«Oxy Textile» جشس شىمكەنت قالاسىنداعى «وڭتۇستىك» ەركىن ەكونوميكالىق ايماقتاعى توقىما كلاستەرى اياسىندا جۇزەگە اسقان العاشقى تابىستى جوبالاردىڭ ءبىرى. جوعارى ساپالى ماقتا ونىمدەرىن شىعاراتىن كەشەندى اۆتوماتتاندىرىلعان ءجىپ ءيىرۋ فابريكاسى قازاقستاندىق شيكىزاتتى وڭدەۋگە باعىتتالعان. ماسەلەن, ماقتا ءجىبىن الۋ ءۇشىن شيكىزات 2 رەت وڭدەۋدەن ءوتۋ ارقىلى قۇنى 4 ەسەگە دەيىن وسە تۇسەدى. سونىمەن قاتار, كاسىپورىن شىعاراتىن ءونىم ەۋروپا ەلدەرىنە ەكسپورتقا شىعارىلادى».
«Oxy Textile» جشس شىمكەنت قالاسىنداعى «وڭتۇستىك» ەركىن ەكونوميكالىق ايماقتاعى توقىما كلاستەرى اياسىندا جۇزەگە اسقان العاشقى تابىستى جوبالاردىڭ ءبىرى. جوعارى ساپالى ماقتا ونىمدەرىن شىعاراتىن كەشەندى اۆتوماتتاندىرىلعان ءجىپ ءيىرۋ فابريكاسى قازاقستاندىق شيكىزاتتى وڭدەۋگە باعىتتالعان. ماسەلەن, ماقتا ءجىبىن الۋ ءۇشىن شيكىزات 2 رەت وڭدەۋدەن ءوتۋ ارقىلى قۇنى 4 ەسەگە دەيىن وسە تۇسەدى. سونىمەن قاتار, كاسىپورىن شىعاراتىن ءونىم ەۋروپا ەلدەرىنە ەكسپورتقا شىعارىلادى».
مىنە, 2010 جىلدىڭ قازان ايىندا ىسكە قوسىلىپ, ەلباسى ن.نازارباەۆتىڭ ءوزى جۇمىسىنا ساتتىلىك تىلەگەن «Oxy Textile» جشس تۋرالى اقپارات قۇرالدارى سول كەزدە وسىلاي دەپ جارىسا جازىپتى. ارينە, جۋرناليست اعايىنداردا نە جازىق بار, جەرگىلىكتى بيلىك دايىنداپ بەرگەن اقپاراتتى وڭدەپ, ەلدەن ءسۇيىنشى سۇراپ, بۇقاراعا تەزىرەك جەتكىزگەنى بولماسا... الايدا, جارتى الەمگە جار سالعان كاسىپورىن جارىتىپ جۇمىس ىستەمەدى. ماقتادان ءجىپ يىرەتىن فابريكانىڭ جوباسىن قارجىلاندىرۋعا 5,5 ميلليارد تەڭگە جۇمسالعان.
جىلىنا 6 مىڭ توننا ءجىپ يىرەتىن فابريكادا 260 ادام جۇمىس ىستەۋى ءتيىس ەدى. سول جىلى-اق «ەڭ ۇزدىك كاسىپورىن» نوميناتسياسىندا «التىن ساپا» سىيلىعىن الىپ ۇلگەردى. بىراق, بىرنەشە ايدان كەيىن كاسىپورىن توقتاپ قالدى. ايتىلعان جەلەۋ – شيكىزاتتىڭ جوقتىعى. كۇنى كەشە تۇساۋىن كەسكەن كاسىپورىن عيماراتىنىڭ قازىرگى تاڭدا توزىعى جەتە باستادى.
توقىما ونەركاسىبىن كەڭەيتۋ ارقىلى وڭتۇستىك ايماقتىڭ ەكونوميكاسىن دامىتۋعا سەپتىگىن تيگىزبەك بولعان ەڭ قىمبات جوبا – «يۋتەكس.كز» كاسىپورنىنا ميللياردتاعان قاراجات جۇمسالدى. مامانداردىڭ ايتۋىنشا, جوبانىڭ قۇنى 19,3 ميلليون دوللاردى قۇراعان.
جوبادا ءشيتتى ماقتانى اقىرىنا دەيىن وڭدەۋ كوزدەلگەن. الايدا, بۇل كاسىپورىننىڭ ءتىپتى, عيماراتى دا سالىنىپ ۇلگەرمەدى. «وڭتۇستىك» ارنايى ەكونوميكالىق ايماعىندا تەك قاڭقاسى تۇرعىزىلىپ, كونتەينەرلەر ورناتىلعان. «شىمكەنت كاشەمير» زاۋىتىنىڭ دا تاعدىرى وسىعان ۇقساس. كەزىندە ۇلكەن ءۇمىت ارتىلعان بۇل جوباعا 560 ميلليون تەڭگە جۇمسالدى. بۇگىندە مۇندا 230 ادام جۇمىسپەن قامتىلىپ, شىعارىلعان تاۋار الىس جانە جاقىن شەتەلگە جونەلتىلۋى ءتيىس بولاتىن. الايدا, وسىندا جەتكىزىلگەن شەتەلدىك قوندىرعىلار سول كۇيى ىسكە قوسىلمادى.
