اسەان پاا باس اسسامبلەياسىنىڭ پلەنارلىق وتىرىسىندا ءسوز سويلەگەن ءماجىلىس سپيكەرى الەمدىك جەتكىزۋ تىزبەكتەرىن قالپىنا كەلتىرۋدىڭ, قازىرگىدەي كۇردەلى گەوساياسي جاعدايلاردا كولىك-لوگيستيكالىق باعىتتاردىڭ اشىقتىعى مەن قاۋىپسىزدىگىن قامتاماسىز ەتۋدىڭ ماڭىزدىلىعىن اتاپ ءوتتى.
– وسى ورايدا ەلباسى نۇرسۇلتان ءابىش ۇلى نازارباەۆتىڭ بۇكىل ەۋرازيا قۇرلىعىندا سەرىكتەستىك قۇرۋ تۋرالى ۇلكەن ەۋرازيا ستراتەگيالىق يدەياسى ەرەكشە وزەكتى بولىپ وتىر. ساۋدا-ەكونوميكالىق جانە ينۆەستيتسيالىق ىنتىماقتاستىقتى تەرەڭدەتۋ ءۇشىن ەۋرازيالىق ەكونوميكالىق وداق جەلىسى بويىنشا اسەان-مەن ءوزارا ءىس-ارەكەتتى دامىتۋ الەۋەتتى بولىپ تابىلادى, – دەدى نۇرلان نىعماتۋلين.
ءماجىلىس توراعاسىنىڭ ايتۋىنشا, وسى فورماتتاعى ەكونوميكالىق بايلانىستاردى نىعايتۋ كونتينەنت ەلدەرىنىڭ دامۋىنا, ەكونوميكالىق وسۋىنە جانە ازاماتتاردىڭ ءال-اۋقاتىنىڭ ارتۋىنا قۋاتتى سەرپىن بەرە الادى.
670 ميلليونعا جۋىق حالقى بار اسەان, ىشكى جالپى ءونىمى 3,5 ترلن اقش دوللارىن جانە سىرتقى ساۋدا اينالىمى 4,5 ترلن اقش دوللارىن قۇرايتىن ەڭ ءىرى ايماقتىق ۇيىمداردىڭ ءبىرى.
مەملەكەت باسشىسى قاسىم-جومارت توقاەۆ ايماقتاعى حالىقارالىق ۇيىمدارمەن ىنتىماقتاستىقتى دامىتۋعا ەرەكشە ءمان بەرەتىنىن ايتقان نۇرلان نىعماتۋلين وڭتۇستىك-شىعىس ازيا ەلدەرىمەن قارىم-قاتىناستى نىعايتۋ جانە اسەان-مەن بايلانىستى كەڭەيتۋدى قازاقستاننىڭ سىرتقى ساياساتىنىڭ باسىم باعىتتارىنىڭ ءبىرى دەپ اتادى.
سونىمەن قاتار ءماجىلىس توراعاسى پارلامەنتتىك ديپلوماتيانىڭ حالىقارالىق ىنتىماقتاستىقتىڭ ءتيىمدى تەتىكتەرىن قۇرۋدا جانە ايماقتىق جانە كونتينەنتالدى دەڭگەيلەردە ورتاق شەشىمدەر تابۋدا ايتارلىقتاي الەۋەتكە يە ەكەندىگىنە سەنىم ءبىلدىردى.
ايتا كەتۋ كەرەك, اسەان پاا 41-ءشى باس اسسامبلەياسىنىڭ وتىرىسى حانوي قالاسىندا ۇيىمداستىرىلدى, ونىڭ قازىرگى پرەزيدەنتى ۆەتنام ۇلتتىق اسسامبلەياسىنىڭ توراعاسى.
سونداي-اق كۇن تارتىبىنە سايكەس بەيبىتشىلىك پەن قاۋىپسىزدىكتى قامتاماسىز ەتۋ, پارلامەنتتىڭ COVID-19-دان كەيىن ايماقتاعى ىنتىماقتاستىق پەن ەكونوميكانى قالپىنا كەلتىرۋدەگى ءرولى, جۇمىسشى ايەلدەر ءۇشىن جۇمىس پەن كىرىستى قامتاماسىز ەتۋدە پارلامەنتتەگى ايەلدەردىڭ ءرولىن ارتتىرۋ, اسەان پاا جاس پارلامەنت وكىلدەرىنىڭ بەيرەسمي كەزدەسۋى تۋرالى ماسەلەلەر قارالدى.
