مەملەكەت باسشىسى «قازاگرو» مەن «بايتەرەك» حولدينگتەرى بىرىكتىرىلەتىنىن, سونداي-اق كۆازيمەملەكەتتىك كومپانيالاردىڭ سانى قىسقارتىلاتىنىن جەتكىزدى. سونىمەن قاتار شەنەۋنىكتەردىڭ شەتەلدىك بانكتەردە جاتقان قاراجاتىنا بايلانىستى جاڭا شەكتەۋلەردى ەنگىزۋ ۇسىنىلىپ, سىرتتاعى اقشانى ەل ەكونوميكاسىنا جۇمساۋ جولدارى قاراستىرىلعانى قۋانتادى. ويتكەنى بۇل قاراجات ارقىلى وتاندىق شاعىن جانە ورتا بيزنەستىڭ الەۋەتىن ارتتىرۋعا جول اشىلار ەدى.
مەملەكەتتىك قىزمەتشىنىڭ نەمەسە كۆازيمەملەكەتتىك مەكەمە باسشىسىنىڭ قوس ازاماتتىعى انىقتالعان جاعدايدا ولار قىزمەتىنەن بوساتىلاتىنىن ناقتىلادى. اۋىل شارۋاشىلىعىنا ارنالعان جەر تەلىمدەرىن ءتيىمدى پايدالانۋ بويىنشا ۇلتتىق ەكونوميكا مينيسترلىگى مەن سالاعا جاۋاپتى ۆەدومستۆو كەشەندى جۇمىس اتقارۋ قاجەت. بۇل ماسەلەگە قاسىم-جومارت توقاەۆ تا ۇدايى كوڭىل اۋدارىپ كەلەدى.
پرەزيدەنت ەكولوگيا ماسەلەسىنە دە ەرەكشە توقتالىپ, «جاسىل» ەكونوميكانى دامىتۋ بويىنشا ناقتى قادامداردى ايتتى. بۇل ءبىزدىڭ ەكولوگيالىق قاۋىمداستىعىمىزدىڭ باعىتى. الداعى ۋاقىتتا جاسىلدار پارتياسى قۇرىلسا, وسى باعىتتا جۇمىس ىستەۋگە دايىنبىز. ايتالىق قازاقستاندا تۇرمىستىق, وندىرىستىك جانە باسقا دا قالدىق تۇرلەرىن وڭدەيتىن كاسىپورىنداردىڭ سانىن ارتتىرۋىمىز قاجەت. سول سەكىلدى ەلىمىزدە جاڭعىرمالى ەنەرگيا كوزدەرى, اتاپ ايتقاندا, جەل مەن كۇننەن وندىرىلەتىن ەنەرگيانىڭ كولەمىن ارتتىرۋعا تولىق مۇمكىندىك بار. بۇل وندىرىلگەن قۋاتتى ەكونوميكانى وركەندەتۋ ءۇشىن ءتيىمدى پايدالانا ءبىلۋ كەرەك. «جاسىل» ەكونوميكانىڭ تۇجىرىمداسى وسىندا جاتىر.
جولداۋدا ايتىلعانداي, كۆازيمەملەكەتتىك ۇيىمداردىڭ سانىن 10%-عا قىسقارتۋ ۋاقتىلى شەشىم دەپ ويلايمىن. سەبەبى قاجەتسىز ارتىق جۇمىس ورىندارىن اشىپ, مەملەكەتتىك قاراجاتتى ءجون-جوسىقسىز پايدالانىپ جاتىر. وسى رەتتە كۆازيمەملەكەتتىك سەكتورعا جۇمسالاتىن اقشانى ەكونوميكانىڭ قاجەتتى سالالارىنا اۋدارعان الدەقايدا ءتيىمدى بولادى دەگەن سەنىمدەمىن.
ازاماتحان ءامىرتاي,
«بايتاق-بولاشاق» ەكولوگيالىق اليانسىنىڭ توراعاسى
