...جاقسىلىق ومىردە تىم قاراپايىم, ارتىق ماقتانعا, ءوز اتىن شۋلاپ ايتۋعا قارسى بولعان سيرەك ەرلەردىڭ ءبىرى. ءبىز ومىردە 45 جىل قاتار ءجۇرىپ, تالاي اڭگىمەلەستىك تە, تالاي سىرلاستىق تا, سول كەزدەرى ءوزىن ەلدەن ءبولىپ اتاۋعا قارسى بولعانىنا كۋامىن. سوناۋ الماتى وبلىسىنداعى مىڭباەۆ اۋىلىنا سپورتتىق كەشەن سالىپ, سونىڭ اشىلۋىنا شاقىرعاندا دا عيماراتتىڭ ماڭدايشاسىنا ءوز اتىن جازۋ-جازباۋدى كوپ تالقىلادىق... ياعني مىنا توسىن, بىراق جۇرەك تەربەتەر حابارعا جاقاڭنىڭ قاتىسى بار-جوقتىعى مەنى قاتتى تولعانتتى...
جاقسىلىق ەكەۋمىزدىڭ ءبىر اۋىلدان قىز العان باجالىعىمىز بار. ونىڭ ۇستىنە دوسپىز. ودان دا ەمەس بولار, جاقاڭنىڭ بالالارى مەنى كورسە ۇنەمى اكەسىن كورگەندەي جۇزدەرى جىلىپ, قۋانا امانداسىپ تۇرادى. اسىرەسە ۇلكەن ۇلى جاندوس ماعان ءوز بالامداي جاقىن. كەزىندە ۇشەۋىمىز ءبىر جولىققاندا, جاقاڭ جاندوسقا: «مىنا نەسىپ اعاڭ دا سەنىڭ اكەڭ بولادى. كەزدەسكەن سايىن مەنى كورگەندەي بوپ تۇر!» دەگەنى بار. سودان بەرى مەن جاندوستى «جاندوسجان نەمەسە بالام» دەيمىن, ال ول مەنىمەن تەلەفون ارقىلى بايلانىسسا دا اكەسىندەي ەرەكشە سىيلاي سويلەسىپ تۇرادى.
سول جاندوس تاياۋدا, اكەسىن ماڭگىلىك مەكەنىنە ورنالاستىرعان سوڭ ماعان حابارلاسىپ, مىناداي ءوتىنىش ايتتى. «اعا, كىمنەن شىققانىن بىلمەيمىن, ەلورداداعى جەكپە-جەك سارايىنا اكەمنىڭ اتىن بەرۋ جايلى اڭگىمە بولىپ جاتىر. جوعارىدان ءبىر اعامىز پرەزيدەنتتىڭ اتىنا حات جولداۋعا اقىل بەردى. سول حاتتى ءسىز جازاسىز عوي!» دەگەنى. «ارينە, بالام, دەدىم مەن, – كەزىندە قازاقستاننىڭ ەڭبەك ەرىنە ۇسىنعاندا دا مەن ءوزىم باستاپ, «سپورت» گازەتىندە ماقالا جاريالاپ, ونى كوپشىلىك بولىپ تالقىلاپ, قوعامدىق پىكىر تۋدىردىق قوي. كەيىننەن جاقاڭنىڭ قولعاناتى بوپ جۇرگەن سامات بالامنىڭ وتىنىشىمەن ەل پرەزيدەنتىنىڭ اتىنا حات تا جازىپ بەردىم, مۇنى دا جازامىن بالام!» دەدىم.
حاتتى جازىپ بەردىم. جوعارىعا حات كەتتى. ءبىر جولىققاندا جاندوستان سۇرادىم بۇل كىمنىڭ ۇسىنىسى دەپ. «بىلمەيمىن, اعا, – دەدى جاندوس, – قالاي بولعاندا دا قاتتى قۋانىپ ءجۇرمىز». اراعا كۇن سالىپ, جاندوسقا تاعى سۇراق قويدىم: «جاندوسجان, ءتىرى كۇنىندە اكەڭ وسىنداي نەمەسە وسىعان ۇقساس ويىن, ارمانىن ايتۋشى ما ەدى؟». «جوق, اعا, اكەم مۇنداي ماسەلەلەردى كوتەرمەيتىن بىزبەن...». «سوندا دا بولسا, جاندوسجان, جاقاڭ سەنىمەن كوپ سىرلاساتىن, ساعان كوپ ءۇمىت ارتاتىن, نە ايتسا دا ساعان ايتۋى مۇمكىن-اۋ وسى...» دەدىم, سوڭىنان قالماي. «اعا, وسى جەكپە-جەك سارايى سالىنىپ جاتقاندا اكەم ونى تالاي كوردى, اكەمە سارايدى شاقىرىپ كورسەتتى دە... وتكەن جىلى سارايدىڭ سالتاناتتى اشىلۋى بولعاندا دا اكەمدى ارنايى شاقىردى. ساراي اشىلۋىندا ەل پرەزيدەنتى بولدى. سول سالتاناتتان اكەم تەرەڭ ويعا بەرىلىپ ورالدى.
