قابىلدانعان شارالار ەلىمىزدەگى ەپيدەميولوگيالىق احۋالدى تۇراقتاندىردى - ا. مامين

دەنساۋلىق ساقتاۋ ءمينيسترى ا. تسوي ۋاقىتىلى قابىلدانعان شارالاردىڭ ارقاسىندا كوروناۆيرۋسقا قاتىستى جاعداي تۇراقتانعانىن باياندادى. كوروناۆيرۋس ينفەكتسياسى مەن ۆيرۋستىق پنەۆمونيانىڭ تاۋلىكتىك ءوسۋى 0،5% شەگىندە. بۇگىنگى تاڭدا وسى ينفەكتسيانى جۇقتىرعان ادامداردىڭ 94%-ى ەمدەلىپ شىقتى، ينفەكتسيالىق اۋرۋحانالاردىڭ جۇكتەمەلەنۋى 15% قۇراپ وتىر.

كوروناۆيرۋس ينفەكتسياسىنا بايلانىستى جەدەل جاردەم شاقىرۋ 80% دەيىن تومەندەدى. اۋرۋحاناداعى ورىندار سانىن 50 مىڭعا دەيىن ارتتىرۋ ماسەلەسى پىسىقتالۋدا. وڭىرلەردە 12 جۇقپالى اۋرۋلار اۋرۋحاناسى سالىنىپ جاتىر، 2 ستاتسيونار قايتا جوندەلۋدە.  اۋىلدىق جەرلەردەگى مەديتسينالىق كومەكتىڭ قولجەتىمدىلىگىن قامتاماسىز ەتۋ جۇمىستارى جۇرگىزىلۋدە. جەدەل جاردەم اۆتوكولىكتەرىمەن، اۆتوبۋستارمەن جانە بارلىق قاجەتتى جابدىقتارمەن (وكپەنى جاساندى جەلدەتۋ اپپاراتتارى، وتتەگى كونتسەنتراتورلارى) قامتاماسىز ەتىلۋدە. اۋداندىق اۋرۋحانالاردا 132 رەنتگەن اپپاراتى ورناتىلدى. بيىل 1 قازانعا دەيىن قوسىمشا 100 جىلجىمالى مەديتسينالىق كەشەن ساتىپ الىنادى. 

ەلىمىزدە جەكە قورعانىش قۇرالدارى مەن ءدارى-دارمەكتەردىڭ جەتكىلىكتى قورى جاسالدى، تاپشىلىق بولمايدى. ونىڭ ۇستىنە، تامىز ايىنان بەرى اۋرۋحانالاردا ۆيرۋستىق ينفەكتسيادان ەمدەلۋ ءۇشىن حالىققا تەگىن ءدارى-دارمەك (ىستىقتى تۇسىرەتىن، انتيكواگۋليانتتار) بەرىلىپ جاتىر. پتر تەستىلەۋ مۇمكىندىگى ارتتى (تاۋلىگىنە 40 مىڭعا دەيىن، 63 مىڭعا دەيىن جەتكىزىلۋى مۇمكىن). ۆاكتسينا ساتىپ الۋ جانە وزىمىزدە ۆاكتسينا جاساپ شىعارۋ جونىندە كەلىسسوزدەر وتكىزىلدى. 15 قىركۇيەكتەن باستاپ تۇرعىندارعا تۇماۋعا قارسى ەكپە جاسالادى. 

"جالپى، ۇكىمەت تاراپىنان اۋقىمدى جۇيەلى جۇمىس جۇرگىزىلۋدە. قابىلدانعان شارالاردىڭ ناتيجەسىندە ءبىز ەلىمىز ءۇشىن كۇردەلى كەزەڭدى ەڭسەردىك جانە اۋرۋدىڭ تارالۋ دەڭگەيىن تومەندەتۋ قامتاماسىز ەتىلدى. باستىسى، بىزدەگى دەنساۋلىق ساقتاۋ جۇيەسى كوروناۆيرۋس جۇقتىرعانداردى ەمدەۋ بويىنشا زور تاجىريبە الدى. بارلىق قابىلدانىپ جاتقان شارالار كۇزدە پايدا بولۋى مۇمكىن پاندەميانىڭ جاڭا تولقىنىنا جانە ماۋسىمدىق اۋرۋلارعا قارسى كۇرەسۋگە جاعداي جاسايدى. ارينە، سانيتارلىق تالاپتاردى قاتاڭ ساقتاۋ كەرەك"، - دەدى ا. مامين.

ۇكىمەت باسشىسى الەمدەگى ەپيدەميانىڭ تۇراقسىزدىعىن ەسكەرىپ، ۆيرۋستىڭ قايتادان ءورشۋ مۇمكىندىگىنە دايىندىق جۇمىستارىن جالعاستىرۋ جانە كەيبىر شەكتەۋ شارالارىن (قاشىقتان ءبىلىم بەرۋ، دەمالىس كۇندەرى لوكداۋندى ساقتاۋ) ساقتاۋ قاجەت ەكەنىن اتاپ ءوتتى.  پرەمەر-مينيستر وڭىرلەردىڭ اكىمدەرىنە ەپيدەميولوگيالىق جاعدايدى ەرەكشە باقىلاۋدا ۇستاپ، بارلىق سانيتارلىق نورمالاردى قاتاڭ ساقتاۋدى، ۆيرۋستىڭ تارالۋى مەن اۋرۋ جۇقتىرۋ كورسەتكىشتەرىنىڭ وزگەرۋىنە قاراي جەدەل ءارى ناقتى ارەكەت ەتۋدى، ينفراقۇرىلىمدى دايىنداۋ شارالارىن قابىلداپ، بارلىق ساتىداعى مەديتسينا قىزمەتكەرلەرىنىڭ قاۋىپسىزدىگىن قامتاماسىز ەتۋدى تاپسىردى. دەنساۋلىق ساقتاۋ مينيسترلىگىنە مۇددەلى مەملەكەتتىك ورگاندارمەن بىرگە حالىق اراسىندا پروفيلاكتيكالىق جۇمىستى كۇشەيتۋ تاپسىرىلدى. 

"دەنساۋلىق ساقتاۋ جۇيەسىنىڭ دايىندىعىن باقىلاۋدا ۇستاۋ قاجەت، سونداي-اق قاۋىپ توبىنداعى ادامداردى ناقتى قاداعالاۋدى قامتاماسىز ەتۋ كەرەك"، - دەدى ا. مامين.