ماڭعىستاۋ وبلىسىنا جۇمىس ساپارى اياسىندا قازاقستاننىڭ تۇڭعىش پرەزيدەنتىنە كاسپي تەڭىزىنىڭ جاعالاۋىنداعى تۋريستىك حابتى دامىتۋ جوباسى تانىستىرىلدى.
كەزدەسۋدە ەلباسى وتاندىق تۋريزم يندۋسترياسىن دامىتۋدىڭ ماڭىزىنا توقتالدى. سونداي-اق قازاقستاننىڭ بىرەگەي تابيعاتىمەن قاتار قاسيەتتى جەرلەرى, مادەني جانە تاريحي ورىندارى, ۇلى جىبەك جولىنىڭ بويىنداعى نىساندارى, ارحەولوگيالىق ەسكەرتكىشتەرى بار ەكەنىن ايتا كەلە, ەلىمىزدە دەمالىستىڭ كەز كەلگەن ءتۇرىن دامىتۋعا مۇمكىندىك بار ەكەنىن اتاپ ءوتتى.
– ءتۋريزمدى دامىتۋدىڭ مەملەكەتتىك باعدارلاماسى اياسىندا تۋريستىك الەۋەتكە تالداۋ جاسالىپ, ماڭىزدى نىساندار مەن وڭىرلەر انىقتالدى. ىرىكتەۋ كەزىندە ولاردىڭ تۋريستىك تارتىمدىلىعىنا باسىمدىق بەرىلدى. ۇزدىك وڭىرلەر قاتارىنا الاكول, بالقاش كولدەرى, ششۋچينسك – بۋراباي كۋرورتتىق ايماعى, تۇركىستانمەن بىرگە ماڭعىستاۋ دا ەندى, – دەدى نۇرسۇلتان نازارباەۆ.
كاسپي تەڭىزىنىڭ جاعاسىندا العاش رەت بارلىق قىزمەت ءتۇرى قامتىلعان وتباسىلىق دەمالىس كەشەنىنىڭ قۇرىلىسىنا شەتەلدىك ينۆەستور تارتۋ ايماق ءۇشىن ماڭىزدى وقيعاعا اينالدى.
جيىندا «Rixos» قوناقۇي جەلىسىنىڭ باسقارما توراعاسى ف.تاميندجە بەس جۇلدىزدى ليۋكس كلاسىنداعى «Rixos Water World Aktau» قوناقۇيىن دامىتۋ جوباسىن تانىستىردى. سونداي-اق قازاقستاندىق جانە شەتەلدىك ينۆەستورلاردى تارتۋ ارقىلى تۋريستىك كلاستەردى كەڭەيتۋ جوسپارلارىمەن ءبولىستى.
نۇرسۇلتان نازارباەۆ بۇل كاسپيدە اۋقىمدى حالىقارالىق تۋريستىك حاب قۇرۋ جولىنداعى العاشقى قادام ەكەنىن, الداعى ۋاقىتتا وسىندا قازاقستاندىقتارمەن بىرگە شەتەلدىك قوناقتار دا وتە قولايلى ۋاقىت وتكىزە الاتىنىن اتاپ ءوتتى.
سونىمەن قاتار قازاقستاننىڭ تۇڭعىش پرەزيدەنتى كاسپي جاعالاۋىنداعى كۋرورتتىق ايماقتا جاڭا جۇمىس ورىندارىنىڭ قۇرىلۋى ەرەكشە ماڭىزعا يە ەكەنىن ايتتى. شارا بارىسىندا ءوڭىردىڭ تۋريزم سالاسىن دامىتۋ 50 مىڭعا جۋىق جۇمىس ورنىمەن قامتۋعا مۇمكىندىك بەرەتىنى, سونداي-اق جوبانى ىسكە اسىرۋ ءۇشىن شامامەن 2 ملرد دوللار ينۆەستيتسيا تارتىلاتىندىعى اتاپ ءوتىلدى.
– تاۋەلسىزدىك جىلدارى ءبىز ءبىراز شارۋا اتقاردىق. بۇرىن ەشكىم تانىماعان قازاقستان قازىر الەم كارتاسىندا لايىقتى ورىن الىپ وتىر. ءبىز جاڭا ەلوردا سالدىق. بۇگىندە ول باسقا وبلىس ورتالىقتارى مەن وڭىرلەردى دامىتۋدىڭ ۇلگىسىنە اينالدى. مەن بارلىق مۇسىلمانداردىڭ قاسيەتتى مەكەنى – تۇركىستان قالاسىنا بارۋدى جوسپارلاپ وتىرمىن. قازاق حاندىعىنىڭ ەجەلگى استاناسى بولعان شاھار قازىرگى ۋاقىتتا تۇرلەنىپ, تۋريستىك الەۋەتى ارتىپ كەلەدى, – دەدى ەلباسى.
نۇرسۇلتان نازارباەۆ ءتۋريزمدى ماقساتتى تۇردە دامىتۋعا باعىتتالعان قادامدار تەك جەكەلەگەن ايماقتاردىڭ عانا ەمەس, بۇكىل رەسپۋبليكانىڭ ەكونوميكاسىنا وڭ سەرپىن بەرەتىنىن اتاپ ءوتتى.
جيىن سوڭىندا قازاقستاننىڭ تۇڭعىش پرەزيدەنتى «Rixos Water World Aktau» قوناقۇيى كەشەنىن ارالادى.
سونداي-اق ءىس-شاراعا ونلاين-كونفەرەنتسيا فورماتىندا وتاندىق جانە شەتەلدىك ينۆەستورلار قاتىستى. ولاردىڭ قاتارىندا – ACCOR كومپانياسىنىڭ ەۋروپا, تاياۋ شىعىس جانە افريكا ايماعىنداعى ليۋكس كلاسىنداعى قوناقۇيلەردى دامىتۋ جونىندەگى ءبىرىنشى ۆيتسە-پرەزيدەنت ف.بودەن, ÖG Holding باسقارما توراعاسى و.گيۋر, «BI Group» قۇرىلىس حولدينگى ديرەكتورلار كەڭەسىنىڭ توراعاسى ا.راحىمباەۆ, «بازيس-ا» كورپوراتسياسى ديرەكتورلار كەڭەسىنىڭ توراعاسى ا.بەلوۆيچ بار.
قازاقستاننىڭ تۇڭعىش پرەزيدەنتى, سونىمەن قاتار ءابىش كەكىلباەۆ اتىنداعى مۋزەيگە باردى. مۋزەيدى ارالاۋ كەزىندە نۇرسۇلتان نازارباەۆ قازاقتىڭ بەلگىلى جازۋشىسىنىڭ ەسكەرتكىشىنە گۇل شوقتارىن قويدى.
سونداي-اق ەلباسى ءا.كەكىلباەۆتىڭ ءومىرى مەن شىعارماشىلىعىنا ارنالعان مۋزەي ەكسپوناتتارىمەن تانىستى. سوڭىندا قازاقستاننىڭ تۇڭعىش پرەزيدەنتى مۋزەيدىڭ قۇرمەتتى قوناقتار كىتابىنا ەستەلىك جازبا قالدىردى.
