سىر وڭىرىندە باستى قۇجاتتان تۋىندايتىن مىندەتتەردى جۇزەگە اسىرۋ ءۇشىن وبلىس اكىمى گۇلشارا ابدىقالىقوۆانىڭ توراعالىعىمەن اكتيۆ وتىرىسى وتكىزىلىپ, ناقتى مىندەتتەر جۇكتەلدى. وبلىس اكىمىنىڭ ورىنباسارى سەرىك احمەت وسى تاپسىرمالاردى ورىنداۋ بارىسىنداعى جۇمىستار مەن جوسپارلار جايىن باق وكىلدەرىنە بايان ەتتى.
مەملەكەت باسشىسىنىڭ جولداۋىن كەڭىنەن ناسيحاتتاۋ ماقساتىندا بەلگىلى تۇلعالار مەن قوعامدىق پىكىر كوشباسشىلارىن تارتا وتىرىپ, رەسپۋبليكالىق جانە جەرگىلىكتى باق-تار مەن الەۋمەتتىك جەلىلەردە پىكىرلەر مەن ماقالالار جاريالانۋدا. سونىمەن بىرگە ارنايى وبلىستىق مەديا-جوسپار ازىرلەنىپ, بەكىتىلدى.
جولداۋدا مەملەكەت باسشىسى «حالىق ۇنىنە قۇلاق اساتىن مەملەكەت» نەگىزى بيلىك پەن قوعام اراسىنداعى تۇراقتى ديالوگ ەكەندىگىن اتاپ ايتقانى بەلگىلى. بۇل ەڭ الدىمەن ازاماتتىق قوعامدى دامىتۋ قاجەتتىگىن كورسەتەدى. بۇل باعىتتا ايماقتاعى ۇكىمەتتىك ەمەس ۇيىمداردىڭ باسىن قوسىپ, ولارعا ادىستەمەلىك كومەكتەر كورسەتەتىن وبلىستىق «ازاماتتىق اليانس» قايتا قۇرىلدى. الداعى ۋاقىتتا ازاماتتىق قوعامنىڭ بەلسەندىلىگىن ارتتىرۋ ماقساتىندا وڭىردە «الەۋمەتتىك جوبالار جارمەڭكەسىن» وتكىزۋ جوسپارلانىپ وتىر.
باستى قۇجاتتا پرەزيدەنت وسكەلەڭ ۇرپاقتىڭ شىعارماشىلىق الەۋەتىن دامىتۋعا نازار اۋدارىپ, «بالالار ۇيىرمەسى» قىزمەتىن قايتا قالىپقا كەلتىرۋدىڭ ماڭىزدىلىعىن قوزعادى. وسى رەتتە مادەنيەت ۇيىمدارىنداعى بالالار ۇيىرمەلەرىنىڭ جاڭا باعىتتا جۇمىس ىستەۋىنە دە نازار اۋدارىلادى.
قازىر وبلىستاعى 173 كلۋبتا 854 ۇيىرمە تۇراقتى جۇمىس ىستەيدى, ولارعا 10 606 ادام قاتىسادى. جولداۋ اياسىندا الداعى جىلى ۇيىرمە سانىن مىڭعا, قاتىسۋشىلاردى 11 500-گە جەتكىزۋ جوسپارلانىپ وتىر.
– مەملەكەت باسشىسى جولداۋدا بۇقارالىق سپورتقا, دەنە تاربيەسىنە ەرەكشە ءمان بەرگەنىن, ءار وبلىستا, ءىرى قالالار مەن اۋدان ورتالىقتارىندا بالالار قاتىساتىن سپورت ۇيىرمەلەرىن اشۋ قاجەتتىگىن تاپسىرعانىن بىلەسىزدەر. ءبىزدىڭ وبلىستا ونشاقتى جىلدان بەرى سەكتسيالار جۇمىسىن ساباقتان تىس جانە كەشكى ۋاقىتتا ۇيىمداستىرىپ, وسى ارقىلى بۇقارالىق سپورتتى دامىتۋ تاجىريبەسى ەنگىزىلگەن. قازىر وڭىردە 21 بالالار مەن جاسوسپىرىمدەر سپورت مەكتەبى جۇمىس ىستەيدى, وندا 20 147 وقۋشى 45 سپورت تۇرىمەن تەگىن شۇعىلدانادى, – دەدى وبلىس اكىمىنىڭ ورىنباسارى.
سىر وڭىرىندە سوڭعى ەكى جىلدا 16 سپورت كەشەنى پايدالانۋعا بەرىلسە, بيىل مەملەكەت-جەكەمەنشىك ارىپتەستىگى اياسىندا جوسپارلانعان 12 جوبانىڭ 5-ەۋى ىسكە قوسىلدى.
س.احمەت جولداۋدا جۇكتەلگەن مىندەتتەر مەن ماقساتتاردى جاستار ساياساتى سالاسىندا جۇزەگە اسىرۋ ءۇشىن 5 باعىت, 29 ينديكاتوردان تۇراتىن
«SYR JASTARY-2025» جول كارتاسىنىڭ جوباسى جاساقتالىپ جاتقانىن دا ايتىپ ءوتتى.
الداعى بەس جىلدا 6 مىڭعا جۋىق جاس «جاسىل ەل» جانە «جاس قۇرىلىسشىلار» ەڭبەك جاساقتارىنىڭ قاتارىندا ەڭبەك ەتەتىن بولادى.
كەيىنگى تولقىننىڭ كاسىپكەرلىك باستامالارىن قولداۋ ءۇشىن مەملەكەتتىك گرانتتار مەن ينۆەستيتسيالار تارتىلىپ, وڭىردەگى NEET ساناتىنداعى جاستاردىڭ ۇلەسىن تومەندەتۋ كوزدەلىپ وتىر. جاستاردى جۇمىسپەن قامتۋ جوسپارىنىڭ اياسىندا تۇراقتى تۇردە وبلىستىق ەڭبەك لاگەرىن ۇيىمداستىرۋ دا بار.
مەملەكەت باسشىسى جولداۋىندا پاندەمياعا قارسى كۇرەستىڭ ءالى دە جالعاسىپ جاتقاندىعى, ماسەلە تۋىنداعان كەزدە عانا شۇعىل قيمىلداماي, الدىن الا شارالار قابىلداۋ قاجەتتىگى باسا ايتىلدى. ىندەتتىڭ الدىن الۋ ءۇشىن حالىق كوپ شوعىرلاناتىن ورىنداردا زالالسىزداندىرۋ جۇمىستارى قارقىندى جالعاسۋدا.
بۇگىنگە دەيىن 13,9 ملن شارشى مەتردى قۇرايتىن اۋماق زالالسىزداندىرىلىپتى. ءتيىستى مەملەكەتتىك ورگاندار, باق وكىلدەرى مەن ۆولونتەرلەردەن قۇرالعان 24 توپ كارانتين تالاپتارىنىڭ ساقتالۋىن ۇدايى قاداعالاپ وتىر.
قىزىلوردا
