اتالعان ۆەدومستۆونىڭ ءبىلىم جانە عىلىم سالاسىنداعى ساپانى قامتاماسىز ەتۋ كوميتەتى 25 جوعارى وقۋ ورنىنىڭ كادرلاردى دايارلاۋ باعىتتارى بويىنشا ليتسەنزيالارعا 60 قوسىمشاسىن قايتارىپ الدى. ونىڭ باسىم بولىگى كوميتەتتىڭ تەكسەرىسىنەن كەيىن قايتارىلدى.
نەگىزىنەن بۇل ۋنيۆەرسيتەتتەر «پەداگوگيكالىق عىلىمدار», «ونەر», «گۋمانيتارلىق عىلىمدار», «جاراتىلىستانۋ عىلىمدارى», «تەحنيكا عىلىمدارى», «قىزمەت كورسەتۋ» جانە «الەۋمەتتىك جۇمىس», «الەۋمەتتىك عىلىمدار» باعىتتارى بويىنشا كادرلار دايارلاۋدى جۇزەگە اسىردى.
جۇرگىزىلگەن تەكسەرۋ ناتيجەلەرى بويىنشا جوعارى وقۋ ورىندارى نورماتيۆتىك-قۇقىقتىق اكتىلەردى ساقتاماعانى انىقتالدى. ولقىلىقتارعا نەگىزىنەن تالاپكەرلەردى قابىلداۋ, پروفەسسورلىق-وقىتۋشىلار قۇرامنىڭ (پوق) بىلىكتىلىگىن ارتتىرۋ, پروفەسسورلىق-وقىتۋشىلار قۇرامىن كونكۋرس ارقىلى الماستىرۋ, پروفەسسورلىق-وقىتۋشىلار قۇرامىنىڭ وقۋ جۇكتەمەسىن جوسپارلاۋ, ءبىلىم الۋشىلاردى قورىتىندى اتتەستاتتاۋ, ديپلوم بلانكىلەرىن ەسەپكە الۋ جانە ت.ب. بويىنشا جول بەرىلگەن.
«پرەزيدەنتتىڭ تاپسىرماسى بويىنشا جۇمىستى ەكى باعىتتا جۇرگىزىپ جاتىرمىز. بىرىنشىدەن, ءالسىز ۋنيۆەرسيتەتتەردى تولىقتاي جابۋ, ەكىنشىدەن, بۇل جاعدايدا ۋنيۆەرسيتەتتەردى ساپاسى تومەن, جابدىقتارى جەتىسپەيتىن جانە ت.ب. ماماندىقتارى بويىنشا ليتسەنزياسىنان ايىرۋ. ءيا, بۇل جوعارى وقۋ ورىندارى ءۇشىن وتە اۋىر پروتسەسس, جوعارى وقۋ ورىندارى قوماقتى كىرىستەر مەن ستۋدەنتتەردى جوعالتادى, بىراق ءبىز ءۇشىن ساپانى قامتاماسىز ەتۋ ماڭىزدى», دەپ ءتۇسىندىردى ءبىلىم جانە عىلىم ۆيتسە-ءمينيسترى ميراس داۋلەنوۆ.
بيىل ءبىلىم بەرۋ قىزمەتىنە قويىلاتىن بىلىكتىلىك تالاپتارى كۇشەيتىلدى, سونداي-اق مەملەكەتتىك جالپىعا مىندەتتى ءبىلىم بەرۋ ستاندارتى مەن قىزمەتتىڭ ۇلگىلىك قاعيدالارى جاڭارتىلعانىن ەستەرىڭىزگە سالامىز.
