ايماقتار • 20 قىركۇيەك، 2020

كوكپەكتىدە ساياباق اشىلدى

350 رەت كورسەتىلدى

توعىز جولدىڭ تورابىندا تۇرعان كوكپەكتىنىڭ كۇننەن كۇنگە كوركەيىپ كەلە جاتقانىن كوز كورىپ وتىر. ءدال قازىرگى ۋاقىتتا بۇل اۋىلعا كوشىپ كەلىپ جاتقاندار بولماسا، تابان اۋدارىپ كەتكەندەر ىلەۋ دە بىرەۋ. كەشە عانا «اۋىل – ەل بەسىگى» اتتى جوبا اياسىندا تۇرعىنداردىڭ يگىلىگى ءۇشىن گۇلگە ورانعان ۇلكەن ساياباق اشىلدى، دەپ حابارلايدى Egemen.kz

ساياباققا عۇمىر بويى ەلى، جەرى ءۇشىن ەڭبەك ەتكەن قۇدايبەرگەن نۇرعاليەۆتىڭ ەسىمى بەرىلدى. جول سالاسىندا ۇزاق جىلدار جۇمىس ىستەپ، ەگەمەندى ەلىمىزدىڭ «قۇرمەتتى جولشىسى» اتانعان ق. نۇرعاليەۆتىڭ ەرەن ەڭبەگىن قىزى گۇلناز قۇدايبەرگەنقىزى جالعاستىرىپ ءجۇر. اكە اماناتىن ارقالاپ جۇرگەن قىز ساياباق سالىپ، اۋىلداستارىنا سىيعا تارتتى، بۇرىنعى يۋجنىي كوشەسىنە كۇردەلى جوندەۋ جۇمىستارىن جۇرگىزىپ بەردى. جول جيەگىنە تروتۋار توسەدى. ەلىم دەپ كەتكەن ەر ەسىمى ەرتەڭگى ۇرپاق جادىندا ساقتالسىن دەگەن نيەتتە اۋىل تۇرعىندارى ءبىر اۋىزدان يۋجنىي كوشەسىنە قۇدايبەرگەن نۇرعاليەۆتىڭ اتىن بەرگەن.

سانيتارلىق تالاپتار ساقتالا وتىرىپ، ساياباق پەن كوشەنىڭ اشىلۋ سالتاناتىنا اۋداننىڭ باسشىلارى، قۇرمەتتى ازاماتتارى، قۇدايبەرگەن نۇرعاليەۆتىڭ ارىپتەستەرى كەلدى.

- قۇدىش اعامىز حالقىن ويلاعان ازاماتتاردىڭ ءبىرى ەدى. جازداي جول جوندەسەك، قىستاي قار تازالايتىنبىز. 2010 جىلى قىستىڭ بورانىندا جولداعى قارمەن الىستىق. سوندا اعامىز «جولداردى حالىق ريزا بولاتىنداي ەتىپ قاشان جوندەيمىز» دەپ مازاسىزداناتىن. بۇيىرسا قۇدىش اعامىزدىڭ ارمانى ورىندالىپ كەلەدى. جولدار جوندەلىپ جاتىر، - دەدى رەسپۋبليكالىق اۆتوموبيل جولدارى كوميتەتىنىڭ توراعاسى سايرانبەك بارماقوۆ.

ءومىرىن جول سالاسىنا ارناعان اسقار تاۋ اكە ءۇش قىز تاربيەلەپ ءوسىردى. قىزدارى اكە اتىنا كىر كەلتىرمەي ەل العىسىنا بولەنگەن. «كوكپەكتى جولدارى» جشس باسشىسى گۇلناز نۇرعاليەۆا تۋعان جەرىن اباتتاندىرۋ ءۇشىن زور ەڭبەك اتقارىپ جۇرگەنىن اۋىلداستارى ماقتانىشپەن ايتادى. سونداي-اق، "كوكپەكتى جولدارى" جشس اياسىندا «اسفالت-بەتون قوسپالارىن ءوندىرۋ» زاۋىتىن ىسكە قوسقان. زاۋىتتا اسفالت-بەتون قوسپالارىنىڭ ىستىق جانە سۋىق تۇرلەرىن شىعارادى. قيىرشىق تاستى ۇساتۋ تسەحى دا جۇمىس ىستەپ تۇر. نازىك جاندىلاردىڭ مۇنداي ىسپەن اينالىسۋلارى سيرەك. ەندى مىنە ساياباق سالدى. ساياباقتىڭ تورىندە جەر شارىنىڭ بەلگىسى تۇر. قىزدارى تۇعىرعا اكەسىنىڭ ءمۇسىنىن قويسا دا بولار ەدى، بىراق جەر ورتاق، ساياباق ورتاق بولعاندىقتان جەر شارىنىڭ بەلگىسىن قويىپتى.

سوڭعى جاڭالىقتار

ەلورداعا قارجى قۇيۋعا نيەتتى

ەلوردا • بۇگىن، 16:50

ۇقساس جاڭالىقتار