ايماقتار • 16 قىركۇيەك، 2020

پەتروپاۆلدا ينتەرنەت الاياق قولعا ءتۇستى

26 رەت كورسەتىلدى

ول ينتەرنەت-رەسۋرستىڭ ءارتۇرلى تانىمال سايتتارىنا جۇمىس بەرۋشى بولىپ حابارلاندىرۋ ورنالاستىرعان. تۇزاعىنا تۇسەتىندەر حابارلاسسا، بارلىق دەرەكتەر مەن كارتا ءنومىرى كورسەتىلۋگە ءتيىستى كەلىسىمشارتتىڭ جوباسىن لاقتىرعان، دەپ حابارلايدى Egemen.kz

اڭعال ادامدار ونى تولتىرىپ، الاياقتىڭ وزىنە جىبەرگەن. ال اناۋ سونداعى دەرەكتەردى پايدالانىپ، شاعىن نەسيەلىك ۇيىمداردان نەسيە الىپ، ولاردى الدانۋشىنىڭ كارتوچكاسىنا اۋدارعان. بىراق الدىن الا وعان حابارلاسىپ، "بۇرىن جۇمىستان شىعارىلعان قىزمەتكەردىڭ ەسەپشوتى بولماعاندىقتان ونىڭ اقشاسىن ءسىزدىڭ اتىڭىزعا اۋدارامىز. ال ءسىز ونى كيۆي-اميانعا اۋدارا سالىڭىز» دەپ بيازى داۋىسپەن وتىنگەن. بولاشاق "جۇمىس بەرۋشىنى" كىم الداعى كەلەدى، ەسەپشوتىنا تۇسكەن اقشانى ءبارى بىردەي ونىڭ ايتقان جەرىنە اۋدارعان. ءسويتىپ، ءوز اتىنا رەسىمدەلگەن نەسيەدەن ءوستىپ ايرىلىپ قالعان. اۋدارىلعان قاراجات مولشەرى 160-تان 220 مىڭعا دەيىنگى سومانى قۇراعان.

قازىر بۇرىن سوتتالعان 30 جاسار الاياق ۇستالىپ، ونىڭ ۇستىنەن قىلمىستىق كودەكستىڭ 190-بابى بويىنشا ءىس قوزعالدى. تەرگەۋ بارىسىندا الداۋعا تۇسكەندەردىڭ ناقتى سانىنىڭ قانشا بولعانى انىقتالادى.

"ونلاين-نەسيەگە قاتىستى وسىنداي فاكتىلەر بۇرىن دا تىركەلگەن. ءبىز ءتۇسىندىرۋ جۇمىستارىن جۇرگىزدىك، بىراق ادامدار وزدەرىنىڭ دەربەس مالىمەتتەرىن ۇسىنا وتىرىپ، الاياقتاردىڭ قارماعىنا تۇسە بەرەدى. ولار تولەمدەر بويىنشا بەرەشەكتىڭ بولۋى تۋرالى حابارلاما الا باستاعان كەزدە عانا نەسيەنىڭ رەسىمدەلگەنى تۋرالى بىلەدى. وسىنداي الاياقتىق ارەكەتتەردىڭ قۇربانى بولماس ءۇشىن تەلەفون، ينتەرنەت-رەسۋرستار ارقىلى كەز-كەلگەن مالىمەتتەردى ۇسىنباعان ابزال"، دەيدى پەتروپاۆل قالاسىنىڭ پب باستىعى، پوليتسيا پولكوۆنيگى جاندوس مۇحاتوۆ.

سوڭعى جاڭالىقتار

ۇقساس جاڭالىقتار