ناتيجەسىندە ينفەكتسيالىق بولىمدەگى ورىن سانى 520 توسەكتەن 250 توسەككە دەيىن, ال پروۆيزورلىق توسەك سانى 3560 ورىننان 1407 ورىنعا دەيىن قىسقاردى. سوڭعى مالىمەت بويىنشا ايماقتا 645 ادام ستاتسيونارلىق ەم الۋدا ەكەن. ونىڭ ەلۋ بەسى ينفەكتسيالىق بولىمدەردە جاتقان بولسا, 590 ناۋقاس پروۆيزورلىق بولىمدەگى دارىگەرلەردىڭ باقىلاۋدا. جالپى جۇقپالى اۋرۋلار ستاتسيونارىنىڭ وبلىس بويىنشا جۇكتەمەسى 22 پايىزدى قۇرايدى. ارينە, ايماقتاعى كوروناۆيرۋس ىندەتىن جۇقتىرۋشىلار سانىنىڭ ازايۋى مەن وكپە قابىنۋىنىڭ باسەڭدەۋى قۋانارلىق جاعداي. الايدا, ىندەتپەن كۇرەس جۇمىسىنا سالعىرت قاراۋعا بولمايدى. قازىر بارلىق مۇمكىندىك ىندەتتىڭ قايتالانۋىنان تۋىندايتىن قاتەردىڭ الدىن الۋعا باعىتتالۋدا. وسى ماقساتتا مەديتسينا مەكەمەلەرىنىڭ ماتەريالدىق-تەحنيكالىق بازاسىن نىعايتۋعا جانە كوروناۆيرۋستىڭ ەكىنشى تولقىنىمەن كۇرەسۋ ءۇشىن وبلىستىق بيۋدجەتتەن 6,6 ملرد تەڭگە قارجى بولىنگەن. بۇل قارجىنىڭ قوماقتى بولىگى كومپيۋتەرلىك توموگراف, پۋلسوكسيمەتر, ۆيبرواكۋستيكالىق اپپارات, رەنتگەن اپپاراتى, وكپەنى جاساندى جولمەن جەلدەتۋ اپپاراتى, اۋا كونتسەنتراتورلارى سياقتى قۇرال-جابدىقتار ساتىپ العا جۇمسالۋدا. سونىمەن قاتار دەرتتى ەمدەۋمەن اينالىساتىن ەمحانالار مەن اۋرۋحانالاردىڭ اۋماعىنا كيسلورود ستانسالارى قويىلۋدا.تۇرعىندارعا العاشقى دارىگەرلىك كومەك كورسەتۋدىڭ ساپاسىن ارتتىرۋ ءۇشىن قوسىمشا 140 جەدەل جاردەم كولىگىنە تاپسىرىس بەرىلگەن. سونداي-اق, جۇمىس ىستەپ تۇرعان 8 پتر زەرتحاناسىنىڭ اۋقىمىن 3500 ادامدى قابىلداۋعا دەيىن ۇلعايتۋ كوزدەلگەن. قازىر بۇل ورتالىقتار كۇنىنە 1500 ادامعا دەيىن قىزمەت كورسەتە الادى ەكەن.
- كوروناۆيرۋستىڭ ەكىنشى تولقىنىنا دايىندىق قىزۋ ءجۇرىپ جاتىر. ايماقتىڭ ينفەكتسيالىق جانە پروۆيزورلىق ستاتسيونارلارىندا 250 مىڭنان استام قىزۋ تۇسىرەتىن, ۆيرۋسقا قارسى پرەپاراتتار مەن انتيبيوتيكتەر بار. جەرگىلىكتى بيۋدجەتتەن دارىلىك زاتتار رەزەرۆىن قالىپتاستىرۋ ءۇشىن 550 ملن تەڭگە ءبولىندى. بۇگىندە مەديتسينالىق ۇيىمدار مەن ءدارىحانالاردا ءدارى-دارمەك تاپشىلىعى جوق. كارانتين كەزىندە ناۋقاستاردى ەمدەۋگە 3 455 مەديتسينا قىزمەتكەرى, ونىڭ ىشىندە 851 دارىگەر جۇمىلدىرىلعان بولاتىن. سونىمەن قاتار مەديتسنالىق وقۋ ورىندارىنىڭ 45 تۇلەگى مەن 281 مەدكوللەدج ءبىتىرۋشى دە ءبىزدىڭ قاتارىمىزدان تابىلدى. زەينەتكە شىققان دارىگەرلەر دە ناۋقاستارعا كونسۋلتاتسيالىق كومەك كورسەتتى. وسىنداي جۇمىلا جۇمىس ىستەۋدىڭ ناتيجەسىندە ىندەتتىڭ العاشقى كەزەڭىنە تويتارىس بەردىك. قازىر وبلىستا 165 جەدەل جاردەم بريگاداسى جۇمىس ىستەيدى. شاقىرۋ بويىنشا ۇيدە امبۋلاتوريالىق كومەك كورسەتۋ ءۇشىن 391 ءموبيلدى بريگادا قۇرىلدى. تاعى دا 100 جەدەل جاردەم كولىگى ساتىپ الىنادى. «جامان ايتپاي, جاقسى جوق» دەگەن, جەتىسۋ دارىگەرلەرى بولۋى ىقتيمال ىندەت قاۋپىنە توتەپ بەرەدى دەگەن سەنىم بار, - دەيدى وبلىستىق دەنساۋلىق ساقتاۋ باسقارماسىنىڭ باسشىسى ومىرزاق نيازبەكوۆ.
ايتپاقشى, دەنساۋلىق ساقتاۋ سالاسىن تسيفرلاندىرۋ باعىتىندا دا ءبىراز ءىس اتقارىلعان. جالپى, مەديتسينالىق قۇجاتتامانى قاعازسىز جۇرگىزۋگە 53 مەديتسينالىق مەكەمە قوسىلىپ, ەلەكتروندى فورماتقا 224 نىسان كوشىرىلگەن ەكەن. ونىڭ ىشىندە تۇرعىنداردىڭ 98,1 پايىزىندا ەلەكتروندى دەنساۋلىق پاسپورتى بار. ياعني, 1 997 750 ادامنىڭ ناۋقاس تاريحىن تسيفرلى جۇيە ارقىلى زەردەلەۋگە مۇمكىندىك بار. ال وبلىستىق, قالالىق جانە اۋداندىق دەڭگەيدەگى اۋرۋحانالاردىڭ ينتەرنەتكە قوسىلۋى 100 پايىزعا جەتسە, شالعاي ەلدى مەكەندەردى عالامتورمەن قامتۋ 84 پايىزدىڭ شاماسىنا جەتىپ وتىر.
