قورشاعان ورتا لاستانۋىنىڭ مونيتورينگى سىناق زەرتحاناسىنىڭ باسشىسى ەربول ورازالين وزەننەن الىنعان سۋ سىناماسى زەرتحانادا قالاي تەكسەرىلەتىنى جايىندا ءسوز ەتتى. ونىڭ ايتۋىنشا, سۋ وبەكتىلەرىنەن سىنامالار اي سايىن الىنىپ وتىرادى. تەك ءساۋىر ايىندا سۋ دەڭگەيىنىڭ كوتەرىلۋىنە بايلانىستى سۋ ساپاسى ەكى رەت تالداۋدان وتەدى. جىل سايىن الىناتىن 13 مونيتورينگتىڭ ناتيجەسى بىرقالىپتى دەڭگەيدە ساقتالادى. ءار مونيتورينگ بارىسىندا سۋ ساپاسىندا ايتارلىقتاي وزگەرىستەر بولمايدى.
"سىناما الۋ كەزىندە سۋ تەمپەراتۋراسى ولشەنىپ, زەرتحاناعا جەتكىزىلەدى. وندا ونىڭ ورگانيكالىق قۇرامى, اۋىر مەتالداردىڭ بولۋى, تۇزدىڭ قۇرامى زەرتتەلەدى. تالداۋ قورىتىندىسى ءبىر تاۋلىكتە بەلگىلى بولادى. ءبىز بىرنەشە جىلدان بەرى ەسىل وزەنىنە مونيتورينگ جۇرگىزىپ كەلەمىز. مۇندا سۋ قۇرامىندا ايتارلىقتاي وزگەرىستەر بولعان جوق. ەلوردادا ءبىز باقىلايتىن 7 سۋ قويماسى جانە سىناما الاتىن 20 ورىن بار. ارينە, ءبىزدىڭ سۋ ايدىندارى ەڭ تازا سۋ ايدىنى ەمەس ەكەنىن مويىنداۋىمىز كەرەك. بىراق رۇقسات ەتىلگەن شەكتى كونتسەنتراتسيا مولشەردەن اسپايدى", دەدى ەربول ورازالين.
ونىڭ ايتۋىنشا, سۋ ساپاسىندا وزگەرىستەردىڭ بولماۋى بىزدە سۋدى لاستايتىن ءىرى زاۋىتتار مەن كاسىپورىنداردىڭ جوقتىعىمەن بايلانىستى. ەگەر سۋ قۇرامىنداعى كەيبىر كورسەتكىشتەر قالىپتان اسىپ كەتكەن بولسا, وندا اتالعان زەرتحانا دەرەكتەردى توتەنشە جاعدايلار دەپارتامەنتى مەن نۇر-سۇلتان اكىمدىگىنىڭ ەكولوگيا دەپارتامەنتىنە جىبەرەدى. بۇدان سوڭ, ولار سۋ قۇرامىن قالىپقا كەلتىرۋ جوسپارىن ازىرلەپ, ءتيىستى شارالار جۇرگىزەدى.
ايتا كەتەيىك, قازاقستان بويىنشا جالپى سۋ سىنامالارى "قازگيدرومەتتىڭ" 17 فيليالىندا تەكسەرىلەدى.
بۇكىلالەمدىك سۋعا مونيتورينگ جۇرگىزۋ كۇنى 2003 جىلدان باستاپ جىل سايىن 18 قىركۇيەكتە اتالىپ وتەدى. ەكولوگيالىق مەرەكە ادامداردىڭ وزدەرى تۇراتىن جەردەگى, عالامشارداعى سۋ رەسۋرستارى پروبلەماسى تۋرالى حاباردار بولىپ وتىرۋىنا, ولاردى تابيعاتتى لاستانۋدان ساقتاۋ شارالارىنا جۇمىلدىرۋعا باعىتتالعان.
