قازاقستان كومپوزيتورلارىنىڭ شىعارماشىلىق ۇيىمى 1939 جىلى م.تولەباەۆ, ە.برۋسيلوۆسكي, ا.جۇبانوۆ, ل.حاميدي, ۆ.ۆەليكانوۆ, س.شابەلسكي, ب.ەرزاكوۆيچ ۇيعارىمىمەن قۇرىلعان بولاتىن. وداقتى ءار جىلدارى كسرو حالىق ارتىستەرى ق. قوجامياروۆ, ع.جۇبانوۆا, س.مۇحامەدجانوۆ, ە. راحماديەۆ سياقتى بەلگىلى تۇلعالار باسقاردى. وسى ارالىقتا 52 وپەرا, 17 بالەت قويىلىمى, سونداي-اق ءبىرتالاي سيمفونيا, وراتوريا, كانتاتا, اسپاپتىق مۋزىكا, رومانستار مەن اندەر دۇنيەگە كەلدى. بۇگىندە قازاقستاندا 3 وپەرا جانە بالەت تەاترى, 7 سيمفونيالىق وركەستر, 18 حالىق اسپاپتار وركەسترى بار دەسەك, ولاردىڭ رەپەرتۋارى نەگىزىنەن ەل كومپوزيتورلارىنىڭ ۇزدىك شىعارمالارىنان تۇرادى. قازاق كومپوزيتورلارىنىڭ تۋىندىلارى قاشاندا ەل تاعدىرى مەن حالىقتىڭ قۋانىش-مۇڭىنىڭ رۋحاني ايناسى بولىپ تابىلادى.
2007 جىلدان بەرى وداققا مەملەكەتتىك سىيلىقتىڭ لاۋرەاتى, بەلگىلى كومپوزيتور بالنۇر بالعابەكقىزى قىدىربەك توراعالىق ەتىپ, قازاقستاندىق كومپوزيتورلار مەكتەبىنىڭ مارتەبەسىن ارتتىرۋعا ەداۋىر تەر توكتى. وسى جىلدارى وتاندىق اۆتورلاردىڭ شىعارمالارى ەل ىشىندە, تمد جانە شەت ەلدەردە ورىندالىپ, زاماناۋي تۋىندىلارمەن تىڭدارمانىن ءتانتى ەتتى.
شىعارماشىلىق يەلەرىنىڭ سەزىندە قازاقستاننىڭ ەڭبەك سىڭىرگەن قايراتكەرى, قازاق ۇلتتىق ونەر ۋنيۆەرسيتەتىنىڭ پروفەسسورى, كومپوزيتور سەرىكجان قۇتىمبەت ۇلى ءابدىنۇروۆ ۇجىمنىڭ توراعاسى بولىپ سايلاندى. جاڭا توراعانىڭ قورجىنىندا "كوك ءبورى اڭىزدارى" بالەتى, "اپپاق" جانە "ماحابباتىم مەنىڭ" وپەرالارى, "كەرەي-جانىبەك", " ۇلى شەرۋ" سيمفونيالىق داستاندارى, "ساقتار", "بايگە" سيمفونيالىق كۇيلەرى جانە ۆوكالدىق, اسپاپتىق شىعارمالار مەن ءبىرتالاي اندەر بار.
ۇيىم جارعىسىنا "قۇرمەتتى توراعا" بەلگىسى ەنگىزىلىپ, بۇل لاۋازىمعا كومپوزيتور بالنۇر قىدىربەك لايىق دەپ تابىلدى.