ءبىر وڭاشا قالعاندا ماعان «بالام, ساراي تاماشا ەكەن! شىركىن ەلورداداعى وسىنداي سپورتتىق كەشەنگە اتىڭ بەرىلسە نە ارمان بار! ولسەڭ دە سول اتىڭمەن جاس ۇرپاققا ۇلگى-ونەگە بولاسىڭ عوي!» دەپ كۇرسىنگەندەي, تەرەڭ دەم الىپ ايتقانى راس. بىلتىر كۇزدە اكەم ەلورداعا كەلگەن. سول جولى قالا اكىمى التاي كولگىنوۆ مىرزانىڭ قابىلداۋىندا بولدى. شاقىردى ما, ءوزى سۇراندى ما بىلمەيمىن. سول كەزدەسۋدەن ۇيگە قوس قاناتىن قاعىپ كەلدى دە ماعان: «بالام, قالا اكىمى ماعان جەكپە-جەك سارايىنا اتىمدى بەرەتىندەرىن ايتتى! قۋانىشىمدا شەك جوق!» دەپ كوزىنە جاس العانداي بولدى. بۇل جولى اڭگىمەنى كىم ءبىرىنشى بوپ قوزعاعانى ماعان بەلگىسىز بوپ قالدى».
«ال جاندوسجان, اكەڭدە مۇنداي مىنەز, مۇڭدىلىق, كۇيرەكتىك بۇرىن جوق ەدى, سەن نە بايقادىڭ كەيىنگى جىلدارى؟» دەپ سۇرادىم. ء«يا, اعا, دۇرىس ايتاسىز, اكەم نە ويلاسا دا ىشىندە ساقتايتىن. تەك... وسى 2019 جىل باستالعالى وزىنەن-ءوزى مۇڭدانىپ, ءبىزدىڭ ەرتەڭىمىزدى ويلاپ, بولاشاققا دەگەن اقىل-كەڭەستەرىن ءجيى ايتاتىن بوپ الدى...».
جاراتقاننىڭ تىلسىمىنا دا, قۇدىرەتىنە دە شەك جوق قوي. اللا تاعالا جاقاڭنىڭ دا عۇمىرىنىڭ قالاي وزگەرەرىن ءبىلىپ, وسى مۇڭدى ويلاردى جۇرەگى مەن اقىلىنا قاتار سالىپ, اۋىزبەن ايتقىزىپ تۇر ما ەكەن؟!. قالاي بولعاندا دا ەل باتىرىنىڭ جان تەرەڭىندەگى وسى ءبىر قۇپيا ارماندى جاراتقاننىڭ بىلگەنىنە داۋ جوق!
ونىڭ كۋاسى – ءمينيستردىڭ ايتقان اقپاراتى. ءارى بۇل ارتىق ەمەس! بۇل – جاقاڭداي ەردىڭ ەسىمىن ەل ەسىندە ماڭگىلىك قالدىرۋعا دەگەن ءجۇز قادامنىڭ بىرەۋى بولار. تاياۋدا جاقسىلىقتىڭ تۋعان توپىراعى – جامبىل وبلىسى دا باسقاعا ۇلگى بولار قادام جاسادى. ءوڭىر باسشىسىنىڭ ۇسىنىسىن وبلىستىق ءماسليحات دەپۋتاتتارى قولداپ, تارازداعى سپورت سارايىن جاقسىلىق ۇشكەمپىروۆ اتىمەن اتاۋعا شەشىم قابىلداندى! دەپۋتات مىرزالارعا دا, وبلىس اكىمى بەردىبەك ساپارباەۆ مىرزاعا دا, ەڭ باستىسى, بۇل شەشىمدى قۋانا قۋاتتاعان وبلىس حالقىنا دا مىڭ العىس!
بۇلار جاقسىلىق سەكىلدى ەلىنە ولشەۋسىز ەڭبەك سىڭىرگەن, ابىروي اپەرگەن ەرگە بەرىلەر ماراپاتتاردىڭ باسى عانا دەپ ويلايمىز. بولار ەلدىڭ بالاسىنداي بولىپ, جەكپە-جەك سارايىن جاقاڭنىڭ اتىمەن اتاپ الساق,ونىڭ تابانى تيگەن, ماڭداي تەرى تامعان بۇكىل رەسپۋبليكا كولەمىندە ەرتەڭگى ۇرپاققا ۇلگى بولار باتىرىمىزدىڭ اتىن بولاشاققا اپارار تالاي ۇلگىلى ىستەر ىستەلەرىنە داۋ جوق. ويتكەنى جاقسىلىق ۇشكەمپىروۆ اتتى اتپال ازاماتىمىز قانداي اتاق پەن داڭققا دا لايىق بولاتىن!!!
نەسىپ جۇنىسباەۆ,
قازاقستاننىڭ ەڭبەك سىڭىرگەن قايراتكەرى
