جۋىردا وبلىس اكىمى گۇلشارا ابدىقالىقوۆانىڭ توراعالىعىمەن وتكەن جىلۋ بەرۋ ماۋسىمىنا دايىندىق جونىندەگى وبلىستىق شتاب وتىرىسىندا جاۋاپتى مەرزىمگە ازىرلىكتىڭ جاي-جاپسارى ايتىلدى.
بىرقاتار سالا باسشىلارىنىڭ حابارلامالارىن تىڭداعان وبلىس اكىمى قالا, اۋداندارداعى جۇمىستى باعامداي كەلە, كەيبىر ماسەلەلەرگە ۋاقتىلى ءمان بەرىپ, جۇمىستى تەز ارادا رەتتەۋدى تاپسىردى.
– بەلكول كەنتىندە جىلۋ قۇبىرلارىن كۇردەلى جوندەۋ جۇمىستارى بەكىتىلگەن جوسپارعا سايكەس جۇرگىزىلمەي وتىر. بارلىق جۇزەگە اسىپ جاتقان جوبالار 1 قازانعا دەيىن اياقتالۋى قاجەت. جوندەۋ جۇمىستارىنىڭ بارىسىنا ارنايى كەستە ازىرلەپ, ورىندالۋى تۋرالى ءار اپتانىڭ دۇيسەنبىسىندە ماعان بايانداۋلارىڭىز ءتيىس, – دەدى وبلىس اكىمى سالا باسشىلارىنا.
گۇلشارا ناۋشاقىزى اۋداندارعا گاز جەتكىزۋدى, الەۋمەتتىك نىساندارعا جىلۋ بەرۋدى ۋاقتىلى ىسكە اسىرۋدى تاپسىردى. وسى كۇنى قارماقشى, جالاعاش, سىرداريا اۋداندارى ورتالىعىنداعى گاز تاراتۋ ستانسالارىن پايدالانۋعا قاجەتتى قارجى ماسەلەسى شەشىلدى. سوندىقتان دا «قازترانسگاز ايماق» اق قىزىلوردا وندىرىستىك فيليالى وسى اۋداندارعا گاز بەرۋدى قاپەرگە الۋ ءتيىس.
جيىندا وبلىستاعى الەۋمەتتىك سالا نىساندارىنىڭ دايىندىعىنا ارنايى توقتالعان ايماق باسشىسى وبلىستىق دەنساۋلىق ساقتاۋ باسقارماسىنىڭ جاۋاپتى مەرزىمگە ازىرلىگىنە كۇماندى ەكەنىن ايتتى. مىسالى, قازالىداعى اۋداندىق تۋبەركۋلەزگە قارسى ديسپانسەر مەن سىرداريا اۋداندىق اۋرۋحاناسىنداعى كۇردەلى جوندەۋ جۇمىستارى تولىق اياقتالا قويعان جوق. سوندىقتان دەنساۋلىق ساقتاۋ باسقارماسى باسشىلىعى اۋدان اكىمدىگىمەن بىرلەسە وتىرىپ, وسى نىساندارداعى جىلۋ جۇيەلەرىنىڭ قالىپتى جۇمىس ىستەۋىنە ءمان بەرگەنى ءجون.
وتىرىستا وبلىس اكىمى كوپقاباتتى تۇرعىن ۇيلەرگە جىلۋ بەرۋ ماسەلەسىن قاراپ, جاڭعىرتۋدان وتكەن ۇيلەرگە قاتىستى قالا اكىمىنە بىرقاتار تاپسىرما بەردى. سونداي-اق قويمالارعا قاجەتتى وتىن كولەمىن جەتكىزۋدى شيراتۋ كەرەكتىگىن ايتتى. وبلىستىق كاسىپكەرلىك جانە تۋريزم باسقارماسى كومىر قويمالارىندا تاپشىلىقتىڭ تۋىنداماۋىن, قىستىڭ كوزى قىراۋدا باعانىڭ نەگىزسىز وسپەۋىن قاداعالاۋى كەرەك.
– الدىڭعى جىلدارى كومىر تاپشىلىعى مەن باعانىڭ كۇرت وسۋىنە بايلانىستى دۇربەلەڭ تۋعانىن ۇمىتا قويماعان بولارسىزدار. سوندىقتان باسقارما ەكى ورتاداعى دەلدالداردىڭ جولىن كەسىپ, كاسىپكەرلەردىڭ كومىر ءوندىرۋشى مەكەمەلەرمەن تىكەلەي كەلىسىمشارتقا وتىرۋىن ۇيلەستىرۋى ءتيىس, – دەدى ءوڭىر باسشىسى.
كوممۋنالدىق سالانىڭ باستى پروبلەماسىنىڭ ءبىرى كورسەتىلگەن قىزمەت اقىسىن جيناۋ ەكەندىگى بەلگىلى. وسىعان بايلانىستى ايماق باسشىسى وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسى مەكەمەلەر اراسىنداعى بەرەشەك قارىزداردى بولدىرماۋ شارالارىن قابىلداۋ كەرەكتىگىن ايتتى. ال وبلىستىق ەكونوميكا جانە بيۋدجەتتىك جوسپارلاۋ باسقارماسى ەلەكتر ەنەرگياسى ءتاريفىنىڭ وسۋىنە بايلانىستى بيۋدجەتتىك مەكەمەلەردىڭ شىعىندارىن قايتا قاراۋى كەرەك.
شتاب وتىرىسىندا ءوڭىر باسشىسى وبلىس اكىمى اپپاراتىنىڭ ۇيىمداستىرۋ-ينسپەكتورلىق جۇمىس جانە ايماقتىق دامۋ ءبولىمىنىڭ ينسپەكتورلارى 1 قازانعا دەيىن قالاداعى جانە اۋداندارداعى نىسانداردى ارالاپ, مونيتورينگ جۇرگىزۋى قاجەتتىگىن دە اتاپ ءوتتى.
قىزىلوردا وبلىسى
