ماسەلەن, جولداۋداعى اۋىل شارۋاشىلىعىن دامىتپاي, باسەكەگە قابىلەتتى ەكونوميكا قۇرۋ مۇمكىن ەمەس. بۇل سالادا شەشىمىن تاپپاي كەلە جاتقان وزەكتى ماسەلەلەر بار. اتاپ ايتقاندا, جۇرتتىڭ جەرگە قول جەتكىزە الماۋى, ۇزاق مەرزىمگە بەرىلەتىن «ارزان نەسيەنىڭ» بولماۋى, كاسىبي مامانداردىڭ تاپشىلىعى. مىنە, وسىنداي قالىپتاسىپ وتىرعان احۋالدى تامىرشىداي تاپ باسقان تۇسى كوڭىلدەن بەرىك ورىن الدى. مەن وسىنىڭ ىشىندە كاسىبي ماماندار تاپشىلىعىنا توقتالار ەدىم.
الدىمەن مامان تاپشىلىعى قاي كەزدەن باستالدى؟ وسى ءبىر ءساتتى كوز الدىمىزعا ەلەستەتىپ الايىقشى. اۋىل شارۋاشىلىعى ماماندارىنىڭ قوجىراۋى, ىلكىدەن جالعاسىپ كەلە جاتقان تاماشا ءداستۇردىڭ ءۇزىلۋى وتپەلى كەزەڭنىڭ تۇسىندا ورىن الدى. ونىڭ ەڭ باستى سەبەبى, اۋىل شارۋاشىلىعى ەڭبەككەرلەرىنە جالاقى دۇرىس تولەنبەدى, ولار ەڭبەكاقىنى شوپپەن, سابانمەن, قالدىق جەممەن الدى. قولدارىنا تەڭگە تيگەن جوق. بۇل – ءبىر. ەكىنشىدەن, ەڭبەك ادامىن قادىرلەۋ بولا قويمادى. مەحانيزاتور مەن كومباينشىلار ماۋسىمدىق جۇمىس كەزىندە عانا قاجەت بولدى. ءىرى سەرىكتەستىكتەر تەك قانا ەگىن ەگۋمەن اينالىستى. ولار ازابى كوپ مال شارۋاشىلىعىنا ونشالىقتى ىقىلاس تانىتپادى. سوندىقتان اۋىلدىق جەرلەردە مەحانيزاتور ماماندىعى كوكتەمدە ءبىر اي, كۇزدە ءبىر اي سۇرانىسقا يە. جۇمىس بولماعاندىقتان, تابىستىڭ دا جوق ەكەندىگى بەلگىلى.
جىلدار وتە كەلە اقىق ءدان ايالاعان بۇرىنعى مەحانيزاتورلار لەگى زەينەتكەرلىككە شىقتى, ولاردىڭ ورنىن باساتىن جاستار جوق. راس, كاسىپتىك-تەحنيكالىق كوللەدجدەردە وقىتىلىپ جاتقانىمەن, ازابى كوپ, تابىسى از جۇمىسقا ىنتا بىلدىرۋشىلەر قاتارى ايتارلىقتاي كوپ ەمەس. مىنە, وسىدان بارىپ اۋىل شارۋاشىلىعى ماماندارىنىڭ تاپشىلىعى باستالدى.
ءبىزدىڭ سەرىكتەستىكتە ماشينا-تراكتور پاركى جىل سايىن جاڭارتىلادى. الىمدىلىعى جوعارى, قۋاتتى, شەتەلدىك تەحنيكا. تولىمدى ەڭبەكاقىسى ۋاقتىلى تولەنەدى. بىراق سونىڭ وزىنە مامان تابا الماي وتىرعان جايىمىز بار. كوللەدج بىتىرگەن ءبىلىم الۋشىلار ءالى شيكى. ولارعا وقۋ بارىسىندا جاڭا تەحنيكانىڭ جاي-كۇيى وقىتىلمايدى. سوندىقتان اۋىل شارۋاشىلىعىنا كادر دايارلاۋ ماسەلەسىن ءبىلىم سالاسى مەن شارۋاشىلىق سالاسى بىرلەسىپ وتىرىپ پىسىقتاعان ابزال. ايتپەسە قازىر قاي شارۋاشىلىققا قانشا مەحانيزاتور مەن كومباينشىنىڭ قاجەت ەكەنىن ەشكىم بىلمەيدى. ماسەلەنىڭ تۇيىقتالاتىن جەرى دە وسى.
ءىسىمىز ءونىمدى بولۋى ءۇشىن, اۋىل شارۋاشىلىعىن مەيلىنشە دامىتۋدا ەڭ الدىمەن شارۋاشىلىققا قاجەتتى الۋان كادرلاردى دايارلاۋعا كوڭىل ءبولۋىمىز قاجەت. ءىس تەتىگىن دە شەشەتىن كادر ەمەس پە؟ ال بىزدەگى كادرلار قاراۋسىز قالعان. ەگەر ماماندار جەتكىلىكتى بولسا, گەكتار بەرەكەسى ارتا تۇسەر ەدى. سوندا عانا ەل ىرىزدىعىن ەسەلەۋگە بولادى. ايتپەسە, جوسپار قۋالاپ, القاپ كولەمىن ارتتىرعانىمىزبەن, ءونىمدى از الساق, جەرگە قيانات جاساعان بولار ەدىك. وعان جول بەرمەس ءۇشىن مامان دايارلاۋعا ءمان بەرىلۋى كەرەك. مەملەكەت تاراپىنان جاسالىپ جاتقان قامقورلىقتىڭ قايتارىمى بولعانى دۇرىس.
باۋىرجان مولداعاليەۆ,
«اسنو كوكشە» سەرىكتەستىگىنىڭ اگرونومى
اقمولا وبلىسى,
زەرەندى اۋدانى
