– مەملەكەت باسشىسى قاسىم-جومارت توقاەۆ بيىلعى قازاقستان حالقىنا جولداۋىندا ەلىمىزدىڭ ەكونوميكاسىن وركەندەتۋ ماسەلەسىنە ەرەكشە ءمان بەرىپ وتىر. سونىڭ ىشىندە ەڭ ماڭىزدىسى – ەكونوميكانى قازىرگى جاعداي تالابىنا ساي دامىتۋ. بۇل ورايدا شاعىن جانە ورتا بيزنەستەن باستاپ, ءوندىرىس ساياساتى ەكونوميكاسىن دامىتۋدىڭ نەگىزگى 10 باعىتى بار. ونىڭ بارلىعى جاڭا ەكونوميكالىق باعىت بولىپ ەسەپتەلەدى. سونىمەن قاتار ءبىز مينيسترلىكتە باسقارۋشىلىق كەڭەسىن قۇردىق. ونىڭ قۇرامىنا بىزدەن 3 وكىل جانە ساراپشىلار قوعامىنان 3 وكىل ەندى. مۇنداعى ماقسات – بىزدە جۇرگىزىلىپ جاتقان رەفورمالار تۋرالى ەسەپ بەرۋ جانە كەرى بايلانىس ورناتۋ. بۇل رەتتە ءبىز ساراپشىلار كەڭەسىنە پرەزيدەنتتىك جاستار كادرلىق رەزەرۆىنىڭ مۇشەلەرىن دە تارتۋدى كوزدەپ وتىرمىز, – دەدى ر.دالەنوۆ.
ۆەدومستۆو باسشىسى مەملەكەتتىك ورگانداردىڭ نەگىزگى قىزمەتىنە توقتالىپ, پرەزيدەنت جولداۋىن ىسكە اسىرۋ باعىتىنداعى باسىم مىندەتتەردى اتادى. سونداي-اق مينيستر اتالعان ۆەدومستۆو قۇرىلىمىن جاقسارتۋ ماقساتىندا اتقارىلىپ جاتقان جۇمىستاردى دا اتاپ ءوتتى. ونىڭ ايتۋىنشا, الداعى ۋاقىتتا كورپوراتيۆتىك باسقارۋدى جەتىلدىرۋ جانە كۆازيمەملەكەتتىك سەكتوردى رەفورمالاۋ بويىنشا بىرقاتار ۇسىنىس ازىرلەنەدى. ستراتەگيالىق ينۆەستيتسيالىق كەلىسىم جاساۋدىڭ جاڭا تەتىكتەرىن ەنگىزىپ, ينۆەستيتسيالىق جوبالاردى ىسكە اسىرۋدا قارجىلاي جانە قارجىسىز قولداۋ شارالارىنىڭ بىرىڭعاي پاكەتىن ۇسىنۋ كوزدەلۋدە. بۇل رەتتە مينيستر اتالعان جۇمىستاردى قولعا الۋ كەزىندە زاڭنامالىق تالاپتاردىڭ ماڭىزدىلىعىنا ءمان بەرۋ قاجەت ەكەنىن جەتكىزدى.
الداعى ۋاقىتتا پاندەميادان زارداپ شەككەن شاعىن جانە ورتا بيزنەستى قولداۋ شارالارى ءالى دە جالعاسپاق. «بيزنەستىڭ جول كارتاسى-2025» مەملەكەتتىك باعدارلاماسىنىڭ جاڭا باعىتى اياسىندا شاعىن جانە ورتا بيزنەسكە بەرىلگەن نەسيەلەر بويىنشا سىياقى مولشەرلەمەسى سۋبسيديالاناتىن بولادى.
كەلەسى اۋديتوريادا پرەزيدەنتتىك جاستار كادرلىق رەزەرۆى مۇشەلەرىمەن كەزدەسكەن ءبىلىم جانە عىلىم ءمينيسترى اسحات ايماعامبەتوۆ ەڭ الدىمەن وسى سالادا جاسالىپ جاتقان وزگەرىستەرگە توقتالدى.
