىلىگى العاش جەكە كۋالىگىن، جۇرگىزۋشى كۋالىگىن نەمەسە سابيلەرىنىڭ العاشقى قۇجاتتارىن العان كەزدەرىن ەشقاشان ۇمىتپايدى. ال، ولاردىڭ قۋانىشتى ساتتەرىنىڭ كۋاسى – حالىققا قىزمەت كورسەتۋ ورتالىقتارى. وندا كۇن سايىن قازاقستان رەسپۋبليكاسىنىڭ ازاماتى ءوز تولقۇجاتىن الىپ، العاشقى جۇرگىزۋشى كۋالىگىن راسىمدەپ، جاڭا تۋعان ءسابيىنىڭ كۋالىگىنە ءوتىنىش بەرىپ جاتادى. وسىنداي ساتتەگى قۋانىشتى ءبولىسىپ، جان جىلۋىن سىيلاۋ ءۇشىن «ازاماتتارعا ارنالعان ۇكىمەت» جۇمىستارىنا جاڭا ءۇردىس ەنگىزگەنگە ۇقسايدى. ومىرىندەگى ماڭىزدى جايتتارمەن بايلانىستى قۇجاتتارىن راسىمدەۋگە كەلگەن ءار تۇرعىن بۇل جەردەن كوتەرىڭكى كوڭىل كۇيمەن شىعىپ، سىي-سياپاتتارعا يە بولىپ جاتىر، دەپ حابارلايدى Egemen.kz

اۋەزوۆ اۋداندىق حقو بولىمىنە كەلگەن بەلگىلى ءانشى اسحات تارعىن: "بۇگىن ۇلىمىز ەكەۋمىز الماتى قالاسى اۋەزوۆ اۋدانىنداعى حالىققا قىزمەت كورسەتۋ ورتالىعىنا باردىق. جاقىندا دۇنيەگە كەلگەن قىزىم حاديانىڭ تۋ تۋرالى كۋالىگى دايىن بولعان ەكەن. سونى ورتالىق قىزمەتكەرى تابىستادى. بىزگە كۋالىكپەن قاتار قوشامەتپەن قۇرمەت كورسەتىلدى. سىيلىق بەردى. تاڭەرتەڭ ەرتە بارساڭىز، ءسىز دە الاسىز. ۇلىما چۋپا-چۋپس، شوكولاد بەردى. مەن ۇنەمى وسى ورتالىققا بارامىن"، دەيدى.

ال الماتى قالاسىنداعى الاتاۋ اۋداندىق حقو بولىمىنە ەگىز بالالارىنا جاردەماقى راسىمدەۋگە كەلگەن ارايلىم بۇرىن مۇنداي قۇتتىقتاۋلاردىڭ بولماعانىن ايتىپ: "بالالارىمىزدىڭ ءبىر جاسقا دەيىنگى كۇتىمىنە ارنالعان جاردەماقىعا ءوتىنىش بەردىك. ەندى عانا "كۇمىس القاعا" ءۇمىتتى انا بولسام دا، بۇرىن بۇلاي ءىلتيپات كورسەتىلمەيتىن"، دەيدى.

المالى-2 فرونت-وفيسىنە كەلگەن نيگەريا ازاماتتارى "سالىق تولەۋشىلەردى تىركەۋ" مەملەكەتتىك قىزمەتىن الدى. مەملەكەتتىك ءتىلدى تۇسىنبەسە دە، ءبولىم ماماندارىنىڭ جوعارعى ساپاداعى قىزمەتى مەن قۇرمەتتەرى ءۇشىن العىس ءبىلدىردى.

ال اۋەزوۆ بولىمىنە زەينەت جاسىن راسىمدەۋگە كەلگەن ەركىنبەك قويشىباەۆ قازاقستاندا مەملەكەتتىك قىزمەتتەردى ۇسىنۋ الدەقايدا جوعارى دەڭگەيدە ەكەنىن ايتادى. "مەن ماسكەۋدە جۇمىس ىستەيمىن. زەينەتكەرلىككە قۇجاتتار راسىمدەۋ ماقساتىندا كەلگەن ەدىم. رەسەيمەن سالىستىرعاندا قىزمەت كورسەتۋ جاقسى جولعا قويىلعان ەكەن. ءبولىم قىزمەتكەرلەرىنە راحمەت"، دەيدى وتانداسىمىز.

