وبلىستىق تسيفرلىق تەحنولوگيالار باسقارماسىنىڭ حابارلاۋىنشا, الماتى وبلىسىنىڭ ايماقتىق گەواقپاراتتىق جۇيەسىنىڭ ىسكە قوسىلۋىنىڭ ناتيجەسىندە 16 مەملەكەتتىك قىزمەت ەلەكتروندى فورماتقا كوشىرىلگەن. ونىڭ 10-ى جەر قاتىناستارى, قالعان 6-ى ساۋلەت جانە قالا قۇرىلىسى سالالارى بويىنشا ىسكە اسىرىلعان.
باس جوسپارلاردى, ينجەنەرلىك جەلىلەردى وبلىستىق ماڭىزى بار قالالاردا 100% تسيفرلاندىرۋ جۇمىسى جۇرگىزىلدى. قابىلدانعان شارالاردىڭ ناتيجەسىندە جەر قاتىناستارى سالاسىندا مەملەكەتتىك قىزمەتتەردى كورسەتۋ مەرزىمى 1 جىلدان 30 كۇنگە, ال ساۋلەت جانە قۇرىلىس سالاسىندا 100 كۇننەن 10 كۇنگە دەيىن قىسقارتىلدى. سونداي-اق, ءبىلىم بەرۋ جانە سپورت سالاسىنداعى 12 مەملەكەتتىك قىزمەتتى اۆتوماتتاندىرۋ جۇمىسى جۇرگىزىلۋدە. جىل سوڭىنا دەيىن مەملەكەتتىك قىزمەتتەردى اۆتوماتتاندىرۋ دەڭگەيى 90%-عا جەتكىزىلەدى دەپ جوسپارلانۋدا.
سونىمەن بىرگە, مەملەكەتتىك قىزمەتتەردى ءوز بەتىنشە ونلاين رەجيمىندە الا المايتىن تۇرعىندار ءۇشىن وبلىس ورتالىعىندا 53 «وزىنە-ءوزى قىزمەت كورسەتۋ بۇرىشى» اشىلدى.
حالىقتىڭ تسيفرلىق ساۋاتتىلىعىن ارتتىرۋ بويىنشا اقىسىز كۋرستاردى ۇيىمداستىرۋ جۇمىستارى جۇيەلى تۇردە جۇرگىزىلىپ كەلەدى. بۇگىنگى تاڭدا وبلىستاعى حالىقتىڭ تسيفرلىق ساۋاتتىلىق دەڭگەيى 83% قۇرايدى. بيىل تاعى 10 مىڭ ادامدى وقىتۋ جوسپارلانۋدا. جىل سوڭىنا دەيىن بۇل كورسەتكىش 85 پايىزعا جەتەدى.