– پرەزيدەنتتىك جاستار كادرلىق رەزەرۆىندە كوپتەگەن تالانتتى جاستار بارىن بىلەمىز. ءتىپتى ولاردىڭ جەتەۋى وسى ءبىلىم سالاسىندا ەڭبەك ەتىپ جاتىر. بىرقاتار جەتىستىكتەرى دە بار. ءبىز سوعان قۋانامىز. ۆەدومستۆوعا قىزمەتكە كەلگەن كادرلىق رەزەرۆتىڭ مۇشەلەرى وزىندىك وڭ وزگەرىستەرىن قوسا الا كەلۋدە. سونىڭ ارقاسىندا ءبىلىم سالاسىنا قاتىستى بىرنەشە نورماتيۆتىك اكتىلەرگە وزگەرىستەر مەن تولىقتىرۋلار ەنگىزىپ ۇلگەردىك. مۇنداي جۇمىستار ۆەدومستۆودا كوپتەپ اتقارىلۋدا. ماسەلەن, مەملەكەت باسشىسى قاسىم-جومارت توقاەۆتىڭ تاپسىرماسى بويىنشا ەلىمىزدى بالاباقشامەن تولىقتاي قامتاماسىز ەتۋدى جۇيەلى جولعا قويدىق. بالاباقشالاردىڭ سانىنا عانا ەمەس, ساپاسىنا دا ءجىتى كوڭىل بولىنۋدە. ەڭ باستىسى, بالاسىن قاي بالاباقشاعا بەرەتىنى تۋرالى شەشىمدى اتا-انا ءوزى قابىلداي الادى, – دەيدى ا.ايماعام-
بەتوۆ.
ءمينيستردىڭ ايتۋىنشا, پاندەميا جاعدايىندا ورتا ءبىلىمنىڭ ساپاسىن كەمىتىپ الماۋ دا ماڭىزدى ماسەلە بولىپ وتىر. قاشىقتان وقىتۋ ءبىلىم ساپاسىنا كەدەرگى كەلتىرمەۋى كەرەك. كەرىسىنشە, مەملەكەت باسشىسى قاشىقتان وقىتۋدى بىردەيلەندىرۋدى, جەتىلدىرۋدى تاپسىرعان بولاتىن. كۇن تارتىبىندە تۇرعان كۇردەلى ماسەلە – وسى.
– كەلەسى ماسەلە – جوعارى ءبىلىم بەرۋ ءىسى. وزدەرىڭىز بىلەتىندەي ءبىز ساپاسى سىن كوتەرمەيتىن بىرقاتار جوعارى وقۋ ورىندارىنىڭ ليتسەنزياسىن قايتارىپ الدىق. ونداي وقۋ ورىندارىندا شاكىرت ساپالى ءبىلىم الا المايدى. وسى باعىتتا كۇرمەۋى شەشىلمەي كەلە جاتقان كۇردەلى ماسەلەلەردىڭ بارى دا بەلگىلى. ەندىگى ماقسات – ونى جۇيەلى تۇردە شەشۋ. سونىمەن قاتار ەلىمىزدە ۇستازدىققا ۇمتىلعان جاستار كوبەيىپ كەلەدى. پەداگوگيكا ماماندىعىن تاڭداۋشى تۇلەكتەردىڭ سانى ارتىپ وتىر. بۇعان دەيىن ەل پرەزيدەنتىنىڭ تاپسىرماسىنا بويىنشا پەداگوگتەردىڭ مارتەبەسى تۋرالى زاڭ قابىلدانعان ەدى. اتالعان زاڭ دا ءوز جەمىسىن بەرىپ كەلەدى, – دەدى ۆەدومستۆو باسشىسى.
كەزدەسۋ سوڭىندا پرەزيدەنتتىك جاستار كادرلىق رەزەرۆىنىڭ مۇشەلەرى ەل دامۋىنا ءوز ۇلەستەرىن قوسۋعا دايار ەكەندەرىن جەتكىزىپ, التىن ۋاقىتتارىن قيىپ كەلگەن ۆەدومستۆو باسشىلارىنا العىستارىن ءبىلدىردى.
