تۇركىستان وبلىسى تابيعي مونوپوليالار دەپارتامەنتىنىڭ وكىلى مەن "قازاقستان رەسپۋبليكاسى ەنەرگەتيكا مينيسترلىگى اتومدىق جانە ەنەرگەتيكالىق قاداعالاۋ مەن باقىلاۋ كوميتەتىنىڭ تۇركىستان وبلىسى بويىنشا اۋماقتىق دەپارتامەنتى" وكىلدەرى كەنتاۋ قالاسىنىڭ جىلىتۋ جۇيەسىنە جۇرگىزىلىپ جاتقان جۇمىستارمەن تانىستى. جۇمىسشى توپ "كەنتاۋ سەرۆيس" مەكەمەسىنىڭ اتقارىپ جاتقان شارۋالارىنا وڭ باعاسىن بەردى.
بيىل كەنتاۋلىقتار قىستان قينالماي شىعاتىنىن ايتقان ەنەرگەتيكا مينيسترلىگى اتومدىق جانە ەنەرگەتيكالىق قاداعالاۋ مەن باقىلاۋ كوميتەتىنىڭ تۇركىستان وبلىسى بويىنشا اۋماقتىق دەپارتامەنت باسشىسى بەكجان الىمقۇلوۆ, قىسقى ماۋسىمعا دەگەن دايىندىق ماسەلەلەرى وبلىس باسشىسىنىڭ تىكەلەي نازارىندا ەكەنىن جەتكىزدى.
ايتا كەتەيىك, "كەنتاۋ سەرۆيس" مەكەمەسىنە 14534 ابونەنت قوسىلعان. بۇگىنگى تاڭدا مەكەمەدە 62 توننا سۇيىق وتىن ازىرلەنگەن بولسا, 27 مىڭعا جۋىق توننا قاتتى وتىن كەلىسىمشارت نەگىزىندە ەكىباستۇزدان كەنتاۋ قالاسىنا قاراي باعىتتالىپ جونەلتىلۋدە.
