ءبىز حابارلاسقاندا ابدۋراحماننىڭ اناسى اينۇر پوشتا بولىمشەسىندە ابدۋراحماننىڭ قولىنان شىققان كارتينالاردى وزگە قالاعا جولداۋعا كەزەكتە تۇر ەكەن. جاس وسكىننىڭ جايىن بىلگىمىز كەلگەن ەدى. ۋاقىتى تىعىز بولسا دا, كەزەكتەن ىسىرىلىپ شىعىپ, كەيبىر سۇراعىمىزعا جاۋاپ بەردى. ايتۋىنشا, 2009 جىلى ۇيدەگى گاز باللونى جارىلىپ, ۇلى ابدۋراحمان مەن ءوزى كۇيىپ قالعان. جەتكىلىكتى قارجى جينالسا, تەزدەتىپ وڭتۇستىك كورەياعا جەتىپ, باسى مەن بەتىن, قولىن تۇگەل كۇيىك شالعان ابدۋراحمانعا وتا جاساتۋعا اسىعىپ وتىر.
– 2009 جىلى ورال قالاسىندا تۇردىق. ءتۇس كەزىندە گاز باللونى اياق استىنان جارىلىپ, ءۇيدىڭ شاتىرىنا دەيىن قيراتىپ كەتتى. ابدۋراحماننىڭ ەكىدەن ەندى اسقان كەزى ەدى, ترۋباعا جاقىن وتىرعان. تەرەزەدەن ازەر قاشىپ شىقتىق, – دەپ ەسكە الدى اناسى اينۇر يسماعۇلوۆا. ونىڭ ايتۋىنشا, اۋىر وپەراتسيالاردان سوڭ ۇلىنىڭ ەستە ساقتاۋ قابىلەتى ناشارلاپ كەتكەن. ولار ۇلىن ارنايى مەكتەپتە وقىتۋ ءۇشىن بىرنەشە جىل بۇرىن شىمكەنتكە كوشىپ كەلىپتى. بىراق بەت-اۋزىنان ساۋ-تامتىق قالماعان بالاعا تاڭىرقاپ قارايتىندار مۇندا دا كوپ, سول ءۇشىن ابدۋراحمان سىرتقا شىعا بەرمەيدى, ۇيالادى.
– ۇلىمنىڭ جاراسى ازەر جازىلدى. تىرتىعى قاتايىپ, وسكەن سايىن تىرتىسىپ كەدەرگى كەلتىرەدى. جۇدىرىعىن جۇما المايدى, ساۋساقتارى تىرتىقتان قيسايىپ بارادى. كۇيىپ قالعان جۇزىنەن سىرتتاعى ادامدار سەسكەنەدى, مەكتەپتەگى بالالار دا ءوز ورتاسىنا قوسپايدى, – دەيدى اينۇر.
ويىن بالاسى وڭاشا وتىرىپ وي جۇگىرتكەندى ۇناتاتىن كورىنەدى. ونىسىنان ءتاپ-ءتاۋىر دۇنيەلەر شىعادى. ونىڭ قىلقالامىنان تۋعان تابيعات كورىنىستەرى كوشىرۋدەن, اينىتپاي قايتالاۋدان ادا. كەسكىندەمە بەتىن ورنەكتەگەن سەزىمى مەن تولعانىسىنان, كەلەشەككە دەگەن ۇمىتىنەن جان دۇنيەسىنىڭ ەرەكشە جىلۋىن سەزىنەسىز. جاس سۋرەتشىنىڭ شىعارماشىلىق ىزدەنىسى ەرەكشە, بەينەلەۋ ءتىلىن قالىپتاستىرۋعا دەگەن تالپىنىسى ءمولدىر دە تازالىعىمەن ايرىقشا.
– سۋرەت سالۋعا كىشكەنتايىمنان قۇشتار بولدىم. اسىرەسە تابيعات كورىنىستەرىن سالعاندى جاقسى كورەمىن. ءبىر كارتينانى كەم دەگەندە ءۇش ساعاتتا سالىپ شىعامىن. پلاستيكالىق وپەراتسيا جاساتۋ ءۇشىن ءوزىم سالعان كارتينالارىمدى وسىلاي ساتىپ باستادىم, – دەيدى ابدۋراحمان.
ول دوس تاپسام دەيدى, ەل قاتارلى مەكتەپكە بارسام دەپ ارماندايدى جانە وسى ارمانىنىڭ ورىندالاتىنىنا قالتقىسىز سەنەدى. ءدال وسى سەبەپتى دە ابدۋراحمان سۋرەتشىلىك ونەرىن تاستاماي, ەمىنە قارجى جيناۋعا كىرىستى. قازاقستاننىڭ ءار وڭىرىنەن, سونداي-اق گرەكيادان, رەسەيدەن ونىڭ كارتينالارىن الۋعا ءوتىنىش ءبىلدىرىپ جاتقاندار بار. جەتكىلىكتى قارجى جينالسا, تەزدەتىپ وڭتۇستىك كورەياعا بارىپ, وتا جاساتپاقشى. بۇگىندە ابدۋراحماننىڭ ونەرى تۋرالى ەستىگەن ەرىكتى توپ ينستاگرام الەۋمەتتىك جەلىسى ارقىلى @sos_abdurahman پاراقشاسىندا كومەك جيناۋدى باستاپ كەتكەن. ودان بولەك بەينەلەۋ ونەرى ستۋديالارىنىڭ جاس تالاپكەرلەرى دە كارتينالارىن ساتىپ, ابدۋراحماننىڭ ەمىنە ۇلەس قوسپاقشى.
كىم بىلگەن, كەسكىندەمە ءتىلىنىڭ تازالىعىنا شىنايى بەرىلگەن شەبەر, بالكي, قازاق بەينەلەۋ ونەرىنىڭ جارقىن جۇلدىزىنا اينالار. ەڭ باستىسى, كىشكەنتاي سۋرەتشىنىڭ ۇلكەن ارمانى ورىندالسا يگى ەدى دەگەن جاناشىر تىلەكپەن بارشاڭىزدى جاقسىلىقتىڭ جارشىسى بولۋعا شاقىرامىز!