"ازاماتتارعا ارنالعان ۇكىمەتتىڭ» الماتىداعى المالى فرونت-وفيسىنەن قىزمەت الدىم. الدىن- الا كەزەكتى برونداپ كەلۋ، پاندەميا كەزىندە ساقتىق شارالارىن ساقتاۋ، ساپالى قىزمەت كورسەتۋ – ءبارى-ءبارى جاقسى جولعا قويىلىپتى.  ماماندار سىپايى ءارى ساۋاتتى قىزمەت كورسەتۋدە...سونىمەن قاتار، قۋانىش سىيلاۋدى دا ۇمىتپايدى ەكەن. راحمەت سىزدەرگە! ەڭبەكتەرىڭىز جەمىستى بولسىن!"، دەيدى وليمپيادا چەمپيونى مايا مانەزا.

الماتى قالاسىنىڭ مەدەۋ اۋدانىنىڭ تۇرعىنى زەيناب پەن ارسلان گازيەۆتەر قىزى لەيلانىڭ  شەتەلگە شىعۋعا رۇقسات بەرەتىن پاسپورتىن الىپ كەتۋگە كەلىپ، قۇتتىقتاۋلارعا يە بولعانىنا ريزا.

"لەيلا حقو-عا ءبىرىنشى رەت كەلىپ ەدى. وسىنداعى اعا-اپالارىنان قۇرمەت كورىپ، سىيلىق الىپ، قۋانىشى قوينىنا سىيماي تۇر. قىزىمىزدىڭ رياسىز قۋانىشىنا ءبىزدىڭ دە جانىمىز جادىرادى"، دەيدى اناسى.

ازاماتتارعا ارنالعان ۇكىمەتتەگىلەر "باقىتتى كليەنت" تۇجىرىمداماسىن قولعا الىپ، ءار كەلۋشىگە ساپالى قىزمەت قانا كورسەتىپ قويماي، وسىلايشا قىزمەت الۋشىنىڭ كوڭىلىن دە اۋلاۋعا تىرىساتىنىن ايتادى.

"حالىققا قىزمەت كورسەتۋ ورتالىقتارى - ادامداردىڭ ءومىرىنىڭ كەيبىر كەرەمەت ساتتەرىنىڭ كۋاسى بولىپ جاتادى. ءدال وسى ساتتەر جاعىمدى ەستەلىك بولىپ قالۋ ءۇشىن ءبىز زەينەتاقى راسىمدەۋگە، بالاسىنىڭ تۋ كۋالىگىن الۋعا، 16-عا تولىپ العاشقى ەرەسەك قۇجاتىن الۋعا كەلگەندەردى ەرەكشە قۇتتىقتاپ، ماماندارىمىز ورنىنان تۇرىپ، قول شاپالاقتايدى. ولاردىڭ قۋانىشىنا قۋانىش قوسىپ، سىيلىقتار جاسايدى. قىزمەت الۋشىنىڭ ريزاشىلىعى ءبىز ءۇشىن قاشاندا قىمبات. وسىنداي كورىنىستەر قىزمەتكەرلەرگە دە قۋات سىيلاپ، حقو ىشىندە ەرەكشە كوڭىل كۇي ورنايدى"، دەيدى "ازاماتتارعا ارنالعان ۇكىمەت" مەملەكەتتىك كورپوراتسياسى الماتى قالاسى فيليالىنىڭ ديرەكتورى دانيار قىرىقباەۆ.

ەنگىزىلگەن ءداستۇر جەتىستىككە جەتە مە، جوق پا، ايتۋعا ەرتە. دەگەنمەن، حقو-لار ءبىرىنشى بولىپ قازاقستاننىڭ مەملەكەتتىك ورگاندارىنا ترەندتەردى ۇلگى ەتىپ باستاعانىن ەسكە سالا كەتكەن ءجون. ولار ءبىرىنشى بولىپ كەدەرگىسىز قىزمەت كورسەتۋدى، ءبىر تەرەزە جانە ءبىر مالىمدەمە قاعيداتىن، "پرواكتيۆتى" قىزمەتتەر ۇعىمىن ەنگىزدى جانە العاشقىلاردىڭ ءبىرى بولىپ ازاماتتىڭ بيومەتريالىق دەرەكتەرىن قولدانا باستادى.

سوڭعى جاڭالىقتار

ۆيرۋس مۋتاتسياعا ۇشىرادى

كوروناۆيرۋس • كەشە

ۇقساس جاڭالىقتار