جاقىندا عانا ەلباسى ن.نازارباەۆ ۇكىمەتتىڭ كەڭەيتىلگەن وتىرىسىندا «ماقتا شيكىزاتىنىڭ جەتكىزىلمەۋى سالدارىنان وڭتۇستىك قازاقستان وبلىسىنداعى توقىما فابريكاسىنىڭ جۇمىسى وتاندىق ماقتا ەكسپورتقا شىعارىلىپ جاتقاندا توقتاپ تۇر», دەپ وڭتۇستىكتىڭ توقىما ونەركاسىبىن قاتتى سىنعا العان بولاتىن. پرەزيدەنت سىنىنان كەيىن وڭتۇستىك قازاقستان وبلىسى اكىمىنىڭ ورىنباسارى ساپاربەك تۇياقباەۆ «Oxy Textile» كاسىپورنىنا قاتىستى ءوزىنىڭ وي-پىكىرىن ءبىلدىردى. تۇياقباەۆتىڭ سوزىنەن تۇسىنگەنىمىز, بۇل كاسىپورىن بۇگىن-ەرتەڭ قايتا اياعىنان تۇرا قوياتىنعا ۇقسامايدى. باستى سەبەپ – سول باياعى شيكىزات ماسەلەسىنىڭ شەشىلمەۋى. بۇدان بولەك, كاسىپورىننىڭ قارجى اينالىمى دا از كورىنەدى.
مىنە, وسىلايشا وڭتۇستىكتىڭ توقىما ونەركاسىبى توقىراپ تۇر. جاقىندا «ازاتتىق راديوسى» ۋاقتىسىندا ەلباسىنىڭ قاتىسۋىمەن اشىلعان, بىراق, كەيىننەن توقتاپ قالعان قازاقستانداعى ون «عالامات جوبانىڭ» ءتىزىمىن جاريا ەتكەن-ءدى. قاراپ وتىرساق, سونىڭ ەكەۋى وڭتۇستىك قازاقستان وبلىسىنىڭ ەنشىسىندە ەكەن. ءبىرى – جوعارىدا ايتىلعان «يۋتەكس كز» كاسىپورنى, ەكىنشىسى – كەزىندە 35 ميلليون اقش دوللارى جۇمسالعان «ازياكەراميك» زاۋىتى. وسىنىڭ ءبارى الدىن الا دۇرىس باعدارلاماۋدان, اسىعىس-ۇسىگىس جوسپارلاعاننان بولعانى بەلگىلى. نەگە ەكەنىن قايدام, وبلىس اكىمى اسقار مىرزاحمەتوۆتىڭ قازىرگى «كومانداسى» ساپادان گورى سانعا قۇمار, تەزىرەك لەنتا قيىپ, «ويباي, تەڭدەسى جوق كاسىپورىن» دەپ الاۋلاتىپ-جالاۋلاتىپ اقپاراتتىق جارناما جاساۋعا قۇمار. ايتپەسە, شيكىزات ماسەلەسىن شەشپەي تۇرىپ, قانداي كاسىپورىن سالۋعا بولادى؟ بۇل دەگەنىمىز ناعىز كوزبوياۋشىلىق ەمەس پە؟ بۇدان بولەك, تاعى دا بىرقاتار كاسىپورىندار وسىنداي اسىعىستىقتىڭ «قۇربانى» بولىپ, جۇمىسى توقتاپ تۇر. ول تۋرالى تاعى ايتىلا جاتار. تاعى دا بۇل كەمشىلىكتى ەلباسى ن.نازارباەۆ كوزگە شۇقىپ كورسەتپەگەندە وبلىس اكىمىنىڭ ورىنباسارى س.تۇياقباەۆ قاشانعا دەيىن ۇندەمەي جۇرە بەرەر ەدى؟ شىمكەنت كەزىندە «ۆوسحود», «ەلاستيك» سەكىلدى فابريكالارىمەن تانىمال بولاتىن. وكىنىشكە قاراي, بۇل كاسىپورىندار جەكەشەلەنىپ, اتى بار دا زاتى جوق, بۇگىندە ولاردىڭ عيماراتتارىندا باسقا مەكەمەلەر وتىر.
ارينە, وڭتۇستىك قازاقستاندا بارلىق جوبا وسىلايشا قۇردىمعا كەتىپ جاتىر دەپ ايتۋعا بولمايدى. بيىل ءۇيد باعدارلاماسى اياسىندا ينۆەستيتسيا كولەمى 447 ملرد. تەڭگەنى قۇرايتىن 150 جوبا بەكىتىلگەن. وندا 19 مىڭ جۇمىس ورنى اشىلادى دەپ كۇتىلۋدە. بۇعان قوسىمشا, قۇنى 600 ملرد. تەڭگەدەن استام 104 جاڭا جوبا ۇسىنىلىپ وتىر.
ايتسە دە, جارناماسى جەر جارىپ, بۇكىل وڭتۇستىكقازاقستاندىقتاردى جۇمىسپەن جارىلقاپ تاستايتىن بولعان وسىنداي «جارىمجان» جوبالاردىڭ تەك قاعاز جۇزىندە قالۋىنا كىم كىنالى؟ «اقپاراتتىق جارناماعا» قۇمار وبلىس باسشىلىعى ساننان گورى ساپاعا جۇمىس ىستەۋدى سانالارىنا مىقتاپ ءتۇيىپ السا, دۇرىس بولار ەدى؟ اقىرىن ءجۇرىپ, انىق باسقان ادامنىڭ ابىرويى دا اسقاق قوي.
ورالحان ءداۋىت,
«ەگەمەن قازاقستان».
وڭتۇستىك قازاقستان وبلىسى.
