"مەملەكەتتىك ءبىلىم گرانتتارىن تاعايىنداۋ كونكۋرسى اياقتالدى, ەندى قورىتىندى جاساۋعا بولادى. وتكەن جىلى اكادەميالىق ادالدىقتى قامتاماسىز ەتۋ ءۇشىن ەرەجەلەردى قاتاڭداتۋ تۋرالى شەشىم قابىلدادىق. وسىلايشا, قولدانىپ ۇلگەرسە دە, ۇلگەرمەسە دە تىيىم سالىنعان زاتتارمەن تەستىلەۋگە كىرگەن تالاپكەرلەردىڭ ناتيجەلەرىن جويۋ تۋرالى جاڭا نورمالار پايدا بولدى. ءتىپتى, بۇل زاتتاردى الىپ كىرۋگە ارەكەت ەتكەندەر ەمتيحانعا جىبەرىلمەيتىن بولدى. بۇرىن مەتالل ىزدەگىش قۇرالدار ارقىلى تەكسەرۋ كەزىندە تەلەفون تابىلسا, الىپ قالاتىن ەدىك, بىراق تالاپكەر تەستىلەۋگە قاتىسا بەرەتىن", دەيدى ءبىلىم جانە عىلىم ءمينيسترى.
اسحات ايماعامبەتوۆتىڭ ايتۋىنشا, مۇنداي ەرەجە بۇزۋشىلار سانى ەلىمىز بويىنشا 100-150 مىڭنان اساتىن. ەگەر ەمتيحان كەزىندە تەلەفونمەن ۇستالىپ قالسا, كوميسسياعا ونى قولدانىپ ۇلگەرگەنىن دالەلدەۋى كەرەك ەدى. بۇل جاعداي ۇبت-نى وتكىزۋ راسىمىنە دەگەن سەنىمسىزدىككە اكەپ سوقتىردى. سوندىقتان جاڭا ەرەجەلەردى قۇراستىرعاندا بارلىق ماسەلە ەسكەرىلگەنىن ناقتىلادى.
"ناتيجەسىندە, تىيىم سالىنعان زاتتاردى ەمتيحانعا كىرگىزۋگە ارەكەت ەتەتىندەر سانى 70 ەسەگە ازايدى, 2019 جىلى 128 مىڭنان استام تەلەفون تابىلسا, 2020 جىلى ولاردىڭ سانى 2500-گە جۋىق بولدى. الايدا ەمتيحان قورىتىندىسىن جويۋ فاكتىسى 100 ەسەگە كوبەيدى: 2019 جىلى 128 تەلەفون الىپ كىرۋ فاكتىسى ورىن الىپ, 24 تالاپكەردىڭ عانا ۇبت ناتيجەلەرى جويىلسا, ال 2020 جىلى تىيىم سالىنعان زاتتار تابىلعان بارلىق 2500 ادامعا قاتاڭ شارا قولدانىلدى", دەپ اتاپ ءوتتى مينيستر.
ءمينيستردىڭ مالىمەتىنشە, ۇبت-نىڭ ورتاشا ۇپايى تومەندەگەن. پايىزدىق مولشەردە شەكتى بالل جيناعان تالاپكەرلەردىڭ سانى ەداۋىر ازايدى. بۇل – تەستىلەۋدىڭ ءادىل ءوتۋى ءۇشىن جاسالعان قادام. بيىل ۇبت وتكىزۋ ەرەجەلەرىن بۇزعانى نەمەسە جۇمىستى ناشار ۇيىمداستىرعانى ءۇشىن 20-دان استام كوميسسيا مۇشەسى مەن باسشى جازالاندى. كۇن سايىن ۇبت پۋنكتەرىندەگى كوميسسيالاردىڭ قۇرامىنا وزگەرتۋلەر ەنگىزۋگە, مىندەتىنە نەمقۇرايدى قاراعان ارىپتەستەرىمىزدى اۋىستىرۋعا نەمەسە بۇل جۇمىستان شەتتەتۋگە تۋرا كەلگەنىن قوسا كەتتى.
"بىرنەشە پۋنكتە جاپپاي بۇزۋشىلىقتاردىڭ اشىق جانە ورەسكەل تۇردە ورىن الۋىنا بايلانىستى تەستىلەۋدى مۇلدەم توقتاتۋعا جانە باسقا كۇندەرگە اۋىستىرۋعا ءماجبۇر بولدىق. وسىنداي جاعداي شىعىس قازاقستان مەن تۇركىستان وبلىستارىندا كەزدەستى. دەگەنمەن ءبىلىم جانە عىلىم سالاسىنداعى ساپانى قامتاماسىز ەتۋ كوميتەتى مەن ارنايى مونيتورينگتىك توپتاعى ارىپتەستەرىمىزدىڭ بەلسەندىلىگى مەن بىرلەسكەن كۇش-جىگەرىمىزدىڭ ارقاسىندا قاجەتتى ءتارتىپتى قامتاماسىز ەتە الدىق", دەيدى ا.ايماعامبەتوۆ.
اسحات ايماعامبەتوۆ مۇنداي شەشىمدەردى قابىلداۋ وڭاي بولماعانىن جانە تالاپكەرلەردىڭ ءالى بالا بولسا دا, ەرەجەنى ساقتاۋعا, ءوز كۇشىنە عانا سەنۋگە ۇيرەتۋ – ماڭىزدى ەكەنىن ايتىپ ءوتتى.
