ايماقتار • 10 قىركۇيەك، 2020

وبلىس اكىمى وڭىرلىك كاسىپكەرلەر كەڭەسىنىڭ مۇشەلەرىمەن كەزدەستى

31 رەت كورسەتىلدى

بۇگىن ايماق باسشىسى گۇلشارا ابدىقالىقوۆا جاڭادان سايلانعان وڭىرلىك كاسىپكەرلەر كەڭەسىنىڭ مۇشەلەرىمەن كەزدەسىپ، سالاداعى ماسەلەلەردى تالقىلادى، دەپ حابارلايدى Egemen.kz.

"وڭىرلىك كاسىپكەرلەر كەڭەسىنىڭ ءۇشىنشى سايلاۋىندا 8000-نان اسا سايلاۋشى-كاسىپكەر سىزدەرگە داۋىس بەرىپ، تاڭداۋ جاسادى. ەلەكتورالدى كامپانيا كەزىندە سىزدەر وزدەرىڭىزدىڭ جوعارى كاسىبي دەڭگەيلەرىڭىزدى كورسەتۋ ارقىلى جەڭىسكە جەتتىڭىزدەر.       بۇگىنگى كۇنى كاسىپكەرلىك سالاسىن دامىتۋ باعىتىندا وبلىس اكىمدىگى وڭىرلىك كاسىپكەرلەر پالاتاسىمەن تىعىز بايلانىستا جۇمىس جاساۋدا"، دەدى گ.ابدىقالىقوۆا.

كەزدەسۋدە وبلىس اكىمى بيزنەس قاۋىمداستىق وكىلدەرىنىڭ وزەكتى ماسەلەلەرىنىڭ شەشىلۋىنە جانە كاسىپكەرلەرگە قولداۋ كورسەتۋ باعىتىندا تۇراقتى كومەكتىڭ بار ەكەنىن اتاپ ءوتتى. سونىمەن بىرگە شاعىن جانە ورتا بيزنەس يەلەرىنىڭ جوبالارى قولداۋ تاباتىنىن اتاپ ءوتتى.

"قىزىلوردا" وڭىرلىك ينۆەستيتسيالىق ورتالىعى اۋىلدىق ەلدى-مەكەن كاسىپكەرلەرىنىڭ جوبالارىن جەڭىلدىكپەن نەسيەلەندىرۋدە ۇلكەن سۇرانىسقا يە ميكروقارجى ۇيىمى بولىپ وتىر. ونىڭ قىزمەتى قولدانىستاعى زاڭنامالارعا سايكەس 2020 جىلدىڭ 31 قازانىنا دەيىن شەكتەلگەن بولاتىن. دەگەنمەن، ءبىز ورتالىق قىزمەتىن 2025 جىلدىڭ 31 جەلتوقسانىنا دەيىن ۇزارتتىق. جوبانى قارجىلاندىرۋ ءۇشىن ءارتۇرلى قارجى كوزدەرىنەن 1،2 ملرد تەڭگە قارجى تارتىلدى. وسىعان وراي وبلىستىڭ 2023 جىلعا دەيىنگى ەكونوميكالىق دامۋ جوسپارىن جاسادىق"، دەدى وبلىس اكىمى.

كەڭەس مۇشەلەرىمەن كەزدەسۋدە ايماق باسشىسى كارانتين ۋاقىتىندا بيزنەس سۋبەكتىلەرىنىڭ 75 پايىزى جۇمىسىن ۋاقىتشا توقتاعانىن ەسكەرە كەلە، ورتا جانە كاسىپ يەلەرىنە تۇراقتى قولداۋ بولعانىن اتاپ ءوتتى.

ايتا كەتۋ كەرەك، توتەنشە كەزەڭ ۋاقىتىندا وڭىردە 51 مىڭنان اسا شاعىن جانە ورتا بيزنەس سۋبەكتىسىنە سالىقتىق جەڭىلدىكتەر بەرىلدى، 8 مىڭعا جۋىق كاسىپكەردىڭ نەسيە تولەمدەرى كەيىنگە شەگەرىلىپ، ساۋدا نىساندارى 700 ملن. تەڭگەگە جالعا الۋ تولەمدەرىنەن بوساتىلدى. مۇنان بولەك، "بيزنەستىڭ جول كارتاسى 2025" باعدارلاماسىن ىسكە اسىرۋعا بولىنگەن قارجى 1،7 ملرد تەڭگەدەن 2،9 ملرد تەڭگەگە دەيىن ۇلعايتىلدى.

كارانتيننەن كەيىن كاسىپكەرلەر بيزنەسىن ارتاراپتاندىرۋعا كوشتى. ايماقتا توقتاپ تۇرعان تويحانالاردىڭ قىزمەتىن وندىرىسكە باعىتتاۋ جۇمىستارى دا جۇرگىزىلۋدە. بۇگىنگى كۇننىڭ وزىندە 9 تويحانا ءوز قىزمەتىن باسقا سالاعا اۋىستىرۋعا دايىن.

باسقوسۋدا كەڭەس مۇشەسى، "K-GroupLTD" جشس ديرەكتورى قايرات بورانباەۆ پەن كاسىپكەر ايتكۇل ابدىقادىروۆا ءسوز الىپ، كاسىپكەرلىككە باعىتتالعان گرانتتار مەن ءوندىرىس ورىندارىن اشۋ ماسەلەسىن ءسوز ەتتى. سونداي-اق، كاسىپكەر ماناربەك ەسپەنبەتوۆ قۇرىلىس سالاسىنىڭ ماماندارىن دايارلاۋدا جاستاردى تاجىريبە الاڭىنا تارتۋ ماسەلەسىن كوتەردى.

ءوز كەزەگىندە ايماق باسشىسى جاڭا ءوندىرىس نىساندارىن اشۋ ارقىلى باعىتتاس شاعىن وندىرىستەر قۇرىپ، تۇراقتى جۇمىس كوزدەرىن تاۋىپ، كاسىپكەرلەردى وقىتۋ ماسەلەلەرىنە جەتە ءمان بەرۋ قاجەتتىگىن قاپەرگە سالدى.

كەزدەسۋدە وبلىس اكىمى وسى كەزگە دەيىن وڭىرلىك كەڭەس توراعاسى قىزمەتىن اتقارعان، پاندەميا كەزەڭىندە حالىق قاجەتتىلىگىنە وراي قىزمەت كورسەتكەن كاسىپكەر دىنمۇحامەد ابيزوۆقا "حالىق العىسى" مەدالىن تابىستادى.

جيىن سوڭىندا گۇلشارا ابدىقالىقوۆا بيىلعى جىلى 26 ملرد تەڭگەنى قۇرايتىن 108 جوبانى ىسكە اسىرۋ ارقىلى وڭىردە 2000-عا جۋىق جاڭا جۇمىس ورنى قۇرىلىپ، كاسىپكەرلەرگە قولايلى جاعداي جاسالاتىنىن اتاپ ءوتىپ، كەزدەسۋدى قورىتىندىلادى.

 

قىزىلوردا وبلىسى

سوڭعى جاڭالىقتار

ۇقساس جاڭالىقتار