سارىارقانىڭ ساقىلداعان سارى ايازىندا جىلۋعا بايلانىستى وكپە-ناز كوپ ايتىلاتىن ەلدى مەكەننىڭ ءبىرى – ششۋچينسك قالاسى. بيىل "جۇمىسپەن قامتۋ جول كارتاسى" باعدارلاماسى اياسىندا ورتالىق بۋ قازاندىعىن كۇردەلى جوندەۋدەن وتكىزۋ ءۇشىن 1 ميلليارد تەڭگەدەن استام قارجى ءبولىندى. قازاندىقتىڭ كونەرگەن جابدىقتارى جاڭارتىلىپ, جىلۋ بەرۋ ماۋسىمىنا دەيىن تاپ-تۇيناقتاي ەتىپ اياقتالماق.
ەلۋ مىڭعا جەتەر-جەتپەس تۇرعىنى بار قالاداعى ورتالىق بۋ قازاندىعى جىلۋمەن كوپ قاباتتى تۇرعىن ۇيلەردىڭ, الەۋمەتتىك-تۇرمىستىق نىسانداردىڭ 70 پروتسەنتتەن استامىن قامتاماسىز ەتەدى. ءسال شاشىراڭقى قونىستانعان قالانىڭ وزگە مولتەك اۋداندارىندا 6 قازاندىق جۇمىس ىستەيدى. بۇل قازاندىقتارعا دا جاز ايلارىندا اعىمداعى جوندەۋ جۇمىستارى جۇرگىزىلدى.
"مەملەكەت تاراپىنان بولىنگەن قارجىنى ۇتىمدى پايدالانىپ, ءار تيىنىن شاشاۋ شىعارماي, كوپتەن بەرى كۇردەلى جوندەۋ كورمەگەن قازاندىقتى جاڭارتىپ الدىق. بىرنەشە اگرەگاتتارى جاڭارتىلدى. جىلۋ جەتكىلىكتى كولەمدە بارۋى ءۇشىن قالا شەتىندەگى مولتەك اۋداندارعا تارتىلعان جىلۋ جۇيەسىنىڭ ديامەترى ۇلعايتىلدى. سونىمەن بىرگە قازاندىق جۇمىسشىلارى ءۇشىن تۇرمىستىق بولمەلەر سالىندى. قالعان جۇمىس قىركۇيەك ايىنىڭ سوڭىنا دەيىن تولىق اياقتالادى.", – دەيدى "بۋراباي جىلۋ" كاسىپورنىنىڭ ديرەكتورى زەينۇر الىبەكوۆ.
ەندىگى ماڭىزدى ماسەلە وتىن قورىن ۋاقىتىندا جيناقتاپ الۋ. قازىرگى كۇنى 4 ايعا ەركىن جەتەتىن مازۋت پەن كومىر قورى جاسالىپتى. الداعى ۋاقىتتا ارنايى كەستە بويىنشا قاجەتتى كولەم تاسىمالداناتىن بولادى.
اقكول قالاسىندا دا جىلۋ بەرۋ ماۋسىمىنا تىڭعىلىقتى دايىندالۋ ۇستىندە. مۇندا "ۆوستوچنىي" شاعىن اۋدانىندا جاڭا جىلۋ قازاندىعى سالىنىپ جاتىر. جوبانىڭ جالپى قۇنى 816789,407 مىڭ تەڭگە. جەرگىلىكتى ءونىم – ششۋچينسك قازاندىق زاۋىتىنىڭ سىناقتان وتكىزىلگەن قازاندىقتارى ورناتىلىپ, قالانىڭ جىلۋ جۇيەسىنىڭ جۇكتەمەسىن ەداۋىر جەڭىلدەتەتىن سىڭايلى. وتپەلى كەزەڭدە ورتالىق جىلۋ جۇيەسىنەن اعىتىلىپ تاستالعان تۇرعىن ۇيلەر ەندى جىلۋمەن قامتىلادى. بۇل جاي تۇرعىندار ءۇشىن وتە قولايلى بولاتىن ءتۇرى بار. اۋدان اكىمى الپىسباي قايىرجانوۆتىڭ ايتۋىنا قاراعاندا, قازاندىقتىڭ جۇمىسى جىلۋ بەرۋ ماۋسىمىنا دەيىن تولىق اياقتالىپ شىقپاق. قازىر قازاندىققا قاجەتتى وتىن ماسەلەسى شەشىلۋدە. بۇل جاقسىلىق وڭىردەگى الەۋمەتتىك باعدارلامالاردىڭ ىسكە اسىرىلۋىنىڭ ارقاسىندا قول جەتىمدى بولىپ وتىر.
قوس قالاداعى كوپتەن بەرى قوردالانىپ قالعان وتكىر ماسەلە – جىلۋ بەرۋ بولاتىن. ەندى مىنە مەملەكەت تاراپىنان قولداۋعا يە بولعاننان كەيىن قيىن ءتۇيىن شەشىلدى دەپ ايتۋعا تولىق بولادى.
