قوعام • 14 قىركۇيەك، 2020

ءسابي سۇيگىسى كەلگەندەرگە سۇيەۋ بولۋ – ساۋاپ

46 رەت كورسەتىلدى

ەل، ۇلت ءوسىمى – ەڭ باستى قاجەتتىلىك، ماڭىزدى تاقىرىپ. مەملەكەت باسشىسىنىڭ جولداۋدا ەلىمىزدەگى ءاربىر التىنشى وتباسىنىڭ ءسابي سۇيۋىندە قيىنشىلىقتارعا تاپ كەلۋى – الاڭداتارلىق احۋال. جولداۋداعى وزەكتى تاقىرىپتىڭ بىرىنە اينالۋىنا قاراپ-اق قازىرگى تاڭدا ايەلدەر مەن ەرلەردىڭ رەپرودۋكتيۆتى دەنساۋلىعى وتاندىق مەديتسينا ءۇشىن وزەكتى ماسەلەلەردىڭ ءبىرى ەكەنىن اڭعارۋعا بولادى.

حالىق سانى كۇرت ءوسىپ، بالا تۋ بو­يىنشا رەسپۋبليكادا الدىڭعى ورىندا كەلە جاتقان ماڭعىستاۋ وبلىسىندا دا بالا ءسۇيۋ باقىتىنا قول جەتكىزە الماي جۇرگەندەر بار. دەرەكتەرگە سۇيەنسەك، ماڭعىستاۋ وبلىسىندا 2019 جىلدىڭ قورىتىندىسى بويىنشا فەرتيلدى جاستاعى ايەلدىڭ سانى 167 675-ءتى قۇرادى. ولاردىڭ ىشىندەگى 0،20% وتباسىلىق جۇپ بەدەۋلىك بويىنشا ەسەپتە تۇر جانە 33 وتباسىلىق جۇپقا تەگىن مەديتسينالىق كومەكتىڭ كەپىلدىك بەرىلگەن كولەمى شەڭبەرىندە كۆوتا ارقىلى ەكستراكورپورالدىق ۇرىقتاندىرۋعا جولداما بەرىلگەن. ال بيىل، ياعني 2020 جىلى فەرتيلدى جاستاعى ايەل سانى 169 362-ءنى قۇراسا، ونىڭ ىشىندەگى 0،04% وتباسىلىق جۇپ بەدەۋلىك بويىنشا ەسەپكە الىندى.

مامانداردىڭ ايتۋىنشا بەدەۋلىك جاس تالعامايدى، جاپ-جاس ايەلدەردىڭ دە بالا سۇيە الماي سانسىراپ جۇرگەندەرى از ەمەس. الايدا سالىستىرمالى تۇردە قاراعاندا ورتا ەسەپپەن 25-40 جاستاعى ايەلدەردە بالا كوتەرە الماۋدىڭ باسىمدىعى بار. ونىڭ ۇستىنە ءسابي ءسۇيۋدىڭ جولىن باسقا جاقتاردان ىزدەۋ ارقىلى كەش قالىپ جاتاتىندار دا بار ەكەن. مىسالى، ءبىر ايەل ەمشىلەر كومەگىنە جۇگىنسە، ەكىنشىلەرى جەكەمەنشىك كلينيكالاردا ۋاقىت وتكىزەدى.

«ودان گورى مەملەكەتتىك ەمحانالاردا قا­را­لىپ، ديسپانسەرلەرگە ەسەپكە تۇرىپ، كۆوتا الۋعا قول جەتكىزۋگە بولادى. اقشاسىن ۇنەم­دەيدى ءارى ۋاقىتتان ۇتىلمايدى» دەيدى مامان­دار.

بيىل دەنساۋلىق ساقتاۋ مينيسترلىگىنىڭ جەلىسى بويىنشا ەكستراكورپورالدىق ۇرىق­تاندىرۋ تسيكلدارىن جۇرگىزۋگە 1105 كۆوتا بولىنگەن بولسا، سونىڭ ىشىندە 41 كۆوتا ماڭ­عىستاۋ وبلىسىنا ءبولىندى، 2019 جىلى 33 كۆوتا بولىنگەن بولاتىن. سونداي-اق وڭىردە 2018 جىلى 134 بالا، 2019 جىلى 138 بالا ەكۇ جۇيەسى بويىنشا ومىرگە كەلگەن.

اقتاۋ قالاسىندا «ەكومەدكاسپي» كەڭەس بەرۋ ورتالىعى جۇمىس ىستەيدى، بىراق ارنايى ەم-دوم ءىس-شارالارى نۇر-سۇلتان، الماتى قالالارىندا جۇزەگە اسىرىلادى.

– بىزدە كوبىنە ايەلدەر ەمدەلۋگە كەلەدى، ال ەر ادامدار قارالۋدان باس تارتادى. ءتىپتى ايەلدەردىڭ ءوزىن كەي جاعدايدا ۇلكەن كۇشپەن اكەلەمىز دەۋگە دە بولادى. قازىر ەمحانالاردان بالا كوتەرە الماي جۇرگەن ايەلدەردى بىزگە باعىتتاۋدى سۇراپ وتىرامىز. وسىلايشا ولارعا باعىت-باعدار بەرىپ، كومەك قولىن سوزعىمىز كەلەدى. مەملەكەت باسشىسى قاسىم-جومارت توقاەۆتىڭ كەزەكتى جولداۋىندا بۇل ماسەلەنى ارنايى كوتەرىپ، كۆوتا سانىن ارتتىرۋعا تاپسىرما بەرۋى – قۇپتارلىق ءىس. ويتكەنى بۇل وتە ماڭىزدى ماسەلە، ۇلت بولاشاعىنىڭ كەپىلى. ءبىز دە بۇل باعىتتا ۇيىمداستىرۋ جۇمىستارىن جانداندىرا تۇسەتىن بولامىز، – دەيدى ماڭعىستاۋ وبلىستىق دەنساۋلىق ساقتاۋ باسقارماسى مەديتسينالىق كومەكتى ۇيلەستىرۋ جانە انا مەن بالا دەنساۋلىعىن قورعاۋ ءبولىمىنىڭ باس مامانى، ماڭعىستاۋ وبلىسىنىڭ باس اكۋشەر-گينەكولوگى ارشىناي ساپيقىزى.

ەندىگى جەردە بالا ءسۇيۋ باقىتىنا مەملەكەت تاراپىنان جاسالعان قولداۋدى سەزىنىپ، باتىل قادام جاساۋى ءۇشىن بالا اڭساعان ءاربىر وتباسىنا، ءاربىر جانعا ءتۇسىندىرۋ، ناسيحاتتاۋ جۇمىستارى قارقىن الۋى كەرەك.

 

ماڭعىستاۋ وبلىسى

 

سوڭعى جاڭالىقتار

ەلەنگەن ەرلىك

ايماقتار • بۇگىن، 13:22

ۇقساس جاڭالىقتار