كەشە «قازمەديا» ورتالىعىندا ءماجىلىس دەپۋتاتى ايگۇل سولوۆەۆا جۋرناليستەرمەن بريفينگ وتكىزىپ, ءبىراز ماسەلەنىڭ ءمانىن اشىپ بەرمەك بولدى. ولاردى كوزىقاراقتى وقىرمان ءوزى سالماقتار دەگەن ويمەن ايتقاندارىن ءبىرشاما تۇتاس بەرگەندى ءجون كوردىك.
كەشە «قازمەديا» ورتالىعىندا ءماجىلىس دەپۋتاتى ايگۇل سولوۆەۆا جۋرناليستەرمەن بريفينگ وتكىزىپ, ءبىراز ماسەلەنىڭ ءمانىن اشىپ بەرمەك بولدى. ولاردى كوزىقاراقتى وقىرمان ءوزى سالماقتار دەگەن ويمەن ايتقاندارىن ءبىرشاما تۇتاس بەرگەندى ءجون كوردىك.
ءبىرىنشى كەزەكتە ايتارىم, ەلباسىنىڭ اتالعان وتىرىستا سويلەگەن سوزىنەن كەيىن مەن ەلىمىزدىڭ ءتورت ايماعىندا بولىپ قايتتىم. پرەزيدەنتتىڭ بارلىق سوزدەرى تۇرعىندار تاراپىنان قولداۋ تاپقانىن كوزىممەن كوردىم. وسىعان بايلانىستى مەن ۇكىمەتتىڭ كەيبىر ماسەلەلەردە ءالى كۇنگە نەگە سىلبىرلىققا جول بەرىپ وتىرعانىنا توقتالعىم كەلەدى. ۇكىمەتتىڭ ءوز جۇمىسىندا باسشىلىققا الىپ, جۇمىس ىستەيتىن قۇجاتتارى – ەلباسىنىڭ «قازاقستان- 2050» ستراتەگياسى مەن «نۇر وتان» پارتياسىنىڭ دوكتريناسى. ستراتەگيادا العا قويىلعان ەڭ ماڭىزدى مىندەت – باسەكەلەستىككە قابىلەتتى 30 دامىعان ەلدىڭ قاتارىنا ەنۋ. وسى قۇجاتتى باسشىلىققا الىپ, ۇكىمەت جوعارى دامىعان ەلدەردەن قالماي جۇمىس ىستەۋى كەرەك. ەكىنشىدەن, ايماقتارداعى ءبىزدىڭ سايلاۋشىلارىمىز دا ۇكىمەتتىڭ جۇمىسى شيراق بولىپ, العا قويىلعان مىندەتتەردى تولىعىمەن اتقارعانىن قالايدى. تراەكتوريا بەلگىلەنگەننەن كەيىن ۇكىمەت وسى مىندەتتەردىڭ اياسىندا ءوزىنىڭ رەفورمالارىن ىسكە اسىرۋى كەرەك ەدى. الايدا, وسى ەكى قۇجاتتى ىسكە اسىرۋعا بايلانىستى ۇكىمەتتىڭ ناقتى جۇمىس نوبايىن كورە الماي وتىرمىز. وسىعان بايلانىستى مەن, ءسوزىم جالاڭ بولماس ءۇشىن, ءبىزدىڭ ازاماتتارىمىزدىڭ ءبارىن تولعاندىرىپ جۇرگەن كەيبىر پروبلەمالارعا توقتالا كەتكىم كەلدى. ءبىرىنشى كەزەكتە, قولجەتىمدى تۇرعىن ءۇي قۇرىلىسى جانە تۇرعىن ءۇي-كوممۋنالدىق شارۋاشىلىعىن جاڭعىرتۋ جۇيەسى تۋرالى ايتسام دەيمىن. ءبارىڭىز بىلەسىزدەر, قولجەتىمدى تۇرعىن ءۇي ماسەلەسى بويىنشا توعىز ءتۇرلى تەتىك ۇسىنىلدى. الايدا, وسى تەتىكتەردىڭ ءبىرى دە ورتا داۋلەتتى تۇرعىندار ءۇشىن ەشقانداي كەدەرگىسىز تۇرعىن ۇيگە قول جەتكىزۋىنە مۇمكىنشىلىك بەرەتىن بازالىق نەگىز بولا المادى. ال باسقا ەلدەردە مۇندايعا كەز كەلگەن ازامات قول جەتكىزە الار ەدى. سوندىقتان, وسى سالادا ۇكىمەت قوسىمشا شارالار مەن تەتىكتەر قولدانۋى كەرەك.
ەكىنشىدەن, قۇرىلىس سالاسىنا قاتىسى بار مينيسترلىكتەر پارلامەنتكە ەندى عانا قۇرىلىس ەرەجەلەرى مەن نورمالارىنا وزگەرىستەر ەنگىزۋ جونىندەگى زاڭ جوبالارىن ەنگىزىپ جاتىر. وندا قوسىمشا بيۋدجەت قاراجاتتارىن ءبولۋ ارقىلى وسى تەتىكتەردى جەتىلدىرۋ عانا قاراستىرىلعان. ەكىنشى جاعىنان العاندا, كەڭەيتىلگەن وتىرىستا العا قويىلعان مىندەتتەردى ءتيىمدى اتقارۋعا ءتيىستى باعدارلامالار ازىرلەنبەگەن.
