ايماقتار • 16 قىركۇيەك، 2020

جولداۋ اياسىندا ۇيىرمە سانىن كوبەيتۋ جوسپارلانۋدا

25 رەت كورسەتىلدى

مەملەكەت باسشىسى بيىلعى حالىققا جولداۋىندا وسكەلەڭ ۇرپاقتىڭ شىعارماشىلىق الەۋەتىنە اسا نازار اۋدارۋ قاجەتتىگىن ايتىپ، "بالالار ۇيىرمەسى" قىزمەتىن قايتا قالىپقا كەلتىرۋدىڭ ماڭىزدىلىعىن قوزعادى، دەپ حابارلايدى Egemen.kz

بۇل باعىتتا سىر بويىندا اتقارىلىپ جاتقان جۇمىستار مەن جوسپارلار جايلى وبلىس اكىمىنىڭ ورىنباسارى سەرىك احمەت وڭىرلىك كوممۋنيكاتسيالار قىزمەتىن وتكەن بريفينگتە باياندادى.

وبلىس اۋماعىنداعى 173 كلۋب-كاسىپورىندا 854 تۇراقتى ۇيىرمە بار، ولارعا 10 606 ادام قاتىسادى. جولداۋدا قويىلعان مىندەتتەردى ورىنداۋ باعىتىندا الداعى جىلى ۇيىرمە سانىن 1000-عا كوبەيتىپ، ۇيىرمە قاتىسۋشىلارىن 11 500-گە ۇلعايتۋدى جوسپارلانۋدا.    

سونىمەن قاتار، پرەزيدەنت جولداۋىندا بۇقارالىق سپورتقا، دەنە تاربيەسىنە جانە بالالار سپورتىنا باسىمدىق بەرە وتىرىپ، ءار وبلىستا، ءىرى قالالار مەن اۋدان ورتالىقتارىندا سپورت ۇيىرمەلەرىن اشۋ قاجەت ەكەنى ايتىلدى. سىر وڭىرىندە 2009 جىلدان باستاپ ساباقتان تىس جانە كەشكى ۋاقىتتا حالىق ءۇشىن سپورت سەكتسيالارىنىڭ جۇمىسىن قامتاماسىز ەتۋ ارقىلى، بۇقارالىق سپورتتى دامىتۋ تاجىريبەسى ەنگىزىلگەن.

وبلىستا 21 بالالار مەن جاسوسپىرىمدەر سپورت مەكتەپتەرى جۇمىس جاسايدى، ولاردا 20 147 وقۋشى 45 سپورت تۇرىمەن تەگىن شۇعىلدانادى.

2018-2019 جىلدارى وبلىستا 16 سپورت كەشەنى پايدالانۋعا بەرىلسە، بيىل مەملەكەتتىك-جەكەشەلىك ارىپتەستىك اياسىندا جوسپارلانعان 12 جوبانىڭ 5-ەۋى ىسكە قوسىلدى.  

جاستار ساياساتى سالاسىندا الداعى بەس جىلدىققا ارنالعان 5 باعىت، 29 ينديكاتوردان تۇراتىن SYR JASTARY-2025 جول كارتاسىنىڭ جوباسى جاساقتالۋدا.

الداعى بەس جىلدا  سىر وڭىرىندە 6 مىڭعا جۋىق جاس "جاسىل ەل" جانە "جاس قۇرىلىسشىلار" ەڭبەك جاساقتارىنىڭ قاتارىندا ەڭبەك ەتەتىن بولادى.

جاستاردىڭ كاسىپكەرلىك باستامالارىنا مەملەكەتتىك گرانتتار مەن ينۆەستيتسيالار تارتىلىپ، وڭىردەگى NEET ساناتىنداعى جاستاردىڭ ۇلەسىن تومەندەتۋ كوزدەلۋدە. اتالعان جوسپارعا وبلىستىق ەڭبەك لاگەرىن ۇيىمداستىرۋ دا قاراستىرىلاتىن بولادى.

 

سوڭعى جاڭالىقتار

ۇقساس جاڭالىقتار