ءىس-شارانىڭ ماقساتى – بالا تاربيەسىندەگى اتا-انانىڭ, مەكتەپتىڭ جانە قوعامنىڭ ءرولىن انىقتاۋ, بالالارعا ءبىلىم بەرۋ مەن تاربيەنىڭ وزەكتى ماسەلەلەرىنە نازار اۋدارۋ.
دوڭگەلەك ۇستەلگە مەملەكەت جانە قوعام قايراتكەرلەرى, اقىندار مەن جازۋشىلار, پەداگوگيكا قاۋىمداستىعىنىڭ, ۇكىمەتتىك ەمەس ۇيىمداردىڭ, مۇددەلى مەملەكەتتىك ورگانداردىڭ, باق وكىلدەرى قاتىستى.
ءوز سوزىندە اقپارات جانە قوعامدىق دامۋ ءمينيسترى ا.بالاەۆا: ء"اربىر وتباسىنداعى جەتىستىك تە, كەمشىلىك تە قوعامنىڭ ورتاق كورسەتكىشى. مەملەكەتشىل ازامات قاشاندا وتباسىنان العان تاربيە مەن جالپى قوعامدىق قۇندىلىقتاردان قالىپتاساتىنى بەلگىلى", دەپ ايتىپ ءوتتى.
سونىمەن قاتار ا.بالاەۆا پاندەميا كەزىندە بالا تاربيەسىندەگى وتباسى مەن اتا-انانىڭ جاۋاپكەرشىلىگىنىڭ ارتا تۇسكەندىگىن اتاپ ءوتىپ, ۋاقىت – وتباسى قۇندىلىقتارىن جاڭا قىرىنان قاراۋدى تالاپ ەتىپ وتىرعانىنا توقتالدى.
ءىس-شارانىڭ مودەراتورى و.اسانعازىقىزى وتباسى ساياساتىن ىسكە اسىرۋدا ءبىلىم بەرۋ مەكەمەلەرىنىڭ, باق-تىڭ بەلسەندى ءوزارا ءىس-قيمىلىن قامتاماسىز ەتۋ, قازاقستاندا نەكە جانە وتباسى ينستيتۋتىن نىعايتۋدا ۇلتتىق تاربيەنى دارىپتەۋدىڭ ماڭىزدىلىعىن اتاپ ءوتتى.
جازۋشى, مەديتسينا جانە پەداگوگيكا عىلىمدارىنىڭ دوكتورى, قازاقستاننىڭ ەڭبەك سىڭىرگەن قايراتكەرى سوۆەتحان عابباسوۆ ءوز تاجىريبەسىمەن ءبولىسىپ, بالالاردى تاربيەلەۋ پروتسەسىندە ءوزىنىڭ كىتاپتارىندا باياندالعان ادىستەمەلەرىن قولدانۋدى ۇسىندى.
م.اۋەزوۆ اتىنداعى ادەبيەت جانە ونەر ينستيتۋتىنىڭ ديرەكتورى ك.ماتىجانوۆ ۇلتتىڭ جاڭا بولمىسى وتباسىنان باستاپ قالىپتاساتىندىعىن ايتىپ, قازاق پەداگوگيكاسىنىنىڭ تيپولوگياسىن زەرتتەپ, تاربيەنى ترەندكە شىعارۋ قاجەتتىلىگىنە توقتالدى.
قازاقستان پەداگوگيكالىق عىلىمدار اكادەمياسىنىڭ اكادەميگى, بەلگىلى ۇستاز, قازاقستاننىڭ ەڭبەك ەرى اياگۇل تورەقىزى ءوز بايانداماسىندا وتباسىلىق قۇندىلىقتارمەن ۇيلەستىرىلگەن ۇلتتىق تاربيە نەمەسە ۇلتتىق قۇندىلىقتارمەن ۇيلەستىرىلگەن وتباسىلىق تاربيە پلاتفورماسى ءداستۇرلى جۇمىسىمىز ءۇشىن دە, ونلاين تۇرىندەگى جۇمىسىمىز ءۇشىن دە اسا قاجەت ەكەندىگىن اتاپ ءوتتى.
جالپى قاتىسۋشىلار ۇلتتىق تاربيە, وتباسىلىق قۇندىلىقتار باعىتىن ەسكەرىپ, تەلەارنالارداعى باعدارلامالار كونتەنتىن قايتا قاراۋدى, ورتا جانە جوعارى وقۋ ورىندارىندا وتباسىلىق ومىرگە دايىندايتىن قوسىمشا كۋرستار وتكىزۋ قاجەتتىلىگىن ايتتى.
ءسوز سوڭىندا مينيستر ا.بالاەۆا ءىس-شاراعا قاتىسقان بارلىق سپيكەرلەرگە العىس ءبىلدىرىپ, وتباسى تاربيەسىن ۇلتتىق قۇندىلىقتارمەن ۇيلەسىمدە جۇزەگە اسىرۋ باعىتىن, ۇلتتىق يدەولوگيانى دامىتۋ ماسەلەلەرى بويىنشا ايتىلعان ۇسىنىستاردى جۇمىس بارىسىندا ەسكەرەتىندىگىن جەتكىزدى.