ۇشىنشىدەن, تۇرعىن ءۇي-كوممۋنالدىق شارۋاشىلىعىن جاڭعىرتۋ باعدارلاماسى قابىلدانىپ, بيۋدجەتتەن قاراجات ءبولدىرۋ سۇرالعاندا ونىڭ وسى تاراپتاعى ماسەلەنى شەشۋگە ارنالعان ەڭ جەتىلدىرىلگەن شارا ەكەندىگى تۋرالى كوپ ايتىلدى. بىراق ءىس جۇزىندە ول دا دۇرىس جۇرگىزىلمەگەنىنە ءبارىڭىز دە كۋاسىزدەر. ەندى بيۋدجەتتەن بۇل باعدارلاماعا قاراجات بولىنبەيتىن بولدى, دەدى دەپۋتات.
وسى ارادا ايگۇل ساعاديبەكقىزى تۇرعىندارمەن كەزدەسۋ كەزىندە وسى ماسەلەنىڭ كوپ كوتەرىلەتىنىن جەتكىزدى. سونىمەن بىرگە, ولاردىڭ تۇرعىن ءۇي-كوممۋنالدىق شارۋاشىلىعىن جاڭعىرتۋ بويىنشا ايتقان ۇسىنىستارى تۋرالى ۇزاق اڭگىمەلەدى. باعدارلامادا بيۋروكراتتىق كەدەرگىلەردىڭ كوپ بولعاندىعى تۋرالى دا ايتىلدى. ودان ءارى شەشەن باسقا باعدارلامالار تۋرالى دا ءسوز قوزعاپ, كەيبىرىنىڭ وزگەرىپ كەتەتىندىگى مينيسترلىكتەردىڭ اراسىندا ءوزارا كەلىسىمنىڭ جوعىندا ەكەنىن سىناپ ءوتتى. ماسەلەن, دەدى ول, ەكونوميكا جانە بيۋدجەتتى جوسپارلاۋ مينيسترلىگى 18 ملرد. تەڭگە ءبولىندى دەسە, ول تۋرالى باسقا ءتۇگىل ايماقتارداعى دەپارتامەنت ديرەكتورلارى دا بىلمەي قالادى. سوندىقتان بۇل ىستە بارىنشا اشىقتىق, مولدىرلىك كەرەك. سوندا سىبايلاس جەمقورلىققا دا جول بەرىلمەيدى.
وسىدان ءارى ول سىبايلاس جەمقورلىق پروبلەمالارىنا اۋىسىپ, قاراعاندى مەن قىزىلوردادا مەملەكەتتىك ساۋلەت-قۇرىلىس باقىلاۋ قىزمەتى وكىلدەرىنىڭ سىبايلاس جەمقورلىق قىلمىسپەن ۇستالعانىن كولدەنەڭ تارتتى جانە وسىندايلارعا قارسى بەلسەندى, ناقتى تەتىكتەردىڭ جوقتىعىن سىناپ ءوتتى. ودان ءارى ۇكىمەتتىڭ تۇرعىن ءۇي قۇرىلىسىن ساپالى جۇرگىزۋگە بايلانىستى باقىلاۋىنىڭ تومەندىگىن اتاپ كورسەتتى. وسى باعىتتاعى جۇمىستاردى, وكىنىشكە قاراي, ءبىز كورە الماي كەلەمىز, دەدى ول.
دەگەنمەن, دەپۋتات ايگۇل سولوۆەۆانىڭ ۇكىمەت تاراپىنا ايتقان سىندارى بارىنشا ناقتى ماسەلەلەردى قامتىعان سىن تۇرعىسىندا بولماي شىققانداي كورىندى. ول ءبىر ماسەلەدەن ءبىر ماسەلەگە اۋىسىپ, ويىن جۇيەلى تۇردە جەتكىزە الماعانداي اسەر قالدىردى. وسىنىڭ وزىنەن ونىڭ اۋديتوريانىڭ الدىنا دايىندىقسىز كەلگەنى سەزىلىپ تۇردى. ماسەلەن, ول جوق جەردەن ۇكىمەتتىڭ قايسىبىر ايماققا («دوپۋستيم, نا توت يلي درۋگوي رەگيون» سياقتى سوزدەرى – ج.س. ) قانداي دا ءبىر سومانىڭ بولىنەتىندىگى تۋرالى ايتاتىنىن, ودان كەيىن ول سوما ەكى رەت وزگەرتىلەتىنىن, اقىرىندا ول ءتىپتى ازاياتىنىن ايتتى. سوندىقتان كوپتەگەن وڭىرلەر وسىنداي ماسەلەلەرگە شاعىنىپ جاتادى, دەدى ول.
جاقسىباي سامرات,
«ەگەمەن قازاقستان».
