قوعام • 19 قىركۇيەك، 2020

شەكاراشىلار براكونەرلەردىڭ جولىن كەستى

60 رەت كورسەتىلدى

قازاقستان رەسپۋبليكاسىنىڭ مەملەكەتتىك شەكاراسىن كاسپي تەڭىزىنىڭ سولتۇستىك بولىگىنىڭ جاعالاۋىن بويلاي كۇزەتۋ بويىنشا قىزمەت اتقارۋ بارىسىندا اتىراۋ وبلىسى يساتاي اۋدانى امانگەلدى ەلدى مەكەنىنىڭ اۋدانىندا «بايدا» جانە «بۋداركا» ءجۇزۋ قۇرالدارىندا قازاقستان رەسپۋبليكاسىنىڭ ەكى ازاماتى ۇستالدى، دەپ حابارلايدى Egemen.kz.

ءجۇزۋ قۇرالدارىن قاراپ-تەكسەرۋ كەزىندە شەكارا جاساعى جالپى سالماعى 245 كگ 64 دارا بالىق اۋلاۋعا تىيىم سالىنعان بەكىرە تۇقىمداس بالىقتاردى انىقتادى.

سونداي-اق قۇقىق بۇزۋشىلار اۋلاردى ورنالاستىرعان جەرلەردى وڭاي انىقتاۋ ءۇشىن قولداناتىن براكونەرلىك اۋلاۋ قۇرالدارى مەن GPS ناۆيگاتورلارى تابىلدى.

تۇندە ارەكەت ەتكەنىنە قاراماستان، براكونەرلەردى شەكارا جاساعى دەر كەزىندە انىقتادى.

اتىراۋ وبلىسى بويىنشا شەكارا قىزمەتى دەپارتامەنتى شەكارا جاساعى قۇرامىنىڭ ۇيلەسىمدى ءىس-قيمىلدارىنىڭ ارقاسىندا مەملەكەتكە 100 ميلليون تەڭگەدەن استام سوماعا كەلتىرىلگەن زالالدىڭ الدىن الدى.

قازىرگى ۋاقىتتا ۇستالعان ادامدارعا قاتىستى قازاقستان رەسپۋبليكاسىنىڭ قىلمىستىق زاڭناماسىنا سايكەس سوتقا دەيىنگى تەرگەۋ جۇرگىزىلۋدە. 

الىنعان بالىق اۋماقتىق ىشكى ىستەر ورگاندارىنا بەرىلدى.

سوڭعى جاڭالىقتار

ۇقساس جاڭالىقتار