ەندى جوسپارداعى 99 كوشەدە, جالپى 213 شاقىرىمدىق جوندەۋ جۇمىستارى جىل سوڭىنا دەيىن اتقارىلادى. جالپى, قىركۇيەك جانە قازان ايلارىندا ءبىرشاما جول قۇرىلىس جۇمىستارىن اياقتاۋ جوسپارلانعان.
قالا اكىمىنىڭ ورىنباسارى ماقسۇت يساحوۆتىڭ ايتۋىنشا, شاھاردا جول وتكەلدەرىن رەتكە كەلتىرۋ, ايالداما مەن باعدارشام ورناتۋ جۇمىستارى دا قولعا الىنعان.
"قالادا جول قۇرىلىسى قارقىندى ءجۇرىپ جاتىر. الدىڭعى كەيپىمەن سالىستىرعاندا قازىر الدەقايدا قالا كورىكتەنىپ, جولدار جاقسارىپ قالدى. دەگەنمەن ساپاسىنا, الداعى ۋاقىتتاعى توزىمدىلىگىنە نازار اۋدارۋ كەرەك. تۇرعىنداردىڭ ۇسىنىس-پىكىرىن, ولار ءۇشىن قولايلىلىعىن دا ەسكەرۋىمىز كەرەك. الەۋمەتتىك جەلىدە كۇن سايىن جول ماسەلەسىنە قاتىستى شاعىمداردى قاراپ وتىرامىن. ونداي كەدەرگىلەر تۋىنداماۋى كەرەك. بارىنشا قاۋىپسىز ءارى ساپالى جۇمىس ىستەلۋى قاجەت. سونىمەن قاتار, شەت ايماقتارداعى تاس جولدارعا قاتىستى ماسەلەنى دە ەرتەرەك شەشۋ امالدارىن قاراستىرۋدامىز. ءبىزدىڭ كوشەلەر مەگاپوليسكە ساي بولۋى كەرەك", دەدى قالا اكىمىنىڭ ورىنباسارى.
شاھاردا ايالدامالاردى جاڭارتۋ جۇمىستارى دا قارقىن العان. بۇگىندە 133 باستى جولداردا 260 جاڭا ايالداما ورناتىلدى.
سونداي-اق, قالادا قىركۇيەك ايىنان باستاپ Shymkent bike ۆەلوسيپەدتەرى قايتا ىسكە قوسىلدى. قازىرگى تاڭدا 40 ۆەلوستانتسيا جۇمىس ىستەپ تۇر.
