ايماقتار • 16 قىركۇيەك، 2020

جامبىلدا وقۋشىلاردى كومپيۋتەرمەن قامتۋ ءۇشىن 4،1 ميلليارد تەڭگە ءبولىندى

18 رەت كورسەتىلدى

پاندەمياعا بايلانىستى جامبىل وبلىسىندا 2020-2021 وقۋ جىلىندا وقۋ پروتسەسى ەكى ءتۇرلى فورماتتا ۇيىمداستىرىلۋدا، دەپ حابارلايدى Egemen.kz

وبلىستىق ءبىلىم باسقارماسىنىڭ باسشىسى گۇلنار حودجابەرگەنوۆانىڭ ايتۋىنشا، وبلىستاعى 234 مەكتەپتە 208000 وقۋشى قاشىقتىقتان جانە ەپيدەميولوگيالىق جاعداي تۇراقتى شالعاي ەلدىمەكەندەردە ورنالاسقان 208 مەكتەپتە 30681 وقۋشى ءداستۇرلى تۇردە ءبىلىم الۋدا. جالپى، قاشىقتىقتان وقيتىن مەكتەپتەردەگى باستاۋىش سىنىپتاردا 3727 "كەزەكشى سىنىپتار" اشىلىپ، وندا ءداستۇرلى تۇردە 51420 وقۋشى وقىپ جاتىر.

قاشىقتىقتان وقىتۋدى ءتيىمدى ۇيىمداستىرۋ ماقساتىندا مەكتەپتەردىڭ تەڭگەرىمىندەگى 17545 دانا كومپيۋتەر از قامتاماسىز ەتىلگەن جانە كوپبالالى وتباسىنىڭ، جەتىم جانە اتا-اناسىنىڭ قامقورلىعىنسىز قالعان، ەرەكشە ءبىلىم الۋدى قاجەت ەتەتىن بالالارعا بەرىلدى. ال، 26483 دانا كومپيۋتەرلىك تەحنيكا ساتىپ الۋعا رەسپۋبليكالىق بيۋدجەتتەن 4،1 ميلليارد تەڭگە بولىنگەن. جاڭا وقۋ جىلى باستالعانعا دەيىن بايزاق، جامبىل، قورداي، مەركى، ت.رىسقۇلوۆ، شۋ اۋداندارىنىڭ جانە تاراز قالاسىنىڭ مەكتەپتەرىنە 2030 پلانشەت تاراتىلدى.

"ەندى قىركۇيەك-قازان ايلارىندا 2756 كومپيۋتەر، 20156 نوۋتبۋك، 1541 پلانشەت الىنىپ، وقۋشىلارعا تاراتىلاتىن بولادى. بۇدان بولەك، قاشىقتىقتان وقيتىن مەكتەپتەردەگى از قامتاماسىز ەتىلگەن جانە كوپبالالى وتباسى بالالارىن، جەتىم جانە اتا-اناسىنىڭ قامقورلىعىنسىز قالعان بالالاردى ينتەرنەتپەن قامتاماسىز ەتۋ ءۇشىن جەرگىلىكتى بيۋدجەت ەسەبىنەن ساتىپ الىناتىن 22904 روۋتەردىڭ 3107-ءسى مەكتەپتەرگە جەتكىزىلدى. بۇل جۇمىستار جالعاسىن تاباتىن بولادى"، دەدى باسقارما باسشىسى.

 

سوڭعى جاڭالىقتار

ۇقساس جاڭالىقتار